Galíshan 1 - Bokyi Bible

¹ Me Pôl mú dyikô ńdyí ba/kó mě ba/fu, nfiri onet-kyitwóm mú Jisos, dyi*da/fím ne onet* nang ké bubwô ḿbú onet* nké dyi/fím ne Jisos Karâs ne Osówo Bonchí eten mú o/jwóbê ǎ ké bukyû, nké mu n-sáng ng léta mún.

² Kángkáng barî-banet eten ḿbé ba/bángê ké Karâs ḿbé mbe ké oshê mún ba/cibi ne me ba/fu, me nta byise-ékwâbashi nyí Karâs ḿbyí mbyi ké Galísha kyiraa.

³ Kyi/bát Osówo Bonchí eten ne Jisos Karâs, Otu Kyítá bakye běn ochwâp ne bunyîn-dyityém.

⁴ Karâs o/kye byiko emen ké dyishí ńdyí byibî eten, ké ochi mú o/chi eringe okabe mú Osówo mú mu Bonchí eten o/sét, eringe nyí oda bě echi byi-fem ké kyibî-nkéré ńkyí kántîk.

⁵ Akpee akyú ne Osówo ne banyá ne banyá. Kyi/bát kyikyú éné.

Bǎmpém ḿbé Banong mbe Babónge

⁶ Byiko bii/kaa mě ne ben. Ka*da/bwon nang kaǎnyín* ben ba-kú ba-mîng ng onet mú o/kó běn ké bubwô ḿbú ochwâp mú Karâs, ne ba-kú ba-jwo ng bǎmpém bakíri.

⁷ Ké ntûntû, bǎmpém ḿbé banong bakíri ba*fí to*. Nké me mu n-raa ng ńkyín, ké ebóng, banet bakíri mbe kô ḿbé mbe ba-chi i atyém enen a-firi yógeyóge, ne mbe ba-kan n ba/fu, mbé ba-yángê e Bǎmpém ḿbé Banong kyi-kim ne Karâs.

⁸ Nké â nang be nang orím mú onong mú o/fím kyíbóng nké o/fu, nyǐ o-sét ng běn bǎmpém bakíri ḿbé ba/yángê ne ḿbé be bii/sét běn, Osówo oshú ǎ, ofé ǎ ké kyikit-busông eri.

⁹ Be byi/mû bii/sét kánkyí, ne n-chî ng esét kánkyí kántîk n/fu, â nang yeě nké mu o-sét ng běn bǎmpém bakíri ḿbé ba/yángê ne ḿbé ben ba/bángê ké mbé, Osówo oshú onet ámu, ofé ǎ ké kyikit-busông eri.

¹⁰ Ńkyín nkyi kyi-tông ng wǎ me mu n-ryuu ng n/fu, banet bakû mě ekpee dí. Aa*wááng*. Me mu n-ryuu ng akpee nyí Osówo. Me mu n-ryuu ng n/fu, banet bakû mě ekpee dí. Â me m/mû n/tôong n-kan n n/fu, n-chi i éné, me m/mû mm*ba/chi n-kyú ḿgbán mú Karâs*.

Eringe nyí Pôl o/cen ne o-firi Onet-Kyitwóm mú Karâs

¹¹ Me n-sét ng běn wááng, ǎ bwǎn-bané ejí, n/fu, Bǎmpém ḿbé Banong ḿbé me mu n-sét ng, *chí onet nké o/chi kámbé*.

¹² Ké nǎ, me n*da/jwo kámbé ne onet nang obónge* nang onet to nang obónge o*da mě etángê kámbé*. Nké Jisos Karâs oyén nké o/kye mě kámbé.

¹³ Baa/sét běn kyi-kim ne eringe nyí me m/mû ké nkéré mú m/mû n/kúng byiko ejí n-kye ké bukwóp ḿbú banet-Jûs mbe ba-fâ Osówo, eringe nyí m/mû n-kyâ banet-ncibi mú Osówo busông nang bafip baa*chi mě* ne n-nwa kanong kanong n/fu, m-bên n ncibi ámu.

¹⁴ Ké bujê-otáng eten to mú banet-Jûs, me nké m/mû mbwôp kashú-onet mú m/mû n-fâ Osówo ké bukwóp ḿbú banet-Jûs mbe ba-fâ ǎ. Me nké m/mû n/jang ekúng édúú nyí banchí eten ḿbé kpákpá.

¹⁵ Nké Osówo ké kanong emen o/cá mě kpá, ne ba-kû mě efwon, ne o-kó mě o/fu, me nchi bǎmkpóngé emen.

¹⁶ Ne ké nkéré mú nyǐ o/kabe o/fu, nyǐ o-tông ng mě Wǎn emen gbúúl, eringe nyí me ndasét banet ḿbé ba*fí banet-Jûs* Bǎmpém ḿbé Banong kyi-kim ne Wǎn emen, me n*da/ce n-kâm onet nang obónge n/fu, okye mě bacê*.

¹⁷ Nang Jerúsélem to n*da/ce n/fu, n-da ng eri banet ḿbé ba/mû banet-kyitwóm-Jisos kpá ba-sí mě*. Nké n/dim odǐm n-wâa Arébya, ne m-bwa esim kâng ké Damásákus.

¹⁸ Ké nkéré mú kii/shwôm aje achât nké n/ce Jerúsélem n/fu, n-da ng eri Pyíta, ne n-rí ne nyǐ byipyán byifee.

¹⁹ Me n*da/ri onet-kyitwóm-Jisos okíri kyi-cibi ne Jêmsyi mú wǎn-boné-Otu Kyítá*.

²⁰ Ńkyí mu n-sáng ng nkyi ntûntû ké bushú ḿbú Osówo.

²¹ Ké nkéré mú kii/chîrí, me n/ce eshê nyí nyi ké Syírya ne Silyísha.

²² Ké nkéré ámu, banet ḿbé ba/mû ké ékwâbashi nyí Karâs ké Judyâ ba/mû ba*fí ba-nyît ng mě ké achi*.

²³ Ba/mû ba-nyît ng nké nke ńkyí banet bakíri ba/sét ba/fu, onet mú o/mû o-kyâ bě busông oo/bírî kántîk o-kú o-sét ng banet kyi-kim ne dyityém efé ne Karâs ńdyí nyǐ o/mû o/kan ké nkéré obónge o/fu, nyǐ o-bên n.

²⁴ Ne ba-kpee kâng Osówo ké bubwô ejí.