Hozáya 8 - Bokyi Bible

Óburúkpâbí o/bîn Banet ḿbé Ézerel ké Bakye ḿbé mbe ba-sháng ng

¹ Óburúkpâbí o/raa ne me o/fu, wonge agurubí. Banet-bushwôn mbe ba-tíngê e ba-bâ kyísí ké esí ejí wǎ biinkwa. Banet ejí baa/bên ocím mú n/ryí ne mbé, ne baa/né ejwo ńkyí n/tángê kámbé.

² Nang ké mbe ba-kó ng mě ba/fu, me n-chi i Osówo ebe, ba-sét ng mě ba/fu, mbé ba-chi i banet ejí ḿbé mbe ba-nyît ng mě,

³ mbé baa/né ńkyí nkyi kanong. Ké bubwô ḿbún, banet-bushwôn ebe ba/chi ba-rim bunwa ne mbé ké kyikû.

⁴ Banet ejí ba/kúng batu, nké ba/chi kánkyí ké kakim ebe. Ba/fîm banet-ashí ba*da mě ebí*. Ba/kúng syílyíba ne gûl ebe ba-chi erím-bakye nyí e/chi e-ju kámbé mbé bayén.

⁵ Otyép-mpong mú ba/mee ké gûl, mú banet ḿbé oshê mú Samérya mbe ba-kyâ kámú ofê, mu o-sa ng mě kafâ. Kafâ nke ka-sa ng mě ne mbé. Ka-rí i nǎ ne mbé ba-mîng bakye ebe esháng.

⁶ Nsîm byěm mú Ézerel nké o/sím orím-bukye, nké orím-bukye ámu oo*chi Osówo*. Ba/chi ba-sé mpong rugirugi mú ba/mee ké gûl, mú banet ḿbé Samérya mbe ba-kyâ kámú ofê.

⁷ Â mbé ba/kwón byěm ké kyikit ńkyí nkyi kafâ dyikáá wǎ bufú, ba/chi ba-fuu kyibî-chwǒm wǎ afú nyí aryên. Kyifát-esang-byichí ńkyí kii*kán esang* kii*man echi berêt nang obónge*. Â nang kyi/bwa kyi-kán esang, bacinbánet nké ba/chi ba-ryí kányí.

⁸ Ézerel e/firi wǎ oshê nang orá, ne e*da/byí chwǒm* wǎ katí ńké kaa/sêe.

⁹ Banet ḿbé Ézerel mbe ba-shwane e ashí wǎ boonyam-atû-dyikán, ba-cen n ba-câ biǐfáng ḿbyí ebe. Mbé baa/dim ba-ca ba-da-bí Asyírya ba/fu, achwáp kámbé, ne baa/kye eshê ekíri akpuga ba/fu, echwáp e-ku kámbé.

¹⁰ Nké kántîk, n-kú m-bâ ekpaa kámbé n-tî kyikit kyibónge, n-kye kámbé busông. Kaa*bwon to ne ba-kpet ebínê kyísí* ké nkéré mú otu Asyírya o-kú o-kyâ kámbé busông*.

¹¹ Â banet ḿbé Ézerel ba/fu, mbé ba-bi ng byikit-kyifen echi chwóó ḿbyí badafîm byibî, ányi mbe ba-já ng ojáng byikit chwóó ḿbyí badachi byibî.

¹² Me n/sáng bujê-byěm kyísí ḿbyí n/fu, batángê banet ḿbé Ézerel, nké mbé ba/né kámbyí wǎ byěm ḿbyí ba*da/ri ne* ḿbyí byi/fím kyíjí. [

¹³ Mbé mbe ba-chi i byifen ba-kyâ mě, ba-kúng ng enyam-byifen ányi ba-ryí i.] Nké me Óburúkpâbí kyi*fí kyi-nyîn n mě ne mbé* ne kántîk, n/chi n-zîim kyibî ebe n-kye kámbé busông ké nkyí. N/chi n-twóm kámbé ba-bwa esim ké Éjip.

¹⁴ Banet ḿbé Ézerel baa/bi byibám-batu, nké mbé baa/né onet mú o/chi kámbé. Banet ḿbé Júda baa/bi eshê nyí ba/tî byikit-mbâm. Nké me n/chi n-twóm okwâ mú o/chi o-shí byibám-batu ebe ne eshê ebe.