Hozáya 5 - Bokyi Bible

¹ Fwôo n̂g atông ba-jwo ńkyín, ǎ banchi kyifen-Osówo. Fwôo n̂g atông, ǎ banet-Ézerel. Ben mú ba/fím ké kyikû-butu, fwôo n̂g atông ba-jwo. Ben ba/mû ba/chi ba-kûkét mpan mú baa*ryí acît* ké bubwô ámbu, mpan o/chi o-bên běn, ké nǎ, ba/firi kaǎtám ké Myízipa, ba/firi to kaǎsém ńké baa/táng ké kaku ńké Tábo,

² ba-firi [kiǐríbíríbí-dyibíng ké oshê mú Akákya,] ne n/chi n-kye běn ashí amúmú busông.

³ Me mu n-nyît ng eringe nyí banet ḿbé Ézerel mbe. Mbé baa*man erem ké bushú ejí*. Mbé ba*da/tî dyityém ne me* ne ba*da/kwárê mú bada mě ekye ofê*.

Hozáya o/kuri Banet-Ézerel Ekó kyi-kim ne Bakye esháng

⁴ Byibî ḿbyí banet ḿbé Ézerel baa/chi mbyi byi-ku ng kámbé esim ebwa ba-kâm Osówo ebe. Bakye esháng baa/koo kámbé busa ne ba*fí to ba-nyît ng Óburúkpâbí*.

⁵ Byiko etông ḿbyí banet ḿbé Ézerel byi-kú byi-két ng mpan o-bên kámbé. Byibî ebe mbyi byi-chi i kámbé ba-kpán n ácíring ba-myii ng, ne banet ḿbé Júda mbe ba-myii ng ne mbé ké kyikû.

⁶ Mbé mbe ba-kúng ng ebû ne bampong ebe ba-da ng echi byifen ba-kyâ Óburúkpâbí, nké ńkyín kyi*fí kyi-chwáp ng kámbé*. Mbé baa*ba/chi ba-ri ǎ* ké nǎ, nyǐ oo/mîng kámbé.

⁷ Mbé ba*da/fé dyityém ebe ne Óburúkpâbí*. Bwǎn ebe baa*chi ḿbé emen*. Ké bubwô ámbu, kántîk, Osówo o/chi o-bên kámbé ne esí ebe.

Byití ḿbyí Júda ne Ézerel

⁸ Jwá n̂g bantán-byití ké Gyíbya. Wonge ê agurubí ké Ríma. Nyán n̂ byití ké Bétel. Banet ḿbé Běnjámin, nwa n̂g byití.

⁹ Dyicí-busông ndyi dyi-bâ, ne Ézerel e/chi e-nung ké busông. Banet ḿbé Ézerel, ńkyín kyi-man kyi-chi.

¹⁰ Óburúkpâbí o/raa o/fu, kafâ nke ka-sa ng mě, ké nǎ, banet-ashí ḿbé Júda baa/danung ké Ézerel, baa/koo Ézerel esí. Ké bubwô ámbu, me n/chi m-pwó kámbé busông ké byiko wǎ kace ńké kadasú.

¹¹ Ézerel nyi e-ri ng busông ḿbú mbe ba-cít ng kányí. Esí nyí e/mû e/já kányí e*fí to nyí emen* ké nǎ, Ézerel e/tú dyishí e/fu, nyǐ e-da ng ekyé ochwâp ne [banet ḿbé ba*fí ne ochwâp mú badakye kányí*.]

¹² Me n/chi n-ju banet ḿbé Ézerel, n-kye ḿbé Júda busông.

¹³ Ké nkéré banet ḿbé Ézerel ba/ri eringe nyí mbé ba/mû ba-rwôm m, ne ké nkéré banet ḿbé Júda ba/ri byinêm ebe, nkéré ámu nké banet ḿbé Ézerel ba/dim ba-kâm Asyírya ba-da-bí kiǐtí-otu-oshê ámu ba/fu, ochwáp kámbé. Nké otu ámu o*da/man echi kámbé ba-nyange* o-ju byinêm ebe*.

¹⁴ Me n/chi n-kye banet ḿbé Ézerel ne Júda bunwa wǎ ekpang. Me oyén n/chi n-ját kámbé boǒcê boǒcê, m-mîng kámbé. Ké nkéré n-kú n-tut ng kámbé n-dim ne mbé, onet o*fí mú o/chi o-man enyii kámbé*.

¹⁵ Me n/chi m-mîng banet ejí tete ba-ri busông ḿbú bu/chi bu-kwárê ne byibî ebe, ba-dim ba-kpet mě ekyé ba-bâ. Katô ké busông ebe ba/chi ba-kan ba/fu, mbé ba-kyé ng mě.