Hozáya 13 - Bokyi Bible

Nkuli Kyikû-Mpan mú Óburúkpâbí o/pan Banet-Ézerel

¹ Ké nkéré mú o/shwôm ké esim, â kyikû-banet ńkyí Éferem ba/raa kyiraa, bushî bu-róng ng byikû-banet-Ézerel ḿbyí áku. Mbé ba/kúng kyikû ńkyí Éferem wǎ kiǐtí-kyikû. Nké banet-Éferem ba/chi kyibî ńkyí ba/kye orím-bukye-Bâl ofê, ne ké bubwô ámbu, ba/chi ba-kpú.

² Mbé ba/tôong ba-chi i byibî ba-câ kashú, ké ochi mú mbe ba-chi i erím-bakye-biǐré ba-kyâ kányí ofê, erím-bakye-syílyíba nyí ba/kúng bubong ne abwô nyí banet ne ba-chi. [Ne ba-raa kâng ba/fu, chi n̂g byifen ba-kye kányí. Banet ba-cen n nǎ ne ba-fé erím-bakye ányi ocím, nyí ba/chi wǎ bampong.]

³ Ké bubwô ámbu, banet ḿbén ba/chi ba-rím wǎ kyibû-dyicófóróng, ńkyí dyicófóróng dyi-câ dyi-bâ kyi-rím. Mbé ba/chi ba-kyú wǎ boǒpwǎt-esang-byichí ḿbú bufú budakúng kámbú ké kyikit ńkyí badacage esang-byichí, wǎ arúkwâ nyí adabyí ké okwâ.

⁴ Óburúkpâbí o/raa o/fu, me n-chi i Osówo Óburúkpâbí enen mú o/tông běn kiǐfáng ba-byí ké Éjip. Ben ba*fí ne Osówo okíri* kyi-cibi ne me*. Me kǎnchí nké mu Onet-Onyii enen.

⁵ Me n/nen běn ké kiǐjínjwóm-kyikim-dyikán.

⁶ Nké ké nkéré mú ben ba/nung ké esí nyí enong, ba/ryí ba-zût, ba-kpet etông byiko, ba-ráp mě.

⁷ Ké bubwô ámbu, me n/chi n-kye běn bunwa wǎ ekpang. Me n/chi n-ját běn ké kiǐfáng enen.

⁸ Me n/chi n-kye běn bunwa wǎ kyibî-enyam ńkyí baa/ju bwǎn emen, n-ját běn m-pwó. Me n/chi n-ryí běn ké kyikit ánkyi wǎ ekpang, n-ját běn boǒcê boǒcê wǎ kyibî-enyam.

⁹ Me n/chi n-ju běn, ǎ banet ḿbé Ézerel. [Yeě o/chi o-chwáp běn kâng.

¹⁰ Ben ba/bí mě ba/fu, me nkye běn otu ne banet-ashí, nké mbé ba-cen n nǎ ne ba-nyii oshê.]

¹¹ Me nn/kye běn batu ké busa-dyityém, ne nn/fîm to kámbé ké busa-dyityém.

¹² Byibî ḿbyí Ézerel e/chi mbyi ké banwet, ne nn/tî banwet ámbe ké kyikit ńkyí baa*bên*.

¹³ Ézerel nyi ne bukwóp ḿbú edacen ne e-kpen, nké nyi enyam e-shwôm nyí e*fí e-kúng ng bukwóp ámbu* wǎ wǎn mú ba-kú ba-bâ efwon, mú o/né ebyí ké dyifít.

¹⁴ Me mm*ba/chi n-nyii banet ḿbén ké oshê-bakúsí* nang ké abwô nyí bukyû*. Bukyû, [bâ ne] byirwóm eyên. Oshê-bakúsí, [bâ ne] bukyû eyên. Me mm*ba/chi n-chîri banet ḿbén bafip*.

¹⁵ Nang Ézerel e-bwa e-byet [wǎ biǐbyâa,] me n/chi n-twóp kiǐsínsóng-bufú ńkyí kyidafím ké kiǐjínjwóm-kyikim-dyikán kyi-ba-núng buce ne abíng-omu ebe. Kyi/chi kyi-kúng nang ebóng chwǒm ńkyí nkyi kámbé kiǐtí.

¹⁶ M-man n-kye Samérya busông ké bunwa ḿbú o/bírî ne me. Banet emen ba/chi ba-kpú ké byití. Ba/chi ba-kúng bwǎn-bajújwô ba-díp kyísí, ba-tím banyinyi ḿbé mbe ne afít boompyi ké afít bwǎn ba-byí.