Hozáya 7 - Bokyi Bible

¹ Nang nkéré orá nké mu n-ryuu ng n/fu, n-chi i banet ejí ḿbé Ézerel ba-nyange, ba-chîkpet ejá byěm, kángkáng ńkyí ndari kyi*da/shwôm dyityém ebe ebên* ne byibî-byěm ḿbyí mbe ba-chi i*. Ba-ryí i barî bampún, ba-sé ng byise ba-nung ng ba-wuri ng byěm. Ba-jii ng banet byěm ké byiká-oshê.

² Kyi*da/nung ne kámbé ké dyishí ba/fu, me n/chi n-zîim kángkáng byibî ḿbyín*. Nké byibî ebe mbyi byi-wáp ng kámbé byi-fâ ké otyém, ne â n/tún kámbé, n-ri ng byibî byíbi.

Ba/nam Kyibî ne Otu ké Kyibám-Butu

³ Óburúkpâbí o/raa o/fu, banet mbe ba-nîm m otu ne banet-ashí-bǎmkpóngé emen ké byibî-byěm ebe ḿbyí mbe ba-nam m.

⁴ Mbé kángkáng ba-chi i bannîm banet ne ba*fí ne ofê*. Kafâ esa ebe ne banet nke ka-sóng ng wǎ okwâ mú badachi berêt, mú baa*wóngê kámú* tete nkéré o-fyi mú badatwôom berêt ké mǔ.

⁵ Ké dyicí ńkyí otu odachi dyijî, ba/chi otu ne banet-ashí emen ba-jwáp bato ba-kpet ebwóm, ba-róng enyam.

⁶ Mbé [ba/mang] wǎ okwâ mú nchi berêt ké byibî-byěm ebe ḿbyí mbe ba-nam m. Ké buchú bumúmú, kafâ esa ebe ka/mû ka-sóng ng, ké dyicófóróng, ka-koo bumang-okwâ.

⁷ Ké nkéré mú kafâ ka-kú ka-sa ng kámbé, ba-kám batu ebe ba-ju. Baa/ju batu ebe ké obónge ké obónge, nké onet o*fí mú mu o-fâ nshwam o-kyâ mě o/fu, me nnyii kámbé*.

Ézerel ne Eshê nyí e/fárâng Kámbé

⁸ Óburúkpâbí o/raa o/fu, banet ḿbé Ézerel mbe degedege wǎ kyirim-berêt ńkyí kyi*da/bí kanong*. Mbé mbe ba-jêem m esim ne eshê nyí e/fárâng kámbé,

⁹ ne ba*fí ba-nyît ng ba/fu, esim ejêem ńkyín ne bacinbánet ee/koo kámbé busa*. Ací ebe aa/fárâng, nké nang onyît ónyit ba*fí ba-nyît ng*.

¹⁰ Byiko etông ḿbyí banet-Ézerel mbyi byi-tii ng kámbé bukyû ké byiko. Nang ké kángkáng byěm ámbyi bii/chi kámbé, mbé ba*da/bwa ne esim ba-kâm mě me mú Óburúkpâbí mú Osówo ebe*.

¹¹ Ézerel nyi e-yêe ng wǎ kanurung ńké ka*fí ne dyishí*. Ké mbwôp kashú, banet emen mbe ba-kó ng Éjip ba/fu, echwáp kámbé, ké nnyinyěng, ba-zóngê ba-kâm Asyírya.

¹² Nké n/chi m-paam kaǎsém n-kám kámbé wǎ bunurung ké nkéré ba-kú ba-shwôm m. N/chi n-kye kámbé busông ké [byibî ḿbyí baa/chi.]

¹³ Mbé ba/firi ké busông. Mbé baa/mîng mě, ba-bwom bunwa ne me. N/chi n-ju kámbé. Me m/mû mu n-ryuu ng n/fu, n-nyii ng kámbé, nké ofê mú ba/mû ba-kyâ mě o/mû o*fí ké kafâ*.

¹⁴ Mbé ba*da/fé ne nshwam ne dyityém ebe ba-kye mě* nké mbe ba-myii ng kyísí ba-tii ng wǎ eringe nyí banshâng bakye mbe ba-chi i. Â ba-kú ba-fâ nshwam ba/fu, mbé bajá byiryíng ne bato, ba-kpet ng byiko ebe byibáp wǎ banshâng bakye. Mbé mbe ba-bírî ng bunwa ne me kanong kanong.

¹⁵ Nang ké me mu nyǐ mú o/nen kámbé ba-kán, n-chi kámbé ba-shwane, mbé mbe ba-nam m mě.

¹⁶ Mbé mbe ba-né ng mě ba-câ kashú ba-bírî ng ba-kâm m [bukye ḿbú bu*fí ne busa*.] Mbé baa*nwa efé dyityém* wǎ búre ḿbú bu*fí dángdáng*. Ké nǎ, banet-ashí ebe mbe ba-raa ng byiraa-akpee, mbé ba/chi ba-kpú kyibî-bukyû, ne banet ḿbé Éjip ba/chi ba-jwó kámbé.