Hozáya 9 - Bokyi Bible

Hozáya o/sét Busông ḿbú Óburúkpâbí o/chi o-kye Banet-Ézerel

¹ Banet ḿbé Ézerel, mîng n̂g ajî-byifen enen echi wǎ banshâng bakye. Ben baa/bírî Osówo enen esim ne ba*da/fé dyityém ne nyǐ*. Ké esí enen emúmú, ben baa/kúng byiko enen ba-shee orím-bukye-Bâl wǎ banet-akpara, ne byiryíng ḿbyí ben ba/kabe ba/fu, o/kpê běn mbyi byi-jê ng běn.

² Nké kii/waa kaǎnyín, ben baa*já to byiryíng ne bakút-ólif ḿbyí byida běn ekwárê* nang bato to baa*kyú to*.

³ Banet ḿbé Ézerel baa*ba/chi ba-waa ké esí nyí Óburúkpâbí*. Ba/chi ba-bwa esim ké Éjip, ne ba/chi ba-ryí byiryíng-ociring ké Asyírya.

⁴ Ké esí-bacinbánet ányi, mbé baa*ba/chi ba-man eyip bato ba-chi kyifen ba-kye Óburúkpâbí* nang byifen baa*ba/chi ba-man echi ba-kye ǎ*. Byiryíng ebe byi/chi byi-bên, nang yeě o/ryí kámbyí wǎ byiryíng ḿbyí banet badaryí ké ajî-bukyû echi. Ba/chi ba-ryí byiryíng ámbyi eringe esong ee*nwa kámbé nké nke*. Byi*fí nang byibónge* ḿbyí ba/chi ba-kúng kámbyí ba-ca ne mbyí ké kiǐtí-kyise-kyifen echi ńkyí Óburúkpâbí*.

⁵ Ne â nkéré oo/fyi mú badachi ajî-byifen ḿbyí ofê mú Óburúkpâbí, mbé ba-chi i ebóng ké nkéré ámu.

⁶ Ké nkéré mú afaníkong aa/bê, banet ba-pwôo byiryibyiryi, banet ḿbé Éjip ba/chi ba-kúng kámbé ba-tî kyikit kyibónge, ba-kúng kámbé eringe nyí ba/chi ba-ryii kámbé ké Mémfyis, mú dyityém-oshê ebe. Byěm ebe ḿbyí ba/chi ké syílyíba ne byikit ḿbyí ba/mû ba/bi byise ebe byi/chi byi-kán byichí-byiwong.

⁷ Nkéré mú busông ekye oo/fyi, nkéré mú banet ba/chi ba-koo busông ḿbú bu/kwárê ne mbé. Ké nkéré mú ńkyín kii/chi, Ézerel e/chi e-nyît kyi-kim ne nkyí. Ben bamu ba-sét ng ba/fu, mkpábé mú odasét byiraa-Osówo mún mu enyam. Ba-fu to, onyinchéng mún mú oo/koo byiraa ne Óburúkpâbí mu o-fún n. Me mu n-sa ng běn kafâ chwóó, ké nǎ, kyibî enen kyi/jang ejap kiǐtí.

⁸ Osówo oo/twóm mě wǎ mkpábé mú odasét byiraa emen o/fu, me mba-kuri banet emen ḿbé Ézerel ekó. Nké nang nyá nké n/wâa, ben bamu ba-ryuu ng ba/fu, ba-kám m mě wǎ kanurung. Ké ochíchí-esí nyí Osówo, banet-Ézerel bayén mbe ba-shwôn n ne mkpábé mú emen.

⁹ Byěm ḿbyí mbe ba-chi i byi/bên kanong kanong, wǎ eringe nyí ba/mû ké Gyíbya. Osówo o/chi o-zîim kyibî ebe, o-kye kámbé busông ké nkyí.

Kyibî ńkyí Ézerel ne Busông ḿbú kyi/chi kyi-bâ ne Mbú

¹⁰ Óburúkpâbí o/raa o/fu, ké nkéré mú m/bwóp kashú n-ri oshê mú Ézerel, kyi/mû wǎ eringe nyí onet odakyé byirim-byichí ké kyikim-dyikán. Ké nkéré mú n/ri banchí enen ḿbé kpákpá ké mbwôp kashú, kyi/mû wǎ nkéré mú onet odari bambwôp kashú-byirim-byichí ḿbyí byidajang enwa. Nké ké nkéré mú mbé ba/bê ké kaku ńké Pôo, mbé ba/kpet Bâl ofê ekye, ne ka*da/bwon ne ba-kpet mě enut* wǎ erím-bakye nyí nyi e-jê ng kámbé.

¹¹ Kiǐtí-dyizîn ńdyí Ézerel dyi/chi dyi-byí dyi-jâ wǎ kanurung, ne baa*ba/chi ba-chîfwon bwǎn ba-kye kámbé*. Banyinyi baa*koo to afít* bwǎn baa*nung to banyinyi ké afít*.

¹² Nké nang ba-bwa ba-fwon bwǎn, n/chi n-kúng bwǎn ámbe ké abwô ebe, mm*mîng nang obónge o-waa okpó*. Â n/né banet ḿbén, biinkaa byiko-byěm byi/chi byi-chi kámbé.

¹³ Hozáya o/fu, Óburúkpâbí, me mu n-ri ng ké [mbe ba-kám m] bwǎn ebe ba-ju ng.

¹⁴ Ebóng chwǒm ńkyí n/chi n-fu ǒ a-chi banet ḿbén. Chi afít nyí banyi ebe ba/koo a-byí. Chi kámbé baa*man to enen bwǎn ebe*.

Óburúkpâbí o/két Mpan o-bên Banet ḿbé Ézerel

¹⁵ Óburúkpâbí o/raa o/fu, kángkáng byibî-byěm ebe ḿbyí ba/kpet echi, byi/kpet ké Gyígal. Ányi nké ba/kpet mě kafâ esa. Ne ké bubwô ḿbú kyibî ńkyí baa/chi, me n/chi n-ró kámbé ké esí ejí. Baa*ba/chi ba-chî mě ejê*. Kángkáng banet-ashí ebe baa/bírî bunwa ne me.

¹⁶ Banet ḿbé Ézerel mbe wǎ kyichí ńkyí eriri emen ee/jwóm, ńkyí kii*man to ezím byirim*. Mbé baa*ba/chi ba-fwon bwǎn*. Nké nang ba-bwa ba-fwon, me n/chi n-ju bwǎn-dyityém ebe.

Hozáya o/raa kyi-kim ne Ézerel

¹⁷ Hozáya o/fu, Osówo mú me mu n-fâ ǎ o/chi o-né banet emen, ké nǎ, mbé ba*da/fwôo atông ba-jwo ǎ*. Mbé ba/chi ba-firi banet ḿbé badacen ba-yêe ng ké eshê-banet.