Galíshan 4 - Bokyi Bible

¹ Mîng n-sét ńkyín ké bukwóp bukíri. Wǎn-onyinchéng mú o/chi o-ryí bukyû ḿbú bonchí, ba-tî ng ǎ eringe ebónge wǎ ósóng ké nkéré o/tôong wǎsíng, nang ké kángkáng byěm byi/já ǎ ké ntûntû.

² Ké nkéré mú o/tôong wǎsíng, banet mbe kô ḿbé bada ǎ etún, ba-tî ng byěm emen tete nkéré mú bonchí emen o/fé o-fyi.

³ Ké bukwóp ámbu bubónge, be byi/mû básóng ḿbé byibî-bací ḿbé mbe batu ḿbé ké ejíí, ne atyém eten a-kûkán.

⁴ Nké ké nkéré mú ochíchí-nkéré o/fyi, Osówo o/twóm Wǎn mú emen nyǐ oyén. Nyǐ o/bê wǎ wǎn mú onyinyi odafwon, ne o/kyú ké busa ḿbú byije ḿbyí banet-Jûs,

⁵ eringe nyí odanyii banet ḿbé ba/mû ké busa ḿbú Byije-Músis, eringe nyí be byidafiri bwǎn ḿbé Osówo.

⁶ Ké otông mú o/fu, nyǐ o-tông ng o/fu, ben ba-chi i bwǎn emen, Osówo o/twóm Busun ḿbú Wǎn emen bu-ba-nung ké atyém eten, Busun-Osówo ḿbú mbu bu-fâ nshwam bu-kó ng bu/fu, Kyítá.

⁷ Ké bubwô ḿbún kâng, ben ba*fí to básóng* nké ba/firi bwǎn. Ne, ké nǎ, ben ba-chi i bwǎn emen, Osówo o/chi o-kye běn kángkáng byěm ḿbyí o/tî bwǎn emen.

Pôl o/kérê Kanong Kanong kyi-kim ne Banet ḿbé Galísha

⁸ Ké nkéré mú o/shwôm ké esim, ben ba*da/nyît Osówo* ne ké bubwô ámbu, ben ba/mû básóng ḿbé erím-bakye nyí e*fí ké kafâ*.

⁹ Nké kántîk mú ba-kú ba-nyît ng Osówo, kakíri m/mû n/chi n-raa n/fu, kántîk mú Osówo o-kú o-nyît ng běn, ebóng ben ba/bwa ba-kú ba-ryuu ng ba/fu, ben ba-kú ba-chî ng ebírî ba-kâm bookyeekyee ne boonet-byikpu-bací ḿbé mbe ba-tún n ejíí. Ebóng bamu ba-chî ng eryuu ba/fu, ba-kyú u básóng ebe.

¹⁰ Ací akíri ne etukáku ekíri ne bankéré ḿbé dyije bakíri ne aje akíri mbyi běn róró ké achi.

¹¹ Bushî mbu bu-chi i mě ne ben. Kyi-man n ekyú kyi/fu, kángkáng bǎmkpóngé ḿbé me n/chi n-kye běn ba/waa kyísí dyikáá dí.

¹² Me mu n-tîm m běn arông, ǎ bwǎn-bané ejí, n/fu, kyú n̂g wǎ me, ké nǎ, me mu wǎ ben. Ben ba*da mě echi kyibî nang kyibónge*.

¹³ Ben bamu ba-zîim m ńkyí kyi/chi ne n-sét běn Bǎmpém ḿbé Banong ké nkéré mú mbwôp kashú. Kyi/mû, ké nǎ, me m/mû mu n-rwôm m.

¹⁴ Nké ben ba*da mě eciring* nang onê to ba*da mě ené* nang ké enyam-byiko-kyirwóm ejí e/mû běn kiǐtí-okan*. Nké ben ba/koo mě wǎ eringe nyí ba/mû ba/chi ba-koo orím mú onong mú Osówo. Ben ba/koo mě wǎ eringe nyí ba/mû ba/chi ba-koo Jisos Karâs.

¹⁵ Ben ba/mû ké bunyîn-dyityém kanong kanong. Ebóng kii/chi kántîk. Me oyén m-man n esét ńkyín kyi-kim ne ben n/fu, â kyi/mû kyi-nwa ng echi, ben ba/mû ba/chi ba-zú achi nyí enen ben bayén ba-kye mě.

¹⁶ Me n/firi onet-bushwôn enen kántîk ké ntûntû mú n/sét běn dí.

¹⁷ Banet ámbe ḿbé áku mbe ba-tông ng ba/fu, mbé mbe ba-kérê ng kanong kanong kyi-kim ne ben, nké ekabe ebe nyí mbe ba-kabe ng ne ben, *chí nyí enong*. Kyikíri ńkyí mbe ba-ryuu ng kyi*fí* kyi-cibi ne opap mú mbe ba-ryuu ng ba/fu, mbé ba-pap ng běn ne me* eringe nyí ben badakûkérê kyi-kim ne mbé ké dyizong-bukwóp ḿbú mbé mbe ba-kérê ng kyi-kim ne ben*.

¹⁸ Kyi-nwa ng ńkyí onet odakyú ne dyizong-kiǐtí-okére ámu ké bukwóp ḿbú bunong. Ńkyín nkyi ntûntû kángkáng nkéré, *chí ké nkéré mú me ndakyú ne ben nké nke*.

¹⁹ Bwǎn-dyityém ejí, n-chî ng ejwo dyizong-bubân ḿbú onyinyi mú o-kú o-fwon n wǎn odajwo ké dyishí enen tete dyityém ńdyí Karâs dyi-nung běn ké byiko kanong kanong.

²⁰ Kyi/mû kyi/chi kyi-nyîn mě! â me m/mû ne ben kántîk, eringe nyí m/mû n/chi n-yángê édúú ejí ne ben. Me mu n-kérê ng kanong kanong kyi-kim ne ben.

Eringe nyí Héga ne Sirá ba/bwom

²¹ Mîng n̂g mě m-bí běn ben mú bamu ba-ryuu ng ba/fu, ba-kyú u ké busa ḿbú Byije-Músis. Ben ba*fí ba-jwo ng ńkyí Nwet-Byije-Músis mu o-sét ng dí*.

²² Mbyi byi-sét ng byi/fu, Ébarahâm o/mû ne bwǎn-banyinchéng ashí afee. Obónge mú o/fwon ne onyi emen mú ósóng. Mú obónge mú o/fwon ne onyi emen mú o/mû o*fí ósóng*.

²³ Wǎn emen mú o/fwon ne ósóng ámu ba/fwon ǎ wǎ eringe nyí mbe ba-fwon n nang yeě nang yeě, nké wǎn emen mú o/fwon ne onyi emen mú o/mû o*fí ósóng* ba/fwon ǎ ké bubwô ḿbú ocím mú Osówo o/ryí Ébarahâm.

²⁴ Byi-man n ekúng ńkyín wǎ chwǒm ńkyí byidakan. Banyinyi ámbe ashí afee ba/bwom wǎ akwóp afee nyí Osówo o/ryí ocím ne o-sem byiko emen. Bubónge, mú o/bwom wǎ Héga, o/fím ké kaku ńké Sána, mú ba/fwon bwǎn emen ké kyikû-básóng.

²⁵ Héga o/bwom ké dyishí ńdyí kaku ńké Sána ńké nke ké Arébya, ne o/bwom wǎ oshê mú Jerúsélem mú mu ósóng ne kángkáng banet emen.

²⁶ Nké Sirá mú o/bwom ké dyishí ńdyí Jerúsélem mú kyíbóng o*fí ósóng* ne o-chi i boné eten.

²⁷ Ké ebóng, ejá-Osówo nyí ba/sáng kyísí e/sét e/fu, kyú ké bunyîn-dyityém, ǎ onyinyi mú o*da/fwon bwǎn*. Wonge kakânkakân ne bunyîn-dyityém, ǎ wo mú a*da/jwo bubân ḿbú wǎn efwon*. Ké ebóng, onyinyi mú ba/né ǎ o/chi o-firi ne bwǎn o-shwôm onyinyi mú mu o-kyú u ne otyép emen.

²⁸ Ben kántîk, ǎ bwǎn-bané ejí, ba-chi i bwǎn ḿbé Osówo ké bubwô-ocím emen mú o/ryí, wǎ eringe nyí Ázik mú wǎn-Sirá o/mû.

²⁹ Ké nkéré ámu, Éshimal mú wǎn-Héga, mú ba/mû ba/fwon ǎ ké bukwóp ḿbú mbe ba-fwon n nang yeě nang yeě, o/kye Ázik mú ba/fwon ǎ ké bubwô ḿbú Busun-Osówo busông. Ne éné to nké nkyi kántîk.

³⁰ Nké ejá-Osówo nyí ba/sáng kyísí e/sét nǎ. E/sét e/fu, ró onyinyi mú mu ósóng ne wǎn emen. Ké ebóng, wǎn mú onyinyi mú mu ósóng ne mú onyinyi mú o*fí ósóng* baa*ba/chi ba-ryí bukyû ḿbú bonchí ne barî*.

³¹ Ké bubwô ḿbún kâng, ǎ bwǎn-bané ejí, be byi*fí bwǎn ḿbé onyinyi mú mu ósóng* nké byi-chi i ḿbé onyinyi mú o*fí ósóng*.