Hozáya 10 - Bokyi Bible

¹ Banet ḿbé Ézerel ba/mû wǎ dyisín-kyichí ńdyí dyi/mû ne byirim chwóó. Eringe nyí mbé ba/mû ba-já ng byěm chwóó, éné to nké ba/mû ba-bi ng to biinchéng-bakye chwóó. Eringe nyí esí ebe e/mû e-bát ng byiryíng, éné to nké ba/mû ba-chi i aká-bakye esháng nyí mbe ba-kyâ kányí ofê a-nwa a-shwôm.

² Banet ḿbé atyém ebe a*fí kanong* ba-man ba-ri busông ké dyishí-byibî ebe. Osówo o/chi o-bú byikit-byifen echi ebe, o-bên aká-ociring ebe.

³ Banet ḿbén ba/chi ba-kpet eraa abeabe ba/fu, be byi*fí ne otu* ké nǎ, be byi*da/shî Óburúkpâbí*. Nké otu o/mû o-bwa ng o-chi bě ebóng.

⁴ Mbé mbe ba-raa ng byiraa ḿbyí byi*da/byí chwǒm* ba-ryí i ocím mú baa*tî* ba-chi kyikwáré ńkyí kyi*da/byí chwǒm*. Baa/bírî ntûntû o-firi acît eryí, ne nyi a-kán n a-câ kashú wǎ byibî-biǐbyâa ḿbyí byidabyí ké kyifát ńkyí baa/kpang.

⁵ Banet ḿbé mbe ba-kyú u ké oshê mú Samérya ba/chi ba-kûshî, ne ba/chi ba-ta dyikán ńdyí orím-bukye-[otyép-mpong] mú ba/chi ké gûl, mú baa*ba/chi ba-chîri*. Mbé ne banchi kyifen ebe ḿbé mbe ba-fâ orím-bukye ámu ba/chi ba-tii kámú. Mbé ba/chi ba-tii ké nkéré mú bunong emen boo*ba/chi bu-chîkyú kámú ké byiko*.

⁶ Ba/chi ba-kúng orím-bukye ámu ba-jâ ne mǔ Asyírya wǎ eyáré-byití nyí badakye kiǐtí-otu mú oshê ámu. Ba/chi ba-dángê banet ḿbé Ézerel, ba-fé kámbé éshwân ké bubwô-bacê ḿbé ba/koo.

⁷ Ba/chi ba-kúng otu ebe ba-dim ne nyǐ wǎ kaǎcê-kyichí ńké kace kadakúng kánké.

⁸ Ba/chi ba-bên biinchéng-bakye ḿbyí mbyi kyíbóng-eku, ké Áben, byikit ḿbyí banet ḿbé Ézerel mbe ba-sháng ng bakye. Byiwong ne biǐbyâa byi/chi byi-byí ké byikit ámbyi ḿbyí mbe ba-chi i byifen. Banet ḿbé Ézerel ba/chi ba-tii ba-kó eku nyí nyáám ba/fu, rôo bě, ba-tii ba-kó eku nyí kyísí kyísí ba/fu, cít bě.

Óburúkpâbí o/két Mpan mú Banet ḿbé Ézerel

⁹ Óburúkpâbí o/raa o/fu, banet ḿbé Ézerel ba*da/mîng ne byibî echi ké bushú ejí* kyi-fím ké nkéré mú ba/chi kyibî ké Gyíbya*. Ké bubwô ámbu, ba/chi ba-kwárê ne byití ké Gyíbya. [

¹⁰ Me n/chi n-kye banchi byibî-banet ḿbén bunwa,] n-kye kámbé busông. Eshê e/chi e-cibi kyikit kyibónge e-nwa ne mbé, ne e/chi e-kye kámbé busông ké bubwô-byibî ebe.

¹¹ Ézerel e/mû ké nkéré obónge wǎ kyisu-mpong ńkyí ba/tángê kánkyí byěm kanong kanong, ńkyí nang nkéré orá kyi/kpá byiko ḿbyí kyidacím esang-byichí kyi-pii biintaa emen. Nké me n/kabe n/fu, [n-fâ kyisu-mpong ánkyi byifóngé] ké kyitông emen ánkyi ńkyí kyinong kyinong, eringe nyí n/chi n-chi kánkyí kyi-chi bǎmkpóngé ḿbé badasóng ba-shwôm. Me n/chi banet ḿbé Júda ba-tut biǐré ḿbyí byidakpang esí, n-chi kángkáng banet ḿbé Ézerel ba-tut biǐré ḿbyí byidatare kányí.

¹² Me n/sét kámbé n/fu, chwáp n̂g esí nyí efyîfî ba-kye byiko enen, kwón n̂ kanong echi, ba-fuu banjware ḿbé ofê mú bamu ba-kyâ mě, o/chi o-kye běn. Nkéré oo/fyi mú ben ba/chi ba-bírî ba-kâm mě me mú Óburúkpâbí enen, ne me n/chi m-bâ m-ba-pwó běn banjware ké byiko.

¹³ Nké ben ba/bwa ba-kwón kyibî, ba-fuu busông ḿbú kyidakye. Ben baa/ryí byirim-byichí ḿbyí byisédéng enen mbyi byi-zím m. Ké nǎ, ben ba/fé atyém enen ké [bamútu enen ḿbé bubyî-orá budatut,] ne ké bujê-basúja ḿbé bamu ne mbé,

¹⁴ byití byi/chi byi-bâ byi-kâm banet enen, ne ba/chi ba-bên kángkáng byikit enen ḿbyí bamu ba-bwom m ba-nwa ng byití. Kyi/chi kyi-kyú wǎ dyicí ńdyí Otu Sháman o/bên oshê mú Bétábel ké byití, o-ju bané-bwǎn ne bwǎn ebe.

¹⁵ Dyizong-chwǒm ándyi nké dyi/chi dyi-chi běn, ǎ banet ḿbé Bétel, ké bubwô ḿbú kiǐtí-kyibî ńkyí ben baa/chi. Â byití ámbyi byi-kpet ng byi-bâ, otu mú Ézerel o/chi o-kpú.