Hozáya 2 - Bokyi Bible

¹ Ké bubwô ámbu, kó n̂g barî-banet eyên ḿbé Ézerel, Banet ḿbé Osówo ne Banet ḿbé mbe ba-jê ng Óburúkpâbí.

Góma o*da/fé Dyityém ne Otyép Emen* Banet ḿbé Ézerel to ba*da/fé Dyityém ne Osówo*

² Bwǎn ejí, tîm m̂ boné enen arông nang ké o*fí to onyi ejí* ne me to n*fí to otyép emen*. Tîm m̂ ǎ arông o-mîng byinam emen echi ne akpara eryí.

³ Â o*da/mîng* n/chi n-két ǎ osíndyíbang o-firi wǎ dyicí ńdyí ba/mû ba/fwon ǎ. N/chi n-chi ǎ o-firi wǎ kiǐjínjwóm-esí ńkyí kii*bát byiryíng* ne o/chi o-kpú kyijé-omu.

^4-5 Mm*ba/chi n-ri bwǎn emen bafip*. Mbé ba-chi i [bwǎn ḿbé nryî akpara mú éshwân e*fí ǎ*.] Nyǐ oyén o/fu, n/chi n-dim n-kâm bákyî ejí. Mbé nké mbe ba-kyâ mě byiryíng ne omu ne byídí ḿbyí byinong byinong ne bakút ne bato.

⁶ Ké bubwô ámbu, me n/chi n-ro nkám mú byiwong byíwong n-fé ǎ ké kafâ, m-bi ekpe n-wáp ǎ n-fé ké kafâ eringe nyí oo*byí to kyíjí*.

⁷ Nyǐ o/chi o-zóngê o/fu, nyǐ o-kâm m bákyî emen, nké oo*ba/chi o-kâm kámbé*. O/chi o-kyé kámbé, nké oo*ba/chi o-ri kámbé*. Ne o/chi o-raa kâng o/fu, n-kú m-bwa ng esim n-kâm otyép ejí mú mbwôp kashú. Me m/mû kanong ké nkéré mú m/mû ne nyǐ n-shwôm eringe nyí mu kántîk.

⁸ Nyǐ o/mû o*da/bángê o/fu, me nké mu n-kyâ ǎ byiryíng* ne bato* ne bakút* ne kángkáng basyílyíba ne bagûl ḿbé mu o-yip ng o-chi i erím-bakye nyí Bâl*.

⁹ Ké bubwô ámbu, ké nkéré mú byiryíng efuu, me n/chi n-koo eyáré ejí nyí byiryíng ne bato nyí m/mû n/kye ǎ ne n/chi n-koo byídí ejí ḿbyí byinong byinong ḿbyí n/kye ǎ mu o-bwá ng.

¹⁰ N/chi n-két ǎ osíndyíbang ké bushú-bákyî emen ne onet o*fí mú o/chi o-man ǎ enyii ké abwô ejí*.

¹¹ N/chi m-man kángkáng ajî-byifen emen, ajî emen ányi nyí kángkáng dyije ne nyí kángkáng otukáku ne nyí kángkáng ékwâbashi, nyí mu o-chi i, ne kángkáng ací-ociring emen nyí mu o-tî ng.

¹² N/chi m-bên byifát-byirim-byichí emen ḿbyí o/raa o/fu, nyín mpún ejí mú n/ryí ké abwô nyí bákyî ejí. N/chi n-chi kámbyí byi-bírî kyikim-dyikán. Enyam e/chi e-bên kámbyí.

¹³ Me n/chi n-kye ǎ busông ké bankéré ḿbé o/ráp mě ké nkéré mu o-shí i burwan o-kyâ Bâl, o-fâ byibwáng emen o-kyé ng bákyî emen o-câ. Óburúkpâbí nké o/raa.

Kyijé ńkyí Óburúkpâbí mu ne Banet Emen

¹⁴ Ké bubwô ámbu, n/chi n-chîbwa ne nyǐ ké kyikim-dyikán. Áku nké n/chi n-kúng bunyîn-ejá-kyijé n-chi ǎ o-bwa esim o-kâm mě.

¹⁵ N/chi m-bwa ne byifát emen n-kye ǎ, n-chi Owo-Afaníkong o-firi ǎ dyifyi ńdyí odatî achi. Nyǐ o/chi o-bángê ne me wǎ eringe nyí o/mû o-bángê e ne me ké nkéré o/mû o/tôong kaǎwásíng, ké nkéré mú o/fím ké Éjip ne o-bâ.

¹⁶ Nyǐ kâng o/chi o-chî mě ekó, otyép ejí, oo*ba/chi o-chî mě ekó* Bâl ejí*.

¹⁷ Mm*ba/chi n-chî ǎ ebángê o-kó dyizîn ńdyí Bâl*.

¹⁸ Ké nkéré ámu, me n/chi n-ryí ocím ne kángkáng enyam ne bunurung eringe nyí bii*ba/chi byi-chîbên byifát ḿbyí banet ejí*. Me n/chi n-fîm to kángkáng byiyám-byití ké esí ebe, kángkáng bushwám ne báre, ne n/chi m-mîng banet ejí ba-kyú ké bunyîn-dyityém, chwǒm kii*ta kámbé*.

¹⁹ Ézerel, me n/chi n-chi ǒ a-firi onyi ejí. Me n/chi n-kû ǒ esét ntûntû, n-fé dyityém ne wo. N/chi n-tông ǒ kyijé, n-ri ǒ bafip kángkáng nkéré, n-chi ǒ a-firi mú ejí ne banyá.

²⁰ Me n/chi n-tî ocím ejí mú n/ryí, n-chi ǒ a-firi mú ejí, ne wo a/chi a-nyît mě wǎ Óburúkpâbí.

^21-22 Ké nkéré ámu, me n/chi n-jwo banshwam ḿbé banet ejí ḿbé Ézerel. Me n/chi n-chi omu o-na ké esí, ne esí e/chi e-zím kángkáng byirim-byichí.

²³ N/chi n-tî banet ejí ké esí ebe, n-chi kámbé ba-firi ne byěm. N/chi n-tông kyijé ne banet ḿbé ba/mû ba-kó ng kámbé, Baa*tông Kámbé Kyijé*. Ne banet ḿbé ba/mû ba-kó ng kámbé, *Chí Banet Ejí* n/chi n-raa n/fu, ben ba-chi i banet ejí, ne mbé ba/chi ba-faa ba/fu, wo a-chi i Osówo eten.