Hyíburus 1 - Bokyi Bible

Byiraa-Osówo byi/cen ké Bubwô-Wǎn-Osówo

¹ Ké nkéré mú o/shwôm ké esim, Osówo o/sét bamkpábé ḿbé badasét byiraa emen ba-sét banchí eten ḿbé kpákpá kyi-kim ne Bǎmpém ḿbé Banong kampén chwóó ne ké azong-akwóp chwóó to.

² Nké ké ací ńnyín nyí a/ryí esim, nyǐ oo/sét Wǎn emen o-sét bě ké bubwô emen. Nyǐ nké mu onet mú Osówo o/chi ejíí ké bubwô emen. Nyǐ nké Osówo oo/fîm ǎ o/fu, kángkáng byěm byifiri ḿbyí emen ké nkuli kyikû.

³ Nyǐ mu o-san n ne busan ḿbú Osówo ḿbú ragerage. Nyǐ mu kerededet wǎ Osówo oyén. Nyǐ to nké mu o-níbî ng ejíí ké ejá emen nyí nyi ne busa. Ńdyí nyǐ oo/chi banet ba-cé ké byibî ebe, nyǐ o/kyú me kyíbóng ké kyicê-bubwô-etyebéng-Osówo mú o/rêe o-shwôm.

Wǎn-Osówo o/rêe o-shwôm Barím ḿbé Banong

⁴ Osówo o/chi Wǎn emen o-rêe o-shwôm barím ḿbé banong wǎ eringe nyí dyizîn ńdyí Osówo o/fé ǎ dyi/rêe dyi-shwôm ńdyí ebe.

⁵ Ké ebóng, Osówo o*da/raa ne orím emen mú onong nang obónge o/fu, wo a-chi i Wǎn ejí* kurún, me n/firi Bonchí eyên*. O-bwa o-raa nang ne orím mú onong nang obónge o/fu, me n/chi n-firi Bonchí emen* ne nyǐ o/chi o-firi Wǎn ejí*.

⁶ Ké nkéré Osówo o/mû o-kú o-bâ etwóm ókpá emen mú onyinchéng o-bâ ké ejíí, nyǐ o/raa to o/fu, kángkáng barím ejí ḿbé banong ba-man ba-kye ǎ ofê.

⁷ Nyín něen ńkyí Osówo o/raa kyi-kim ne barím ḿbé banong o/fu, me mu n-chi i barím ejí ḿbé banong wǎ afú, ne bǎmgbán ejí wǎ bumang-okwâ.

⁸ Kyi-kim kâng ne Wǎn emen, Osówo o/bwa o-fu, kakyúng-butu eyên, ǎ Osówo, ka/chi ka-waa ne banyá ne banyá. Wo amu a-níbî ng butu eyên ké bukwóp ḿbú bunong.

⁹ Wo kanong echi nké kada ǒ enyîn. Ńkyí kyi*fí ntûntû* kii*nyîn ǒ*. Nkyí nké me mú mu Osówo eyên n/cá ǒ, ne n-kye ǒ bunyîn-dyityém ḿbú ofê bu-jê kanong kanong bu-shwôm ḿbú n/kye bánen.

¹⁰ Osówo o/raa to o/fu, wo Otu Kyítá ké kiimkpet kyikû, a/chi ejíí, ne ké abwô nyí eyên wo oyén a/chi to bubóng.

¹¹ Mbyí kángkáng byi/chi byi-rím, nké wo a/chi a-waa. Mbyí kángkáng byi/chi byi-kâa wǎ byídí.

¹² Wo a/chi a-fút kámbyí wǎ ágbádá, ne mbyí a/chi a-yángê kámbyí wǎ byídí. Nké wo kángkáng nkéré amu eringe ebónge, ne wo aa*ba/chi a-kâa ne banyá*.

¹³ Osówo o*da/tigi o-raa ne orím emen mú onong nang obónge o/fu, kyú nyín ké kyicê-bubwô-etyebéng ejí* tete n-ren banet-bushwôn eyên kyísí a-cím kámbé byiká*.

¹⁴ Barím ḿbé banong kâng ányi ebóng. Mbé ashí kángkáng ányi basun ḿbé mbe ba-chi i bǎmkpóngé ḿbé Osówo, ne Osówo to mu o-twóm m kámbé o/fu, bada-chwáp banet ḿbé ba/chi ba-koo onyii emen.