Hozáya 4 - Bokyi Bible

Óburúkpâbí o/bîn Banet-Ézerel

¹ Óburúkpâbí mu ne dyibîn ńdyí o/chi o-bîn banet ḿbé mbe ba-kyú u ké esí ńnyín. Fwôo n̂g atông, ǎ Ézerel, ba-jwo ńkyí mu o-sét ng. Mu o-sét ng o/fu, dyityém etî nang kyijé byi*fí ké esí ńnyín* ne banet ba*fí ba-nyît ng mě wǎ Osówo*.

² Banet mbe ba-ryí i ecím, ba-bên n kányí. Mbe ba-sét ng byisédéng, ba-ju ng banet, ba-jii ng bujii, ba-chi i byinam. Byibî ḿbyí mbe ba-chi i mbyi byi-jê ng byi-câ, ba-ju ng banet ba-bírî ng.

³ Ne ké bubwô ámbu, esí e/chi e-jwóm, ne kángkáng byěm ḿbyí mbyi byi-kyú u ké nyǐ byi/chi byi-kpú. Kángkáng enyam ne bunurung, cibicibi ne ekworê byi/chi byi-kpú.

Óburúkpâbí o/bîn Banchi Kyifen Emen

⁴ Óburúkpâbí o/raa o/fu, onet nang obónge o*dachi o-bât banet-Ézerel chwǒm* o-bîn nang kámbé*. [Ébîn ejí nyi ne ben mú bamu banchi kyifen ejí.]

⁵ Buchú ne esû, ben bamu ba-chi i byibî ba-bírî ng, ne bamkpábé to ḿbé badasét byiraa ejí ba*da/cángê ba-shwôm běn*. N/chi m-bên Ézerel nyí nyi boné enen.

⁶ Banet ejí mbe ké busông, ké nǎ, mbé ba*fí ba-nyît ng mě*. Ben banchi kyifen ejí baa/né mě enyît ne baa/né ńkyí n/tángê běn, ne ké bubwô ámbu, me mu n-né ng běn ne mm*ba/chi n-nyît bwǎn enen wǎ banchi kyifen ejí*.

⁷ Eringe nyí ben banchi kyifen ejí bamu ba-jê ng ba-câ, éné to nké byibî ḿbyí bamu ba-chi i mě mbyi byi-jê ng byi-câ, ne ké bubwô ámbu, n/chi m-bírî ofê enen o-firi éshwân.

⁸ Ben bamu ba-já ng esang ké bubwô-byibî ḿbyí banet ejí, ne ké bubwô ámbu, bamu ba-ryuu ng ba/fu, mbé ba-chî ng echi byibî ba-câ kashú.

⁹ Busông ḿbú banet-Ézerel ba/chi ba-ri, ben to ba/chi ba-ri kámbú. N/chi n-kye běn busông n-chi běn ba-ré dyifwá-byibî ḿbyí bamu ba-chi i.

¹⁰ Ben ba/chi ba-ryí byiryíng-kyifen echi ḿbyí byi/já běn, nké esong e-chî ng běn enwa. Ben ba/chi ba-fé esówo nyí edakye bufwon, nké baa*ba/chi ba-ri bwǎn* ké nǎ, ben baa/mîng mě, ba-firi ké kyijé ne esówo ekíri.

Óburúkpâbí o/fu, Bakye esháng baa*nwa*

¹¹ Óburúkpâbí o/raa o/fu, bato ḿbé akyî ne ḿbé dyicí mbe ba-bên n bubong ḿbú banet ejí.

¹² Mbé mbe ba-kúng ng kyikim-kyichí ba-sô ng epé. Kyikim-kyichí ńkyí nsô epé nké nkyi kyi-sét ng kámbé ńkyí mbé mbe ba-ryuu ng ba/fu, mbé ba-nyît ng. Mbé baa/mîng mě. Baa/yip byiko ebe ba-kye esówo ekíri wǎ onyi mú o/bírî o-kpet eryí akpara.

¹³ Mbé mbe ba-da ng echi byifen ké byikit-ociring ḿbyí mbyi kyíbóng-eku, ne ké eku ányi, mbe ba-yip ng burwan ba-shí i ké byikû-byichí ḿbyí byi/kwóp, byi-paam byire, ké nǎ, busi-byichí ámbyi mbu bu-jang ng enwa. Ké bubwô ámbu, bwǎn ḿbé bwǎn enen ba-ryí i akpara, ne banyi ḿbé bwǎn enen ba-chi i byinam.

¹⁴ Nké mm*ba/chi n-kye kámbé busông ké ńkyí mbe ba-chi i něen* ké nǎ, ben bayén bamu ba-rí i ne akpara nyí nyi ké kyise ńkyí bamu ba-fâ esówo ekíri, ne bamu ba-cibi ng ne mbé ba-sháng ng bakye. Wǎ eringe nyí dyitím-ekan dyi/fu, ba-ju ng banet ḿbé ba*fí ne bubong*.

¹⁵ Nang ké ben banet ḿbé Ézerel ba*da/tî dyityém ne me* kyi/bát banet ḿbé Júda ba*dachi ba-chi dyizong-kyibî ánkyi kyibónge*. *Da n̂g echi ba-kûdakye ofê ké Gyígal ne Bétel*. Nang ocím ké byikit ámbyi ké dyizîn ńkyí Óburúkpâbí mú mu okpó, *da n̂g eryí*.

¹⁶ Banet ḿbé Ézerel mbe ba-shwane e ashí wǎ boonyam-atû. Me n-cen n nǎ ne n-nen kámbé wǎ bwǎn-ebû ké kyikit ńkyí biǐbyâa mbyi kô chwóó. [

¹⁷ Banet ḿbé Ézerel ba/firi ké busa ḿbú barím-bakye. Mîng kámbé ba-ca kiǐfáng ńkyí ebe.

¹⁸ Ké nkéré mú baa/jwáp bato chwóó, akpara ebe nyí mbe ba-ryí i a-kpet enyîn kámbé, éshwân e-kpet enyîn kámbé e-shwôm ofê.

¹⁹ Ba/chi ba-kúng kámbé wǎ bufú nké bu/kúng kámbé, ne éshwân e/chi e-wuri kámbé ké bakye ebe ḿbé mbe ba-sháng ng.]