Hyíburus 11 - Bokyi Bible

Dyityém efé ne Osówo

¹ Â a/fé dyityém eyên ne Osówo, ányi wo a/bángê a/fu, wo a-já ng byěm ḿbyí be byimu byi-tî ng achi, ne a/bángê to a/fu, wo a-já ng byěm ḿbyí be bii*man eri ké achi*.

² Kyi/mû ké dyityém efé ne Osówo nké banet ḿbé kpákpá ba/kwárê ké bushú ḿbú Osówo.

³ Ké bubwô-dyityém efé ne Osówo nké be byimu byi-nyît ng byi/fu, ejá-Osówo e/yip ńkyí bii*man eri ké achi* ne e-chi ńkyí byidaman eri.

⁴ Kyi/mû ké dyityém efé ne Osówo nké Ébel o/chi kyifen ńkyí kyi/nwa kyi-shwôm ńkyí Kîin o-kye Osówo. Osówo o/chi ǎ o-kwárê ké bushú emen, ké bubwô-dyityém emen ńdyí o/fé ne nyǐ, ké nǎ, Osówo oyén o/koo eyáré emen. Ké bubwô ḿbú nyǐ o/fé dyityém emen ne Osówo, nyǐ Ébel o/tôong o-pem m nang ké oo/kpú.

⁵ Kyi/mû ké dyityém efé ne Osówo nké Énok o*da/kpú*. Ba/kyé ǎ, onet nang obónge o*da ǎ eri* ké nǎ, Osówo oo/yip ǎ o-jâ kyíbóng. Ejá-Osówo nyí ba/sáng kyísí e/fu, Énok o/kwárê ké bushú ḿbú Osówo, ne Osówo o-yip ǎ o-jâ kyíbóng.

⁶ Onet o*fí mú odaman echi kyi-nyîn Osówo* â onet ámu o*da/fé dyityém ne nyǐ*. Ké ebóng, nang yeě nké mu o-bâ o-kâm Osówo, o-man o-fé dyityém ne nyǐ o/fu, Osówo mu kô, ne mu o-yárê ng banet ḿbé mbe ba-ryuu ng ǎ.

⁷ Kyi/mû ké dyityém efé ne Osówo nké Núwa o/jwo ekó nyí Osówo o/kuri ǎ kyi-kim ne byěm ḿbyí byi/chi byi-chi ké nkéré mú mu o-bâ, ḿbyí Núwa oo*man eri ké achi*. Nyǐ o/jwo ńkyí Osówo o/sét ǎ, ne o-bi ńsukyíkang mú Osówo o/nyángê ǎ ké mǔ ne kyikû-banet emen. Ké bukwóp ḿbún, nyǐ o/két mpan o-bên ejíí, ne Osówo o/kye ǎ kanong emen ńké nke ka-fím m ké dyityém efé ne Osówo.

⁸ Kyi/mû ké dyityém efé ne Osówo nké Ébarahâm o/chi ńkyí Osówo o/fu, ochi, ké nkéré mú Osówo o/kó ǎ, ne o-dim o-jâ ké oshê mú Osówo oo/ryí ocím o/fu, nyǐ o-kyâ ǎ. Nyǐ o/dim o-mîng oshê emen, kyicê ńkyí nyǐ o/mû o-wâa ng o*da/nyît*.

⁹ Kyi/mû ké dyityém efé ne Osówo nké nyǐ o/kyú wǎ nyǐ o-chi i ocinónet ké oshê ámu mú Osówo o/ryí ǎ ocím. Nyǐ o/mû o-kyú u ké bampyep ḿbé badachi ké kyídí ne Ázik ne Jekôp ḿbé ba/ryí bukyû-ocím mú Osówo o/ryí Ébarahâm.

¹⁰ Ké ebóng, Ébarahâm o/mû o-bám m o/fu, oshê mú Osówo oo/kabe ne o-bi, obâ, mú mu ne ekpe nyí edawaa ne banyá.

¹¹ Kyi/mû ké dyityém efé ne Osówo nké Ébarahâm o/chîman efiri bonchí-wǎn nang ké nyǐ o/mû oo/kâa o-shwôm, ne Sirá to o/mû bukwom. Nyǐ o/bángê o/fu, Osówo o-tî ng ocím emen mú o/ryí.

¹² Ké bubwô-onyinchéng mún obónge, nang ké o/mû oo/jang ekâa o-shwôm, nké kyikû-banet emen kii/jê něen wǎ ékpére nyí nyi kyíbóng ne wǎ éshíshě nyí nyi ké bukô-baya.

¹³ Kyi/mû ké dyishí ńdyí dyityém efé ne Osówo nké banet ḿbén kángkáng ba/kpú. Mbé ba*da/koo byěm ḿbyí Osówo o/mû o/ryí ocím*. Nké mbé ba/waa kyikû ké esim ba-nyît kyi-kim ne mbyí, ne byi-nyîn kámbé, ne mbé ba-bángê wááng ba/fu, mbé ba-chi i bacinbánet ne banet ḿbé ba*fí to ne oshê*.

¹⁴ Banet ḿbé mbe ba-raa ng azong-byěm ányi mbe ba-tông ng wááng ba/fu, mbé mbe ba-kyé ng oshê mú ebe.

¹⁵ Mbé ba*da/chîzîim kyi-kim ne oshê mú mbé ba/dim ba-mîng*. Â ba/mû ba/zîim, ba/mû ba-já ng mpât mú badabwa esim ké mǔ.

¹⁶ Nké mbé ba/mû mbe ba-ryuu ng oshê mú o/nwa o-shwôm, ányi mú kyíbóng. Ké bubwô ámbu kâng, éshwân e*fí e-chi i Osówo* â mbé mbe ba-kó ng ǎ ba/fu, nyǐ o-chi i Osówo ebe* ké ebóng, nyǐ oo/nap oshê o-tî kámbé.

¹⁷ Kyi/mû ké dyityém efé ne Osówo nké Ébarahâm o/yip wǎn emen o-chi kyifen o-kye Osówo ké nkéré Osówo o/kan ǎ. Ébarahâm nké o/mû onet mú Osówo o/ryí ǎ ocím. Nké nyǐ o/mû oo/kpá byiko ḿbyí odayip ncen-wǎn emen o-kye Osówo wǎ kyifen echi.

¹⁸ Osówo o/mû oo/sét ǎ o/fu, ké bubwô-Ázik nké wo a/chi a-já banet ké kyikû eyên.

¹⁹ Ébarahâm o/kabe o/fu, Osówo o-man n ejwóbê Ázik ké bukyû. Nké â a/kabe, Ébarahâm o/chîkoo Ázik mú o/fím ké bukyû.

²⁰ Kyi/mû ké dyityém efé ne Osówo nké Ázik o/jware Jekôp ne Éso o/fu, Osówo o/chi o-jware kámbé ké nkéré mú mu o-bâ ké kashú.

²¹ Kyi/mû ké dyityém efé ne Osówo nké Jekôp o/jware bwǎn-Josêf ké obónge ké obónge, ne nyǐ o-kûkpú. Nyǐ o/jêem ké dyishí-ochí-bucen emen o-fé Osówo.

²² Kyi/mû ké dyityém efé ne Osówo nké Josêf ké nkéré mu o-kpú u, o/raa kyi-kim ne obyî mú banet-Ézerel ba/chi ba-byí ba-mîng Éjip, ne o-sét kámbé eringe nyí badachi ne kyikwóm-enyam-byiko emen.

²³ Kyi/mû ké dyityém efé ne Osówo nké bonchí ne boné-Músis ba/rôo Músis ké etukáku echât ńdyí ba/fwon ǎ. Mbé ba/mû ba*fí ba-shî ng kyije ńkyí otu* ké ebóng, mbé ba/ri ba/fu, Músis o/mû wǎn mú mu o-nwa ng bunong.

²⁴ Kyi/mû ké dyityém efé ne Osówo nké Músis ké nkéré oo/kán, o/fu, ba*da ǎ echîkó ba/fu, nyǐ o-chi i wǎn mú wǎn-onyinyi mú otu mú Éjip*.

²⁵ Nyǐ ńkyí odari busông ne banet ḿbé Osówo kyi-nyîn n ǎ kyi-shwôm ńkyí odakyú ké bunyîn-dyityém ḿbú byibî ké kaǎnyín-nkéré.

²⁶ Nyǐ o/bángê o/fu, éshwân ekoo ké dyishí ńdyí onet mú Osówo o/kúng ǎ butu e/nwa kampén kampén e-shwôm kángkáng esang nyí Éjip, ké ebóng, nyǐ o/tî achi emen ké eyáré nyí nyi e-bâ ké kashú.

²⁷ Kyi/mû ké dyityém efé ne Osówo nké Músis o/mîng Éjip, o*da/shî kafâ esa ńké otu mú Éjip*. O*da/man ebwa esim* éné wǎ o/ri Osówo mú baa*ri ǎ*.

²⁸ Kyi/mû ké dyityém efé ne Osówo nké nyǐ o/tî dyijî-kyifen ńkyí Shwôm, ne o-kye busa o/fu, bamyî baróng ké afyi, eringe Orím-Bukyû mú onong oo*ju bambwôp kashú-bwǎn-banyinchéng ḿbé banet-Ézerel*.

²⁹ Kyi/mû ké dyityém efé ne Osówo nké banet-Ézerel ba/man enyáng baya ḿbé badakó Rêt, éné wǎ ba/cen ké esí nyí yéyé. Ké nkéré banet-Éjip ba/kan ba/fu, mbé ba-nyáng ng to, mbé kángkáng ba/jé ké baya ámbe.

³⁰ Kyi/mû ké dyityém efé ne Osówo nké ekpe nyí ba/bi ba-wáp Jéríku e/myii kyísí ké nkéré banet-Ézerel baa/cen ba-wáp kányí ké ací káchâtkányi.

³¹ Kyi/mû ké dyityém efé ne Osówo nké Ráhap mú o/mû o-ryí i akpara o*da/kpú ne banet ḿbé ba/né echi ńkyí Osówo o/fu, bachi* ké ebóng, nyǐ o/koo banet-boǒfêp-esí ḿbé Ézerel kanong kanong.

³² N-chîraa n-ca kashú dí. Nkéré o*da mě ejê* mú ndaraa kyi-kim ne Gyídyon ne Bérek ne Sámsin ne Jéfata ne Otu Dívit ne Sámwel ne bamkpábé ḿbé badasét byiraa-Osówo*.

³³ Ké bubwô-dyityém efé ne Osówo, mbé ba/nwa ne byirim-eshê ba-kpógê. Mbé ba/koo ńkyí Osówo o/ryí ocím, ké ebóng, mbé ba/chi ńkyí kyi/kwárê. Mbé ba/cít ecím nyí ekpang,

³⁴ ba-rîp byibî-ekwâ, ba-fem to bukyû ḿbú ba/mû ba/chi ba-ju kámbé ké bushwám. Mbé ba/mû ba*fí shwaneshwane* nké ba/yángê ba-firi shwaneshwane. Mbé ba/mû ne busa ké byití ne ba/kpógê bannwa byití ḿbé bacinbánet.

³⁵ Ké bubwô-dyityém efé ne Osówo, banyinyi ba/koo banet ebe ḿbé Osówo o/jwóbê kámbé ké bukyû. Bakíri ḿbé ba/né ké byiko ebe ekyú ba/kpú ké busông ḿbú boo*nwa kafwa efé* eringe nyí Osówo odajwóbê kámbé o-tî ké dyikpen ńdyí dyi/nwa dyi-shwôm.

³⁶ Kyicê-banet ba/fát kámbé kiikuku, ba-mín kámbé. Bakíri ba-bwá kámbé ba-fé ké mgbokobá.

³⁷ Ba-tím kámbé aká, ba-ját kámbé byicê byifee. Ba-ju kámbé ké bushwám. Mbé ba/cen kángkáng byikit ne ekwop-ebû ké byiko wǎ byídí ne kyikpu ké byiko. Ba-kye kámbé busông, ba-bên to dyityém ne mbé.

³⁸ Ejíí e/mû e*da/kwárê nyí mbé badakyú ké nyǐ*. Mbé ba/yêe ké byikim-akán ne ké eku, ba-kyú u ké bacim ne ké bambwo wǎ banet ḿbé ba/chêe byití.

³⁹ Ḿbén kángkáng kâng, nang ké baa/kpee kámbé ké atyém ebe nyí ba/fé ne Osówo, mbé ba*da/koo ńkyí Osówo o/mû o/ryí ocím*.

⁴⁰ Ké ebóng, Osówo oo/nap okabe mú o/nwa o-shwôm o-tî bě o/fu, â be byi*fí* mbé baa*ba/chi ba-kwárê ké bushú ḿbú emen*.