Hyíburus 13 - Bokyi Bible

Eringe nyí badachi ne kyi-nyîn Osówo Dyityém

¹ Ca n̂g kashú ne kyijé ńkyí bamu ba-kyú u ne barî wǎ bwǎn-bané ké bubwô-Karâs.

² *Da n̂g ené bacinbánet ekoo kanong ké byise enen*. Banet mbe kô ḿbé baa/chi éné ba-koo barím ḿbé banong, ba*da/nyît*.

³ Zîim m̂ banet ḿbé mbe ké mgbokobá éné wǎ ben to bamu ké mǔ ne mbé. Zîim m̂ banet ḿbé mbe ba-ri ng afaníkong éné wǎ ben bamu ba-ri ng afaníkong wǎ mbé.

⁴ Kángkáng banet bakye dyibé ebé ofê. Batyép ne banyi ba-man ba-fé dyityém ne barî. Osówo o/chi o-pan banet ḿbé mbe ba-chi i byibî-byěm ne ḿbé mbe ba-chi i byinam kyibî-mpan.

⁵ Kyijé ńkyí akpuga kyi*dachi kyi-kyú běn fáráng ne akpen enen*. Ńkyí bamu ne nkyí kyikwárê běn. Ké ebóng, Osówo oo/fu, me mm*ba/chi m-mîng běn ne banyá*. Me mm*ba/chi n-twóp běn n-dim ne banyá*.

⁶ Bâ n̂g kâng byi-cíp dyityém, byi-raa byi/fu, Otu Kyítá o-chi i onet-ochwâp ejí, me mm*ba/chi n-shî*. Ebóng ńkyí onet oda mě eman echi.

⁷ Kû n̂g ezîim banet-ashí enen ḿbé kpákpá ḿbé ba/mû ba/pem běn kyi-kim ne kyitwóm ńkyí Osówo. Bwa n̂g ne okabe enen ké esim kyi-kim ne eringe ba/kyú akpen ebe ne eringe nyí ba/kpú, ne ba-leme dyityém ebe ńdyí ba/fé ne Osówo.

⁸ Jisos Karâs mu dyizong dyibónge kyísóng ne kurún ne ne banyá.

⁹ *Da n̂g ebángê byěm byikíri ḿbyí mbe ba-tángê e* ḿbyí byi*fí ké kafâ* byi-fîm běn ké ochíchí-kiǐfáng*. Nkyi kanong ńkyí ochwâp mú Osówo odachi basun eten ba-kyú shwaneshwane, *chí ké bubwô ḿbú byije etî kyi-kim ne byiryíng*. Ké ebóng, byije ḿbyín byi*da/chwáp ne banet ḿbé mbe ba-tî ng kámbyí*.

¹⁰ Banchi kyifen-Osówo ḿbé mbe ba-chi i bǎmkpóngé ebe ké mpyep-kyifen-Osówo echi mú badabi ké kyídí, mú banet-Jûs ba*fí ne bukwóp ḿbú badaryí byiryíng-kyifen ké kyikit eten ńkyí byidachi kyifen-Osówo*.

¹¹ Otu-nchi kyifen-Osówo mú banet-Jûs o-bâ ké kafâ-ochíchí-nfût-ociring ne baróng ḿbé byitú ḿbé odakye wǎ kyifen echi ké byibî, nké byirim-byitú ámbyi baa*shí kámbyí ké kafâ-oshê*.

¹² Ké bubwô ḿbún, Jisos to o/kpú ké esim-kyibám ńkyí ba/wâng oshê, eringe nyí nyǐ odasoo banet byibî ké baróng emen.

¹³ Bâ n̂g kâng byi-mîng kafâ-oshê, byi-kâm ǎ kyíjí, byi-da-koo to éshwân nyí nyǐ o/koo.

¹⁴ Ké ebóng, oshê o*fí mú oda bě ewaa ne banyá nyín ké ejíí*. Be byimu byi-kyé ng oshê mú o/chi o-bâ.

¹⁵ Bâ n̂g kâng byi-kye Osówo akpee kángkáng nkéré wǎ kyifen eten ké bubwô-Jisos, ńkyí nkyi eyáré nyí byibî-ocím eten ḿbyí mbyi byi-sét ng kyi-kim ne dyizîn emen.

¹⁶ *Da n̂g eráp echi kanong ne barî* ne barî echwáp* ké ebóng, ḿbyín nké mbyi byifen ḿbyí byidanyîn Osówo.

¹⁷ Jwo n̂g banet-ashí enen ba-chi to ńkyí ba/kye busa ba/fu, bachi. Mbé mbe ba-bám m basun enen ojâng baa*jáng* ké ebóng, mbé ba-man ba-sét Osówo kyi-kim ne bǎmkpóngé ebe. Â ben ba/jwo kámbé mbé ba-chi i bǎmkpóngé ebe ne bunyîn-dyityém. Â kyi*fí éné* mbé ba/chi ba-chi kámbé ne bafip ne ńkyí nkyí kii*ba/chi kyi-chwáp běn nang onyin*.

¹⁸ Fé n̂g nshwam ba-kye Osówo ké bubwô eten ba-ca kashú. Be byi/kabe byi/fu, byimu ne atyém wááng, ké ebóng, be kángkáng nkéré byimu byi-ryuu ng byi/fu, byi-chi i chwǒm ńkyí kyi/kwárê.

¹⁹ Me mu n-chî ng běn etîm arông, aciringaciring n/fu, fé n̂g nshwam eringe Osówo o/chi o-twóm mě m-bwa esim n-kâm běn abeabe.

Nshwam

²⁰ Osówo mú bunyîn-dyityém oo/jwóbê Jisos, Otu Kyítá eten ké bukyû, mú mu kiǐtí-mbâm ebû ké bubwô ḿbú bukyû emen. Ké ebóng, baróng emen nké ba/kúlî ocím mú Osówo o/ryí o-sem byiko emen mú o/chi o-waa ne banyá.

²¹ Kyi/bát Osówo mú bunyîn-dyityém okye běn kángkáng byěm ḿbyí byinong ḿbyí bamu ba-ryuu ng, eringe nyí badachi ńkyí nyǐ mu o-ryuu ng. Kyi/bát nyǐ to ké bubwô ḿbú Jisos Karâs, ochi ké kafâ-atyém eten ńkyí kyi/nyîn ǎ. Kyi/bát akpee akyú ne Karâs ne banyá ne banyá. Kyi/bát kyikyú éné.

Nkuli Kyikû-Byiraa

²² Mu n-tîm m běn arông, ǎ bwǎn-bané ejí, n/fu, tî n̂g atông kyísí chee ba-jwo kyitwóm ńkyín kyi-kim ne dyityém eshwane, ké ebóng, léta mún mú me n/sáng běn něen o*da/jáng ekwóp*.

²³ Mu n-ryuu ng n/fu, ben banyît ba/fu, Tyímótyi mú wǎn-boné eten oo/byí ké mgbokobá. Â o/wá ebê, me n/chi m-bâ ne nyǐ ké nkéré mú m/bê běn eri.

²⁴ Ta n̂g kángkáng banet-ashí enen ne kángkáng banet ḿbé Osówo kyiraa ba-kye bě. Bwǎn-bané eten ḿbé ké Étalyi ba/ta běn kyiraa.

²⁵ Kyi/bát kanong ńké Osówo kakyú ne ben ashí amúmú.