Hyíburus 10 - Bokyi Bible

¹ Byije-Músis byi*da/kwárê* ne byi*da/bwom wǎ bachíchí-byěm*. Mbyí mbyi wǎ biǐríribí-byěm ḿbyí byinong ḿbyí byi/chi byi-bâ. Kángkáng nkéré, dyije ne dyije, mbe ba-chi i azong-byifen-Osówo abónge. Byije-Músis byi-cen n nǎ kâng ké bukwóp ḿbú byifen-Osówo echi ḿbyín ne byi-chi banet ḿbé mbe ba-bâ ba-kâm Osówo ba-kwárê kerededet.

² Â ba/mû baa/chi banet ḿbé mbe ba-fâ Osówo ba-cé kpárám ké ntûntû ké byibî ebe, mbé ba/mû baa*ba/chi ba-chîkabe ba/fu, mbé ba/chi byibî* ne byifen-Osówo echi byi/mû byi-man n.

³ Nké eringe nkyi něen kâng, byifen-Osówo echi mbyi byi-chi i banet ba-zîim byibî ebe ké dyije ké dyije.

⁴ Ké ebóng, baróng ḿbé batyép-bampong ne ḿbé etúbû baa*man efîm byibî*.

⁵ Ké bubwô ḿbún, ké nkéré mú Karâs o-kú o-bâ ebê ké ejíí, nyǐ o/raa ne Osówo o/fu, wo a*fí a-ryuu ng a/fu, bakûchi byifen ba-kyâ ǒ* nang eyáré ekye*. Nké wo aa/chi enyam-byiko a-tî mě me.

⁶ Wo kyi*fí kyi-nyîn n ǒ ńkyí mbe ba-shí i byirim-byitú byimúmú ké kyikit-kyifen eyên echi* nang byifen echi ḿbyí byidafîm byibî*.

⁷ Ne me kâng n-raa n/fu, dǐi me něen i, ǎ Osówo, mú ndachi ńkyí amu a-ryuu ng a/fu, me nchi, wǎ eringe nyí ba/sáng kyi-kim ne me ké ejá-Osówo nyí ba/sáng kyísí.

⁸ Ké mbwôp kashú, Karâs o/raa o/fu, wo a*fí a-ryuu ng a/fu, bakûchi byifen ba-kyâ ǒ* nang eyáré ekye* nang byirim-byitú eshí ké kyikit-kyifen eyên echi* nang byifen to echi ḿbyí byidafîm byibî*. Nyǐ o/raa ńkyín nang ké mbe ba-chi i byifen ḿbyín něen kángkáng wǎ eringe nyí Byije-Músis byi/fu.

⁹ Ne nyǐ o-fu kâng o/fu, dǐi me něen i, ǎ Osówo, mú ndachi ńkyí amu a-ryuu ng a/fu, me nchi. Ne Osówo kâng o-mîng abwô ké kángkáng byifen ḿbyí kpákpá echi. Ne o-kúng kyifen ńkyí Karâs o-tî o/fu, nkyí nké kyi/kwárê.

¹⁰ Ké Jisos Karâs kâng o/chi ńkyí Osówo o/mû o-ryuu ng o/fu, nyǐ ochi, be kángkáng nyǐ oo/soo bě byi-cé kpárám ké byibî eten, ké bubwô-enyam-byiko emen nyǐ oyén nyí o/kúng o-kye Osówo kampén kabónge kyi-man to éné.

¹¹ Nchi kyifen-Osówo mú banet-Jûs nang orá o-bwom m o-chi bǎmkpóngé emen kángkáng dyicí ne o-chi to azong-byifen-Osówo abónge kampén kampén. Nké byifen-Osówo ḿbyín bii*ba/chi byi-man efîm byibî*.

¹² Karâs kâng o/chi kyifen-Osówo kyibónge ké bubwô ḿbú byibî, kyifen ńkyí kyi/chi kyi-waa kanong ne banyá ne banyá, ne Karâs o-kyú kâng me ké kyicê ńkyí bubwô-etyebéng-Osówo.

¹³ Ányi nké nyǐ kántîk mu o-bám m tete Osówo o-ren ǎ banet-bushwôn emen kyísí o-cím kámbé byiká.

¹⁴ Ké kyifen-Osówo kyibónge kâng ńkyí nyǐ o/chi, nyǐ oo/chi banet ḿbé nyǐ o/soo kámbé byibî ba-kwárê kerededet ne banyá ne banyá.

¹⁵ Ne Busun-Osówo to bu/sét bě ḿbyín něen bu/fu. Ké mbwôp kashú, bu/raa bu/fu,

¹⁶ Otu Kyítá o/fu, nyín něen ocím mú n/chi n-ryí ne mbé n-sem byiko ejí ké ací ányi nyí nyi a-bâ. Me n/chi n-fé byije ejí ké atyém ebe, ne n-sáng to kámbyí ké atyém ebe.

¹⁷ Ne bu-chîraa kâng bu/fu, Otu Kyítá o/fu, mm*ba/chi n-chîzîim nang kabónge kyi-kim ne byibî ebe* ne byibî-byěm ḿbyí mbe ba-chi i*.

¹⁸ Ké nkéré mú Osówo oo/pwoo banet ḿbén byibî ḿbyín kâng, Osówo oo*ryuu to kyifen ńkyí badachi ba/fu, nyǐ ofîm banet byibî*.

Bâ n̂g byi-kâm Osówo Fáráng

¹⁹ Be kâng, ǎ bwǎn-ńnâ, ké bubwô-baróng ḿbé Jisos, byi/firi ne bukwóp nang burá ḿbú byidanung ké ochíchí-nfût-ociring.

²⁰ Nyǐ o/bâa bě bukwóp ḿbú bufyîfî, ḿbú mbu bukpó, ḿbú byidashwôm ké ékpígí ányi, ányi bukwóp ḿbú enyam-byiko emen.

²¹ Be byimu ne kiǐtí-nchi kyifen-Osówo mú mu onet-dyishí-kyikû-banet ńkyí Osówo.

²² Bâ n̂g byi-kâm Osówo fáráng kâng ne atyém nyí ntûntû nyí byi/fé ne Osówo kanong kanong, ne atyém nyí Osówo oo/fîm byibî-okabe, ne oo/chi kányí a-cé, ne enyam-byiko nyí baa/soo kányí ké omu mú cángénéné.

²³ Bâ n̂g kâng byi-bwom kíngkíng ké achi eten etî wǎ eringe nyí byimu byi-sét ng, ké nǎ, byi-man n ebángê ne Osówo byi/fu, nyǐ o/tî ocím emen mú o/ryí.

²⁴ Bâ n̂g byi-kûkérê kyi-kim ne barî-banet, byi-kûchwáp barî, byi-tông ng barî kyijé ne byi-chi i kanong ne barî.

²⁵ Byi*dachîmîng ncibi eten mú byimu byi-cibi ng kyikit kyibónge mú o/firi bě wǎ édúú* wǎ eringe kyicê-banet kii/mîng*. Nké bâ n̂g byi-fé barî busa bu-bwa bu-jê bu-shwôm, ké nǎ, ben bamu ba-ri ng ba/fu, dyicí ńdyí Otu Kyítá ndyi dyi-fárâng ng dyi-bâ.

²⁶ Ké ebóng, kyifen-Osówo kyi*fí to nang kyibónge ńkyí kyidafîm byibî* â byimu byi-tigi ng otigíng byi-chi i byibî byi-câ kashú ne ntûntû mú baa/chi bě byi-nyît*.

²⁷ Nké byikûshî ńkyí kyi/chi kyi-chi. Osówo o/chi o-pan bě mpan, ne o-shí banet-bushwôn emen ké kiǐtí-okwâ.

²⁸ Nang yeě mú o*da/tî Byije-Músis* ké ejá-mpan nyí bantûesé ashí afee nang ashí achât ba/sét* ba-két ng mpan o-bên ǎ, ba-ju ǎ, nang bafip baa*ri ǎ*.

²⁹ Osówo o-chi i ebóng kâng ne onet mú mu o-shú u Wǎn-Osówo, o-kúng ng to baróng ḿbé ocím mú Osówo o/ryí o-sem byiko emen, ḿbé ba/soo ǎ byibî wǎ kaǎdángé-chwǒm, ne mu o-kyâ to Busun-Osówo ḿbú bu/tông ǎ kanong emen edángé. Kabe kpá a-ri, busông bu/jê ḿbú bu/chi bu-kwárê ne dyizong-onet ándyi.

³⁰ Ké nǎ, be byimu byi-zîim m ńkyí Otu Kyítá o/fu, o/fu, me n/chi n-só ewa, ne me n/chi n-ré dyifwá. Ne o-chîraa o/fu, me n/chi m-pan banet ejí mpan.

³¹ Nkyi kyibî-chwǒm kanong kanong ńkyí adafene ké abwô nyí Osówo mú mu ne dyikpen.

³² Kû n̂g ezîim eringe kyi/mû ne ben ké nkéré mú o/shwôm ké esim. Ben ba/ri busông ké byěm chwóó, ányi Osówo oo/tông běn kiinwángé emen. Nké bunwa ámbu bu*da běn ekpógê*.

³³ Ba/kye běn edángé wááng nkéré okíri, ba-chi běn to byibî-byěm, ne ké nkéré okíri ben ba/mû baa/kpá byiko ḿbyí badacibi ne banet ḿbé mbe ba-tî ng kámbé ké dyizong-bukwóp ḿbún.

³⁴ Ben ba/ri busông ne banet ḿbé mbe ké mgbokobá, ne ba/kyú ké bunyîn-dyityém ké nkéré ba/bam byěm enen kángkáng ba-koo, ké ebóng, ben ba/mû ba-nyît ng ba/fu, ben ba/tôong ne byěm ḿbyí byi/nwa byi-shwôm, ḿbyí byidawaa ne banyá ne banyá.

³⁵ *Da n̂g emîng dyityém enen ecíp kâng* ké ebóng, ndyí ndyi dyi-bâ ne eyáré nyí eryên.

³⁶ Ba-man ba-kyú dyityém chee, eringe badachi ńkyí Osówo mu o-ryuu ng, ne ba-koo ńkyí nyǐ o/ryí ocím.

³⁷ Ké nǎ, wǎ eringe ejá-Osówo nyí ba/sáng kyísí e/fu, ké kaǎnyín-nkéré ńké ka/waa, nyǐ mú mu o-bâ o/chi o-bâ, nyǐ oo*ba/chi o-bên nkéré*.

³⁸ Nké banet ejí ḿbé ba/kwárê ké bushú ejí, ké bubwô ḿbú ba/bángê ne me, ba/chi ba-kpen. Nké â nang onet obónge ké burwám ebe o/bírî mě esim, kii*ba/chi kyi-nyîn mě ne nyǐ*.

³⁹ Be bii*chi banet ḿbé mbe ba-bírî ng Osówo esim ne o-ju kámbé*. Nké be byi/fé dyityém ne Osówo, ne bii/kpen.