Hozáya 6 - Bokyi Bible

Banet ḿbé Ézerel mbe ba-saa ng Byiko ḿbyí byi*fí ké Kafâ*

¹ Banet ḿbé Ézerel ba/raa ba/fu, bâ n̂g byi-bwa esim byi-kâm Óburúkpâbí. Nyǐ oo/némê bě, nké o-man n bě eju byinêm ámbyi. Nyǐ oo/némê bě, nké o/chi o-bwá bě byinêm ámbyi.

² Ké ací afee nang achât, o/chi o-chi bě byi-nyange, ne be byi/chi byi-kyú ké bushú emen.

³ Kyi-nwa ng ńkyí be byidakan byi-nyît Óburúkpâbí. Be byimu byi-nyît ng byi/fu, nyǐ o/chi o-bâ o-kâm bě wǎ eringe nyí byimu byi-nyît ng byi/fu, dyicí ndyi dyi-câ, wǎ eringe byimu byi-nyît ng to byi/fu, omu-kyifang o-na ng esí e-jwâa.

⁴ Nké Óburúkpâbí o/raa o/fu, me n-chi i běn ebóng, ǎ banet ḿbé Ézerel ne Júda. Kyijé ńkyí ben bamu ne nkyí ne me nkyi kyi-rím m ochéé óchee wǎ ófíbí mú odatát ké dyicófóróng. Nkyi to wǎ kyibû ńkyí kyidarím ké dyicófóróng pirípirí.

⁵ Nkyí nké nn/twóm bamkpábé ḿbé badasét byiraa ejí ba-kâm běn ne kyitwóm ejí ńkyí byití ne bukyû. Ńkyí mu n-ryuu ng ké abwô enen nkyi wááng.

⁶ Me mu n-ryuu ng kyijé enen ńkyí kii*man* kyi-shwôm byifen-byitú enen ḿbyí bamu ba-chi i. Me mu n-ryuu ng n/fu, banet ejí banyît mě, kyi-shwôm byifen eshí ba-kye mě. [

⁷ Nké mbé ba-nung ng ké esí ányi ba-bâ, ké oshê mú Ádam,] ba-bên ocím mú m/mû n/ryí ne mbé.

⁸ Gyílet o-chi i oshê mú oo/sú ne byibî-banet ne banju banet.

⁹ Banchi kyifen ejí mbe wǎ dyibóng-banet-kajii ḿbé badaját onet ké bukwóp. Nang ké bukwóp ḿbú mbu bu-jâ ké kyikit-ociring ńkyí ké Shékem, mbé mbe ba-ju ng banet. Ne mbe ba-tigi ng ne ba-chi biǐtí-byibî ḿbyín.

¹⁰ Me nn/ri kiinkaa byiko-chwǒm ké Ézerel. Banet ejí baa/bên byiko ebe ké banunut-ofê mú mbe ba-kyâ erím-bakye.

¹¹ Nké kyi-kim ne ben, ǎ banet-Júda, me nn/tî nkéré mú n/chi n-kye běn busông to ké ńkyí bamu ba-chi i.