Habákuk 3 - Bokyi Bible

Nshwam mú Habákuk o/fé

¹ Nyín nshwam mú Habákuk o/fé, o/fu,

² Ô Óburúkpâbí, me nn/jwo ńkyí wo aa/chi ne bushî boo/róng mě. Kántîk, chîchi ké nkéré mú eten biǐtí-akat ḿbyí a/mû a-chi i. Ri banet bafip nang kafâ nke ka-sa ng ǒ.

³ Osówo mu o-chî ng efím Édom o-bâ. Osówo mú mu kanong mu o-fím m ké eku nyí Páran o-bâ. Busan emen ḿbú ragerage mbu bu-cít ng bubóng, ne ejíí ee/sú ne akpee emen.

⁴ Nyǐ o-bâ ne kiinwángé ńkyí kasabang. Kasabang ka-kédê ng ké bubwô emen, ányi ké kyikit ńkyí o/rôo busa emen.

⁵ O-twóm m byirwóm byi-bwóp ǎ kashú, o-kye bukyû busa bu-bâ ǎ ké kyikû.

⁶ Â o/bwom, esí e-náng, â o/bírî achi, eshê e-tím banê. Eku nyí e/fím kpákpá e-bú ng e-róng kyísí. Eku nyí o/mû o-cen n ké nyǐ ké bankéré ḿbé ba/shwôm ké esim chwóó.

⁷ Me n/ri ké banet ḿbé Kúshan ba-kú ba-shî ng, banet ḿbé Médyan ba-tím m banê.

⁸ Óburúkpâbí, buce nké bu/chi ǒ ne a-sa kafâ? baya nké ba/chi ne kafâ ka-bírî ǒ? Wo a/yú a-cen ké éfíbí. Bubóng ḿbú boo/jîi nké bu/mû mútu eyên ké nkéré mú a/chi banet eyên ba-kpógê.

⁹ Wo a/kpá byiko ḿbyí adakúng búre eyên, [a-kpá byiko ḿbyí adaché abán eyên.] Buce eyên bu/ját esí byicê byifee.

¹⁰ Nkéré mú eku e/ri ǒ, e/tím banê, omu o-fím kyíbóng o-róng kyísí. Baya ḿbé ké kafâ-esí ba-náng ng bunâng emen bu-ribi kyíbóng.

¹¹ Ńdyí kasabang ńké abán eyên nyí adakwáng, ne ńké kyíbye eyên ńkyí kyidasan ka/kédê, óbyísû ne otukáku byi/bwom kyikit kyibónge.

¹² Wo a/cen a-nyáng ejíí ké busa-dyityém, ké kafâ esa eyên, wo a/cím eshê a-fé kyísí.

¹³ Wo a/dim a/fu, wo a-da ng enyii banet eyên, a/fu, wo a-da ng enyii otu eyên mú a/cá ǎ. Wo a/kpet onet-dyishí-banchi byibî a-twóp kyísí, [a-ju kángkáng banet ḿbé ba/mû ǎ ké kyikû.] [

¹⁴ Abán eyên a/tím onet-dyishí-basúja emen, ké nkéré mú ba/bê bě epwó byiryibyiryi wǎ afú nyí aryên, ba-jwó bě wǎ banet ḿbé mbe ba-cít ng banet-byikpu, banet baa*nyît*.]

¹⁵ Wo a/yú ké bubyî-orá eyên a-cím baya ḿbé baryên a-fé kyísí, omu mú mu ne busa o-fám biimpún.

¹⁶ Me n/jwo kángkáng byěm ḿbyín n-tím banê, byibî-ocím ejí byi-náng ne bushî. Enyam-byiko ejí e/nyîim, [byiká ejí byi-kpet ekpán] barî kyísí. Me n/chi n-kyú degere m-bám nkéré mú a/chi a-kye banet ḿbé mbe ba-kyâ bě bunwa busông.

¹⁷ Nang byichí-fyîk ne ḿbyí gerêp ne ḿbyí ólif byi*da/chîzím byirim* nang byifát byi*da/chîbát byiryíng* nang ebû e-kpú kángkáng, byise-bampong byi/waa kafâ dyikáá,

¹⁸ me n-chî ng ejêe n-kyú ké bunyîn-dyityém, ké nǎ, Osówo Óburúkpâbí mu Onet-Onyii ejí.

¹⁹ Óburúkpâbí mu o-kyâ mě busa. Mu o-chi i byiká ejí byi-shwane wǎ ḿbyí ekún, ne o-chi i chwǒm kii*ta mě kyíbóng-eku*.