Hyíburus 12 - Bokyi Bible

Osówo Bonchí Eten

¹ Be kâng byimu ne bujê-bantûesé ḿbén byicê byimúmú. Byizú n̂g kâng abwô ké kángkáng byěm ḿbyí mbyi byi-ku ng bě bukwóp, ne ké byibî ḿbyí mbyi byi-kám m bě byi-cít ng. Bâ n̂g byi-fé busa byi-zóngê ochéé mú mu bě ké kashú ne dyityém ecíp.

² Bâ n̂g byi-kûleme Jisos mú atyém eten nyí byi/fé ne Osówo nyi a-jêem m esim kyi-fím ké kiimkpet kyikû tete kyi-ribi ké nkuli kyikû. Nyǐ o*da/zú abwô ké bubwô ḿbú kyikwap ńkyí badashwân onet*. Nyǐ o*da/kabe chwǒm nang kyibónge kyi-kim ne éshwân nyí bukyû ekpú ké kyikwap ánkyi* ké bubwô-bunyîn-dyityém ḿbú bu/mû bu-bám m ǎ, ne kántîk, nyǐ oo/kyú ké kyicê ńkyí bubwô-etyebéng-kakyúng-butu ńké Osówo.

³ Kabe n̂g kyi-kim ne busông ḿbú nyǐ o/ri, eringe o/ryí ofit ké busa-dyityém ḿbú banchi byibî ba/mû ne mbú chwóó ne nyǐ. Ké bubwô ámbu, asa a*dachi a-jwâa běn ba-mîng abwô*.

⁴ Ké nǎ, ké bunwa enen ne byibî, ben ba*da/nwa ne ba-ribi ké ochíchí-kyikit ńkyí baróng bada běn ebyí*.

⁵ Ben baa/ráp ejá nyí Osówo nyí e/chi atyém enen a-shwane? nyí e/raa ne ben wǎ bwǎn emen dí. Nyǐ o/raa o/fu, wǎn ejí, fwôo atông ké nkéré mú Otu Kyítá o-kú o-tángê e ǒ dyishí. Asa to a*dachi a-jwâa ǒ* ké nkéré mú nyǐ o-kú o-bîn n ǒ*.

⁶ Ké ebóng, Otu Kyítá o-tángê e nang yeě mú mu o-jê ng ǎ dyishí, ne o-mín n nang yeě mú nyǐ mu o-koo ng ǎ wǎ wǎn emen.

⁷ Ryí n̂g ofit ké afaníkong nyí bamu ba-ri ng wǎ chwǒm ńkyí kyi/fím ké abwô nyí Bonchí enen. Ké ebóng, afaníkong enen nyi a-tông ng a/fu, Osówo mu o-tî ng běn wǎ bwǎn emen. Wǎn mu kô nang obónge mú bonchí o*da ǎ etángê dyishí dí*.

⁸ Â nyǐ o*da běn etángê dyishí wǎ eringe nyí mu o-tángê e kángkáng bwǎn emen* ányi kyi/byí, ben ba*fí bachíchí-bwǎn emen* ba-chi i bwǎn-dyikpe.

⁹ Kyi-kim ne banchí eten ḿbé ké ejíí ńnyín kâng, mbé nang ba/mín bě, be byi-kyâ kámbé ofê. Kyi-nwa ng kyi-shwôm kâng ńkyí byidakye Bonchí eten mú basun ofê, eringe nyí byidakpen.

¹⁰ Banchí eten ḿbé ké ejíí ńnyín ba-tángê e bě dyishí ké kaǎkím-nkéré, eringe nyí kyi/kwárê kámbé. Nké Osówo mu o-tángê e bě dyishí ké kanong ńké eten, eringe nyí byidanung ké kanong emen.

¹¹ Ké nkéré mú ba-kú ba-tángê e bě dyishí, kyi-chi i bě éné wǎ chwǒm ńkyí kyida bě echi byi-firi bafip báfip, *chí ńkyí kyida bě ekye bunyîn-dyityém*. Ké nkéré mú kaa/bwon kâng, banet ḿbé Osówo oo/tángê kámbé dyishí ké afaníkong ányi, ba-koo ng eyáré nyí bunyîn-dyityém nyí dyikpen ńdyí kanong echi.

Bacê ne Ekó ekuri

¹² Bêem m̂ biibyibok-abwô ḿbyí barî-banet enen kyíbóng kâng, ba-nabe to badegedege-arông ebe.

¹³ Kû n̂g ecen kángkáng nkéré ké biǐfáng ḿbyí dángdáng, eringe nyí kyiká ńkyí nkwa kii*ba/chi kyi-byíryî* nké kyi/chi kyi-bwa kyi-nyange.

¹⁴ Kan n̂ ba-kyú ké bunyîn-dyityém ne kángkáng banet, ne kan n̂ ba-kyú to akpen nyí anong, ké ebóng, onet mú o*fí o-kyú u dyikpen ńdyí dyinong* oo*ri Otu Kyítá*.

¹⁵ Ri n̂g ba/fu, nang yeě nang yeě o*dachi o-bírî ochwâp mú Osówo esim*. Ri n̂g ba/fu, nang yeě o*dachi o-kyú wǎ kyichí ńkyí kyidaruu* ńkyí nkyi kyi-kán n kyi-câ* ne nkyi kyi-kyâ bujê-banet chwóó orwôm*.

¹⁶ Ri n̂g ba/fu, nang yeě o*dachi o-bírî o-kûchi byibî-byěm* nang o-kûkyú dyikpen ńdyí oo*nyît Osówo* wǎ Éso mú o/shee bukínkán emen ké dyicáng-byiryíng dyibónge*.

¹⁷ Ben bamu ba-nyît ng ba/fu, Éso o/mû o-ryuu ng o/fu, nyǐ o-koo ng ojware mú bonchí emen. Nké bonchí o/né ǎ ekye, ké ebóng, bonchí o*da/man eyángê ńkyí nyǐ oo/chi* nang ké Éso o/kyé kámú ne batíí ké achi*.

¹⁸ Ben ba*da/bê ké chwǒm ńkyí ben badaman eta wǎ eringe nyí banet ḿbé Ézerel ba/bê ké kaku ńké badakó Sána* ńké ka/mû ne bumang-okwâ ne kiigbimaa-kyifip ne afú nyí aryên*

¹⁹ ne kyirime-ntán ne kyicoge-ejá*. Ké nkéré mú banet-Ézerel ba/jwo ejá ányi, ba/kpet arông etîm ba/fu, ejá ekíri e*dachîraa*

²⁰ ké ebóng, mbé ba*da/man ekám byiko ebe ké kyije ńkyí Osówo o/kye busa o/fu, â nang enyam nké e/ta kaku ánke, ba-man ba-tím kánkyí aká tete e-kpú*.

²¹ Ké ntûntû, bushî ḿbú bu/mû ányi bu/chi Músis o-raa o/fu, banê mbe ba-tím m mě, mu n-shî ng.

²² Nké ben baa/bê ké kaku ńké badakó Záyon ne ké oshê mú Osówo mú mu ne dyikpen, ányi Jerúsélem mú kyíbóng, ne égot-barím-Osówo ḿbé banong ké mǔ.

²³ Ben baa/bê ké ncibi mú bunyîn-dyityém, mú bambwôp kashú-bwǎn-Osówo ḿbé baa/sáng kámbé azîn kyíbóng. Ben baa/bê ba-kâm Osówo mú mu mpan bampan mú kángkáng banet, ne ké basun ḿbé banet ḿbé banong, ḿbé Osówo oo/chi kámbé ba-kwárê kerededet.

²⁴ Ben baa/bê ba-kâm Jisos mú o/nap ocím mú ofyîfî mú Osówo o/ryí o-sem byiko emen, ne ké baróng emen ḿbé ba/myî bě, ḿbé mbe ba-pem m ne Osówo kyi-kim ne byěm ḿbyí byinong ba-shwôm baróng ḿbé Ébel.

²⁵ Ri n̂g kâng ba/fu, ben baa*né ejá nyí onet mú mu o-raa ng*. Banet ḿbé ba/né ǎ nyǐ mú o/sét kyitwóm ńkyí Osówo nyín ké ejíí ba*da/fem*. Be kâng byi-cen n nǎ ne byi-fem, â byi/né ǎ nyǐ mú mu o-raa ng kyíbóng.

²⁶ Ejá emen e/náng esí ké nkéré ámu, nké kántîk o/ryí ocím o/fu, me n-chî ng enáng kampén kabónge, *chí esí nké nke* nké ne bubóng to.

²⁷ Ejá nyí e/fu, kampén kabónge e/tông wááng e/fu, byěm ḿbyí Osówo o/chi byi/chi byi-náng byi-bûu, eringe nyí byěm ḿbyí bii*nwa enáng* byi/chi byi-waa.

²⁸ Bâ n̂g byi-kó Osówo asǎma kâng, ké nǎ, nyǐ oo/kye bě Butu ḿbú boo*nwa enáng*. Bâ n̂g byi-kó Osówo asǎma, byi-kye ǎ to ofê ne kiǐtí-bushî ké bukwóp ḿbú buda ǎ enyîn.

²⁹ Ké ebóng, ké ntûntû, Osówo mú eten o-chi i okwâ mú odashí byěm.