Hozáya 12 - Bokyi Bible

¹ Kángkáng byěm ḿbyí banet ḿbé Ézerel mbe ba-chi i, kyi-fím ké dyicófóróng tete buchú bu-jí, byi*da/byí ké chwǒm* ne byi-cen n ne bukyû. Banet enîm ne byěm-anwa enwa mbyi byi-kán n byi-câ kashú ké burwám ebe. Mbé mbe ba-chi i kyikwáré ńkyí badachi byěm ne banet ḿbé Asyírya, ba-cen n kasî ne banet ḿbé Éjip.

² Óburúkpâbí mu ne kyibî-mpan ne banet ḿbé Júda ńkyí o/fu, nyǐ o-két ng kámbé. O/chi o-kye to banet ḿbé Ézerel busông ké édúú ebe nyí mbe ba-chi i. Nyǐ o/chi o-só kámbé ewa ké byěm ḿbyí baa/chi.

³ Jekôp mú bonchí ebe mú kpákpá o/nyii kyikit ne Éso mú wǎn-boné emen mú ba/fwon kámbé afúng, ké nkéré mú ba/mû ba/tôong ké kafâ-dyifít ńdyí boné ebe. Ké nkéré Jekôp o/kán, nyǐ o/nwa ne Osówo,

⁴ o/nwa ne orím mú onong o-kpógê orím ámu. O-tii, o-tîm arông o/fu, orím ámu ojware ǎ. Ké Bétel, Osówo o/bê o-kâm ǎ, o-pem ne [nyǐ.]

⁵ Osówo ámu o/mû Osówo Óburúkpâbí mú o/rêe o-shwôm. Dyizîn emen dyi-bángê e Óburúkpâbí, ńdyí ba/chi ba-kû ǎ ekye ofê.

⁶ Ké bubwô ámbu kántîk, ǎ kyikû-banet ńkyí Jekôp, fé n̂g dyityém ké Osówo enen, ba-bwa esim ba-kâm ǎ. Tông n̂g dyityém ecángê, baa*ryí acît* ba-bám degere ba-mîng Osówo enen o-chi ńkyí o/fu, nyǐ o-chi i.

Byiraa Byikíri byi-kim ne Mpan mú Banet-Ézerel

⁷ Óburúkpâbí o/raa o/fu, banet ḿbé Ézerel baa*sét ntûntû* wǎ banet ḿbé Kínan. Kyi-nyîn n kámbé ekúng érúmá nyí ee*kan byěm kanong* ba-ryí banet ḿbé mbe ba-ré ng byěm ne mbé mpún.

⁸ Mbé ba-raa ng ba/fu, be bii/fang kanong kanong. Onet o*fí mú oda bě esét o/fu, be byi/já akpuga ké bukwóp ḿbú boo*nwa*.

⁹ Nké me Óburúkpâbí mú mu Osówo enen, mú o/tông běn kiǐfáng ba-byí ké Éjip, n/chi n-chî běn echi ba-chîkyú ké bampyep ḿbé badabi ké byídí, wǎ eringe nyí ba/mû ba-kyú u ké nkéré mú m/bê n-kâm běn ké kyikim-dyikán.

¹⁰ Me n/raa ne bamkpábé ḿbé badasét byiraa ejí, n-tông kámbé akat chwóó, ne ké abwô-bamkpábé ejí ámbe, me n/kuri banet ejí ekó.

¹¹ Nang ké n/kuri kámbé ekó éné, ké Gyílet nké mbe ba-fâ erím-bakye, ne banet ḿbé mbe ba-kyâ kányí ofê ba/chi ba-kpú. Mbe ba-kúng ng batyép-bampong ba-sháng ng bakye ké Gyígal. Byikit-byifen echi ḿbyí mbyi ké oshê ámu byi/chi byi-bírî azu-aká ké byifát ḿbyí baa/kpang.

¹² Jekôp mú bonchí eten mú kpákpá o/chêe o-jâ Mesopotémya, ké nǎ, o/fu, nyǐ o-já ng onyi, o/chi bǎmkpóngé o-kye bonchí-onyi emen, o-tún ǎ etám-ebû.

¹³ Óburúkpâbí o/twóm mkpábé mú odasét byiraa emen o/fu, oda-nyii banet ḿbé Ézerel ké búsóng ḿbú ba/mû ké Éjip, o-bám kámbé wǎ mbâm ebû.

¹⁴ Banet ḿbé Ézerel baa/chi Óburúkpâbí o-kú o-sa ng kafâ kanong kanong. Kyi/kwárê ńkyí badakpú ké kyibî ebe ńkyí ba/chi. Óburúkpâbí o/chi o-kye kámbé busông ké éshwân nyí baa/fé ǎ.