Galíshan 6 - Bokyi Bible

Kû n̂g echwáp Barî ké Busông Enen

¹ Bwǎn-bané ejí, â ba/kám onet nang orá ké kyibî nang kyirá ńkyí o/chi, ben banet ḿbé baa/koo Busun-Osówo, chi n̂g ǎ o-firi kanong. Nké ba-man ba-chi kánkyí ké bukwóp ḿbú degere. Ben bayén, bám m̂ byiko enen, eringe nyí ben to baa*ba/chi ba-kan běn*.

² Chwáp n̂g barî ké busông ḿbú bamu ba-ri ng, ne ké bukwóp ḿbún, ben ba/chi ba-chi ńkyí kyije ńkyí Karâs kyi/sét kyi/fu, bachi.

³ Â onet mu o-kabe ng o/fu, nyǐ mu kiǐtí, mú ké ntûntû o*fí kiǐtí* onet ámu mu o-nîm m byiko emen.

⁴ Nang yeě nang yeě nyǐ oyén opan édúú emen mpan. Â édúú emen nyi e-nwa ng, onet ámu kâng o-man n etông kâng byiko kyi-kim ne ńkyí nyǐ oyén oo/chi. O*dachi o-kúng kánkyí o-kan ne ńkyí onet okíri oo/chi*.

⁵ Ké ebóng, nang yeě nang yeě o-man o-tû dyitû ńdyí emen nyǐ oyén.

⁶ Nang yeě nké mbe ba-tángê e ǎ kyitwóm ńkyí banet ḿbé ba/bángê ké Karâs, onet ámu okyii kángkáng byěm ḿbyí byinong ḿbyí nyǐ mu ne mbyí ne onet mú mu o-tángê e ǎ.

⁷ *Da n̂g echi ba-nîm byiko enen*. Onet o*fí mú odaman enîm Osówo*. Ochíchí-chwǒm ńkyí onet odakwón nké onet ámu odafuu.

⁸ Â onet ámu o/kwón ké kyifát ńkyí kyibî-dyityém emen, ké kyifát emen ánkyi, o/chi o-fuu byiryíng ḿbyí bukyû. Â o/kwón ké kyifát ńkyí Busun-Osówo, o/chi o-fuu byiryíng ḿbyí dyikpen ńdyí ne banyá.

⁹ Ké bubwô ḿbún kâng, byi*dachi byi-kyee ké byěm ḿbyí byinong echi*. Ké ebóng, â byi*da/zú abwô* nkéré o/chi o-bâ mú byi/chi byi-fuu ńkyí byi/kwón.

¹⁰ Ké bubwô ḿbún kâng, nang nkéré orá nké byi/já mpât, byichi kanong byi-kye nang yeě nang yeě, nké aciringaciring byi-kye banet ḿbé mbe ké kyikû-banet eten ńkyí byi/fé dyityém ne Karâs.

Nkuli Kyikû-Ekó ekuri ne Kyiraa eta

¹¹ Ri n̂g eringe nyí me mu n-sáng ng ne basáng-nwet ḿbé baryên eringe nyí me mu n-sáng ng běn kántîk ké bubwô ḿbú ejí me oyén.

¹² Banet ḿbé mbe ba-ryuu ng ba/fu, mbé ba-yip ng esim, ba-kûtông byiko kyi-kim ne byěm ḿbyí kyíjí, nké mbe banet ḿbé mbe ba-kan n ba/fu, mbé ba-tírîng ng běn, ba-cên běn. Mbé mbe ba-chi i kánkyí kâng, eringe nyí baa*ba/chi ba-kye kámbé busông* ké bubwô ḿbú kyikwap ńkyí ba/shwân Karâs ké nkyí*.

¹³ Nang banet ḿbé mbe ba-cên n ba*fí ba-chi i ńkyí Byije-Músis byi/sét*. Mbé mbe ba-ryuu ng ba/fu, ben bacên, eringe nyí mbé badaman etông byiko ba/fu, ben baa/bángê ba/fu, bacên běn.

¹⁴ Ké byiko ḿbyí ejí kâng, nang ké nkyi éné, me mu m-kpee ng byiko ejí ké bubwô ḿbú kyikwap ńkyí ba/shwân Jisos Karâs, Otu Kyítá eten ké nkyí nké nke. Ké ebóng, ké bubwô ḿbú kyikwap emen ánkyi, ejíí ee/kpú e-tî mě, me to m-kpú n-tî kányí.

¹⁵ Kyi*da/yángê* nang onet o/cên nang o*da/cên*. Nké ńkyí kyi/rêe kyi-shwôm nkyi něen, dyikpen eyángê ba-firi ké ńdyí dyifyîfî.

¹⁶ Bunyîn-dyityém ne dyityém ecángê byikyú ne kángkáng banet ḿbé mbe ba-câ ké kyiká-bucen ńkyín cibicibi ne kángkáng banet-Osówo.

¹⁷ Kyi-fím kurún kyi-ca kashú, onet nang obónge o*da mě echîkye afaníkong* ké ebóng, biintíngene-byibáp ḿbyí mbyi mě ké enyam-byiko ejí mbyi byi-tông ng byi/fu, me n-chi i ósóng mú Jisos.

¹⁸ Kyi/bát kanong ńké Jisos Karâs, Otu Kyítá eten kakyú ne ben ashí amúmú, ǎ bwǎn-bané ejí. Kyi/bát kyikyú éné.