Galíshan 3 - Bokyi Bible

Byije-Músis ne Dyityém efé ne Jisos Karâs

¹ Ben banet-Galísha bamu enyam. Yeě o/yángê běn atyém. Me m/bwom ké bushú enen n-sét běn eringe nyí Jisos Karâs o/kpú ké kyikwap ńkyí badashwân onet.

² Sét n̂g mě chwǒm ńkyín něen kyibónge nké nke. Ben ba/koo Busun-Osówo ké ochi mú ba/chi ńkyí Byije-Músis byi/sét aa, aa ké ojwo mú ba/jwo Bǎmpém ḿbé Banong ba-bángê to ké mbé.

³ Ebóng enyam nyi e-chi i běn éné. Ben ba/kpet ké busa ḿbú Busun-Osówo, ben bamu ba-ryuu ng kántîk ba/fu, ben ba-man n ké busa ḿbú enen dí.

⁴ Kángkáng byěm ḿbyí ben ba/nyît byi/waa kyísí dyikáá dí. Ké ntûntû, ńkyí ben ba/nyît kyi/byí chwǒm.

⁵ Osówo mu o-kyâ běn Busun emen, o-chi i biǐtí-akat ké burwám enen, ké nǎ, ben bamu ba-chi i ńkyí Byije-Músis mbyi byi-ryuu ng dí, aa, ké nǎ, ben bamu ba-jwo ng ba-bángê e to ké Bǎmpém ḿbé Banong.

⁶ Nkyi wǎ eringe nyí ejá-Osówo nyí ba/sáng kyísí e/sét kyi-kim ne Ébarahâm e/fu, Ébarahâm o/bángê ńkyí Osówo o/sét ǎ, ne ké bubwô ḿbú dyityém ńdyí Ébarahâm o/fé ne Osówo, Osówo o/koo ǎ wǎ onet mú onong.

⁷ Ben ba-man ba-nyît kâng ba/fu, banet ḿbé ba/fé dyityém ne Osówo nké mbe bachíchí-banet ḿbé ba/fím ké kyikû ńkyí Ébarahâm.

⁸ Banet ḿbé ba/sáng ejá-Osówo nyí ba/sáng kyísí ba/nyît ba/fu, Osówo o/chi o-két mpan o-nwa banet ḿbé ba*fí banet-Jûs* ké bubwô-dyityém efé ne nyǐ. Ne ké bubwô ámbu kâng, ejá-Osówo nyí ba/sáng kyísí e/sét Ébarahâm Bǎmpém ḿbé Banong ne nkéré o-kûfyi, e/fu, ké bubwô eyên, Osówo o/chi o-jware kángkáng banet ḿbé ké ejíí.

⁹ Ébarahâm o/bángê, ne Osówo to o/jware ǎ. Ké bubwô ámbu to, kángkáng banet ḿbé mbe ba-bángê e Osówo mu o-jware ng kámbé, wǎ eringe nyí o/jware Ébarahâm.

¹⁰ Banet ḿbé mbe ba-jêem m esim ké byěm echi ḿbyí Byije-Músis mbyi byi-ryuu ng mbe ba-kyú u ké bukwóp ḿbú kyishû ńkyí Osówo. Ké ebóng, ejá-Osówo nyí ba/sáng kyísí e/sét e/fu, nang yeě nké kángkáng nkéré o*fí o-chi i kángkáng byěm ḿbyí ba/sáng ké Nwet-Byije-Músis* ányi Osówo oo/shú onet ámu.

¹¹ Ké bubwô ámbu, nkyi wááng kyi/fu, onet o*fí mú Osówo odakét mpan o-nwa ǎ ké bubwô ḿbú Byije-Músis* ké ebóng, ejá-Osówo nyí ba/sáng kyísí e/sét e/fu, nang yeě nké Osówo o/két mpan o-nwa ǎ ké bubwô ḿbú dyityém efé ne nyǐ, onet ámu o/chi o-kpen.

¹² Nké Byije-Músis byi*da/jêem esim ne dyityém efé*. Nké wǎ eringe nyí ejá-Osówo nyí ba/sáng kyísí e/sét e/fu, onet mú mu o-chi i kángkáng byěm ḿbyí Byije-Músis mbyi byi-ryuu ng, onet ámu o/chi o-kpen ké bubwô-byije ámbyi.

¹³ Nké Karâs oo/chi bě byi-fem ké kyishû ńkyí Osówo ńkyí Byije-Músis mbyi byi-bâ ne nkyí, ké bubwô ḿbú nyǐ o/bírî onet-kyishû ké dyishí eten. Ké ebóng, ejá-Osówo nyí ba/sáng kyísí e/sét e/fu, nang yeě nké ba/shwân ǎ ké kyichí, ányi Osówo oo/shú onet ámu.

¹⁴ Karâs o/chi ńkyín, eringe nyí Osówo o/chi o-yip ojware mú o/ryí Ébarahâm ocím o-kye banet ḿbé ba*fí banet-Jûs* ké bubwô-Jisos Karâs, eringe nyí be ké bubwô-dyityém efé ne Karâs, byi-man n ekoo Busun ḿbú Osówo o/ryí ocím.

Byije-Músis ne Ocím mú Osówo o/ryí

¹⁵ Bwǎn-bané ejí, me mu m-bâ ebakan chwǒm ńkyí byimu byi-nyît ng kángkáng nkéré. Â banet ashí afee ba/bángê ké chwǒm, ba-ryí ocím, ba-nye efwa kyísí, onet o*fí mú odaman ebên ocím ámu* nang chwǒm kyikíri to oo*man efé ké mǔ*.

¹⁶ Osówo kâng o/ryí Ébarahâm ne onet-kyikû emen ocím kampén chwóó. Ejá-Osówo nyí ba/sáng kyísí e*da/sét e/fu, ne kyikû-banet eyên* ńkyí kyi/byí banet chwóó*. Nké e/sét e/fu, ne onet-kyikû eyên, ányi kyi/byí, onet obónge nké nke, ne onet ámu o-chi i Karâs.

¹⁷ Ńkyí me mu n-sét ng nkyi něen. Osówo o/ryí Ébarahâm ocím o-sem byiko emen, o-bángê o/fu, nyǐ o-tî ng kámú. Byije ḿbyí Osówo o/kye Músis, ányi égot-aje efee esim-aje bujam esim diǐkpú ee/shwôm, bii*man ebên* byi-byiryi ocím ámu mú Osówo o/ryí*.

¹⁸ Ké ebóng, â ńkyí Osówo mu o-kyâ kyi/jêem esim ne Byije-Músis, ányi kâng kyi*da/chîjêem esim ké ocím emen mú o/ryí*. Nké kyi/mû ké bubwô ḿbú Osówo o/mû oo/ryí Ébarahâm ocím nké o/kye ǎ kánkyí.

¹⁹ Byije-Músis byi/bwom ké ebóng kâng. Ba/kúng kámbyí ba-cibi eringe nyí byidatông chwǒm ńkyí badakó kyibî echi, ne Osówo o/fu, byikyú tete onet-kyikû ńkyí Ébarahâm mú Osówo o/ryí ǎ ocím o-bâ. Músis o/bwom ké otyém ne o-koo byije-Osówo ké abwô nyí barím ḿbé banong.

²⁰ Nké onet mú odabwom ké otyém oo*chi to* â onet mu obónge*. Ne Osówo o/bwom kǎnchí.

Dyishí ńdyí Byije-Músis byi/bwom

²¹ Ńkyín kyi/byí kyi/fu, Byije-Músis byi*da/bángê ne byěm ḿbyí Osówo o/ryí ocím dí. Aa*wááng* kyi*fí éné*. Ké ebóng, â baa/kye kyije ńkyí kyidaman ekye onet dyikpen, ányi kyi/byí, Osówo mu o-két ng mpan o-nwa onet ké bubwô ḿbú kyije.

²² Nké ejá-Osówo nyí ba/sáng kyísí ee/sét e/fu, ejíí emúmú nyi ké busa ḿbú byibî, eringe nyí banet ḿbé mbe ba-bángê e ne nyǐ ké bubwô ḿbú dyityém efé ne Jisos Karâs badakoo eyáré nyí Osówo o/ryí ocím.

²³ Ne nkéré mú badafé dyityém ne Jisos o-fyi kâng, Byije-Músis byi/fín bě ké kafâ-kyise wǎ bamgbokobá tete dyityém efé ńdyín ńdyí ndyi dyi-bâ, dyi-byí kyíjí wááng.

²⁴ Ké bubwô ámbu, Byije-Músis nké byi/mû byi-bám m bě tete Karâs o-bâ, eringe nyí Osówo odakét mpan o-nwa bě ké bubwô ḿbú dyityém efé ne Jisos.

²⁵ Kántîk mú byi/firi ké nkéré mú dyityém efé ne Karâs, Byije-Músis byi*fí to byi-bám m bě*.

²⁶ Ké ebóng, ké bubwô ḿbú dyityém efé ne Karâs nké ben ashí kángkáng bamu bwǎn ḿbé Osówo ké ocibi ne Jisos Karâs.

²⁷ Ben baa/kye běn osoo mú Osówo ké ocibi ne Karâs, ké bubwô ámbu kâng, ben ba/firi to wǎ Karâs oyén.

²⁸ Ne ké bubwô ámbu to kâng, banet-Jûs ne ḿbé ba*fí banet-Jûs* básóng ne banet ḿbé ba*fí básóng* banyinchéng ne banyinyi ba*da/yángê ne barî*. Ké ebóng, ben ashí amúmú bamu wǎ onet obónge ké ocibi ne Jisos Karâs.

²⁹ Â ben bamu banet ḿbé Karâs kâng, ányi kyi/byí, ben ba-chi i banet ḿbé kyikû ńkyí Ébarahâm, ne ben to ba/chi ba-koo ńkyí Osówo o/ryí Ébarahâm ocím.