Hozáya 14 - Bokyi Bible

Hozáya o/tîm Banet-Ézerel Arông

¹ Hozáya o/fu, banet ḿbé Ézerel, bwa n̂g esim ba-kâm Osówo Óburúkpâbí enen. Kyibî enen kii/chi běn ba-kpán dyícíring ba-myii.

² Bwa n̂g esim ba-kâm Óburúkpâbí, ba-fé nshwam mún ba-kye ǎ ba/fu, pwoo bě ké kángkáng byibî eten, a-jwo nshwam eten, ne be byi/chi byi-kpee ǒ wǎ eringe nyí bii/ryí ocím.

³ Asyírya aa*man bě enyii* ne bubyî-orá-byití boo*man bě eku*. Ne banyá, bii*man to echîsét byi/fu, erím-bakye eten e-chi i Osówo eten*. Ô Óburúkpâbí, wo a-ri ng bafip ne banet ḿbé ba*fí ne onet okíri mú badabírî ba-kâm ǎ*.

Óburúkpâbí o/ryí Banet-Ézerel Ocím mú Dyikpen ńdyí Dyifyîfî

⁴ Óburúkpâbí o/raa o/fu, me n/chi m-kpî banet ejí ba-bwa esim ba-kâm mě. Mbé ba/chi ba-jê mě ne dyityém ejí kángkáng. Me n*fí to n-sa ng kafâ ne mbé*.

⁵ Me n/chi n-kyú banet-Ézerel wǎ omu mú odana ké kiǐjínjwóm-esí. Mbé ba/chi ba-byet wǎ ekong-byichí. Ba/chi ba-fé eriri ebe kyísí kanong kanong wǎ byichí ḿbyí Lebánon.

⁶ Mbé ba/chi ba-byet eshǎan chwóó, ba-nwa bunong wǎ byichí-ólif. Ba/chi ba-kyú ne kyinung ńkyí kyinong wǎ byichí-séda ḿbyí Lebánon.

⁷ Mbé ba/chi ba-bwa esim n-chîku kámbé. Mbé ba/chi ba-kán babap wǎ kyifát, ba-zím byirim wǎ kyifát-byirim-byichí. Mbé ba/chi ba-byí dyizîn wǎ bato ḿbé Lebánon. [

⁸ Banet ḿbé Ézerel] baa*chi to chwǒm ne erím-bakye*. Me n/chi n-jwo banshwam ebe, n-tún kámbé kanong. Me n/chi n-ku kámbé wǎ kyichí ńkyí kii*roo eshǎan*. Kángkáng banjware ebe mbe ba-fím m ne me.

Nkuli Kyikû

⁹ Kyi/bát banet ḿbé mbe ne bubong bajwo dyishí-kyiraa ńkyí ba/sáng nyín, ne kyi/bát batî kánkyí ké dyityém. Akwóp nyí Óburúkpâbí nyi kanong, ne banet ḿbé mbe kanong mbe ba-kpen n ké ocen mú mbe ba-cen n ké nyǐ. Nké banchi byibî ba-kpán n ba-myii ng, ké nǎ, mbe ba-né ng kányí.