Hozáya 11 - Bokyi Bible

Kyijé ńkyí Óburúkpâbí mu ne nkyí ne Banet ḿbé mbe ba-bírî ng Bunwa ne Nyǐ

¹ Óburúkpâbí o/raa o/fu, Ézerel e/mû e-jê ng mě ké nkéré e/mû e/tôong kaǎwásíng, [ne me n-kó ǎ o-byí ké Éjip wǎ wǎn ejí.]

² Nké â [mu n-kó ng] ǎ n-nye ng n-fâ, ányi nké oda [mě] ebírî obíríng esim. Banet ejí baa/chi byifen ba-kye orím-bukye-Bâl, ba-shí burwan ba-kye erím-bakye.

³ Me nké n/tángê Ézerel bucen. [Me n/kúng banet ejí ké abwô ejí,] nké mbé ba*da/bángê ba/fu, me nké n/nen kámbé*. [

⁴ Me m/kpaa kámbé n-fé ké byiko ne kyijé. Me n/yip kámbé m-bât ké kakim, n-siring kyísí n-kye kámbé abî.]

⁵ Mbé ba/né esim ebwa ba-kâm mě, ne ké bubwô ámbu, ba-man ba-bwa esim ké Éjip, ba-firi ké bubwô ḿbú banet-Asyírya.

⁶ Byití byi/chi byi-róng ké eshê ebe, byi-bên afyi-oshê ebe. Byi/chi byi-ju banet ejí, ké nǎ, mbé ba/chi ńkyí mbé ba/kabe ba/fu, kyi/nwa kyi-shwôm. [

⁷ Mbé ba/tú dyishí ba/fu, mbé ba-bírî ng mě esim. Mbé ba/chi ba-tii ké bubwô-busông ḿbú mbu kámbé ké byiko, ne onet o*fí mú o/chi o-fîm kámbé kámbú*.]

⁸ Ézerel, me n-cen n nǎ ne n-zú dyityém ne ben. Me n-cen n nǎ ne m-mîng běn. Me m-man n běn eju wǎ eringe nyí n/ju banet ḿbé Ádima? n-ju běn wǎ eringe nyí n/ju banet ḿbé Zébom*. Me mm*ba/chi m-man echi kánkyí* ké nǎ, bamu ba-jang ng mě ejê ba-shwôm.

⁹ Me nn*kye běn busông ké nkéré n-kú n-sa ng dyityém*. Me nn*ju to Ézerel* ké nǎ, me n-chi i Osówo, *chí onet*. Me mú mu kanong mu ne ben. Me mm*bê n-kâm běn ké busa-dyityém*.

¹⁰ Banet ejí ba/chi ba-bâ ne me ké kyikû ké nkéré n-kú n-fém m ne banet-bushwôn ebe wǎ ekpang. Mbé ba/chi ba-fím ké kyicê ńkyí esû nyi e-ríbî ng e-jâ, ba-zóngê ba-kâm mě.

¹¹ Mbé ba/chi ba-fím ké Éjip ne Asyírya ba-bâ ochéé óchee wǎ bunurung. Me n/chi m-bwa ne mbé esim ké eshê ebe. Me Óburúkpâbí nké n/raa.

Óburúkpâbí o/két Mpan o-bên Banet ḿbé Júda ne Ézerel

¹² Óburúkpâbí o/raa o/fu, banet ḿbé Ézerel baa/yip byisédéng ne kaǎnínǐm ba-wáp mě ba-fé ké kafâ, ne banet ḿbé Júda ba/tôong ba-bírî ng bunwa ne me mú mu Osówo mú mu kanong ne mú odatî ocím emen mú odaryí.