Hozáya 1 - Bokyi Bible

¹ Nyín kyitwóm ńkyí Óburúkpâbí oo/twóm Hozáya mú wǎn-Beryí, ké nkéré mú Otu Ozáya ne Otu Tótam ne Otu Éhaz ne Otu Hezekyâ ba/mû batu ké Júda, ne ké nkéré mú Otu Jérobâm mú wǎn-Otu Jehóháshi o/mû otu mú Ézerel.

Onyi-Hozáya ne Bwǎn Emen

² Ké mbwôp kashú-nkéré mú Óburúkpâbí o/raa ne banet ḿbé Ézerel ké ocím mú Hozáya, nyǐ o/sét Hozáya o/fu, [dabé onyi. Onyi eyên ámu oo*ba/chi o-tî dyityém emen ne wo* ne bwǎn eyên to ba/chi ba-kyú wǎ nyǐ.] Ké bukwóp ámbu bubónge, banet ejí baa/mîng mě, ba*fí to ba-tî ng dyityém ebe ne me*.

³ Ne Hozáya kâng o-bé onyinyi mú o/mû o-bángê e Góma, mú wǎn-Dyibyilyâm. Ké nkéré mú ba/fwon ókpá-wǎn-onyinchéng ebe,

⁴ Óburúkpâbí o/sét Hozáya o/fu, fé ǎ dyizîn ńdyí badakó Jézerel, ké nǎ, kii*rí to ne n-kye otu mú Ézerel busông* ké bubwô-banet ḿbé bonchí emen mú kpákpá mú odabángê Otu Jéhu o/ju ké Jézerel. N/chi n-chi [kyikû-butu ńkyí Otu Jéhu] kyi-man.

⁵ Ké nkéré ámu, n/chi n-chi busa ḿbú byití enwa ḿbú Ézerel bu-man, ké owo mú Jézerel.

⁶ Góma o-chîfwon nnyinyěng-wǎn, ntáng mún kyi/mû wǎn-onyinyi. Óburúkpâbí o-sét Hozáya o/fu, fé ǎ dyizîn ńdyí badakó Baa*tông ǎ Kyijé*. Ké nǎ, mm*ba/chi n-chîtông kyijé ne banet ḿbé Ézerel* nang opwoo to mm*pwoo to kámbé*.

⁷ Nké n/chi n-tông kyijé ne banet ḿbé Júda. Me Óburúkpâbí mú mu Osówo ebe n/chi n-nyii kámbé, nké mm*ba/chi n-kúng byití ḿbyí byidacen ne bushwám ne báre ne abán* ne bubyî-orá ne banyû bubyî-orá ne n-nyii kámbé*.

⁸ Ké nkéré mú Góma o/byii wǎn-onyinyi emen ámu, o-chîkoo dyifít, o-chîfwon wǎn-onyinchéng okíri.

⁹ Óburúkpâbí o-sét Hozáya o/fu, fé ǎ dyizîn ńdyí badakó *Chí Banet ejí*. Ké nǎ, banet ḿbé Ézerel baa*chi banet ejí* ne me to nn*chi Osówo ebe*.

Osówo o/chi o-bwât Ézerel

¹⁰ Banet ḿbé Ézerel ba/chi ba-jê wǎ éshíshě nyí ké baya, nyí ee*nwa epan* nang okan to ee*nwa ekan*. Kántîk, Osówo mu o-raa ng ne mbé o/fu, ben baa*chi banet ejí* nké dyicí ndyi dyi-bâ ńdyí o/chi o-sét kámbé o/fu, ben ba-chi i bwǎn ḿbé Osówo mú mu okpó.

¹¹ N/chi n-chîcibi banet ḿbé Júda ne ḿbé Ézerel kyikit kyibónge. Ne mbé bayén ba/chi ba-fîm onet-dyishí ebe obónge ne mbé ba/chi ba-chîjê ba-ca kashú ba-já byěm ké esí ebe. Ké ntûntû, dyicí ńdyí Jézerel dyi/chi dyi-kyú kiǐtí-dyicí.