Fyilyípyan 4 - Bokyi Bible

Bacê

¹ Ké bubwô ámbu kâng, ǎ bwǎn-bané ejí, ben bamu mě ké dyityém kanong kanong. Kyi*fí kyi-nyîn n mě eringe nyí me m/mîng běn*. Ben ba/chi mě n-kyú ké bunyîn-dyityém kanong kanong, ne mu n-tông ng byiko kanong kanong kyi-kim ne ben. Éné, ǎ bwǎn-bané ejí, nké ben badaman ba-bwom kíngkíng ké dyikpen enen ne Otu Kyítá.

² Me mu n-tîm m běn arông, ǎ Ewúdya ne Sintyíke, n/fu, kan n̂ ba-kûkwárê ne barî wǎ bwǎn-bané ké bubwô ḿbú Otu Kyítá.

³ Wo to mú amu óten-onet-bǎmkpóngé, mú amu a-chi i ńkyí n/sét ǒ, mu n-ryuu ng ǒ n/fu, chwáp banyinyi ḿbén. Ké ebóng, mbé baa/chi bǎmkpóngé kanong kanong ne me ké osêt mú byimu byi-sét ng banet Bǎmpém ḿbé Banong, cibicibi ne Kélémen ne kángkáng barî-banet-bǎmkpóngé ejí ḿbé áku, ḿbé azîn ebe nyi ké nwet-Osówo mú banet ḿbé badakpen ne banyá.

⁴ Kyi/bát ben bajêe kángkáng nkéré ké dyikpen enen ne Otu Kyítá. M/bwa n-chînye n-raa n/fu, jêe n̂g.

⁵ Tông n̂g kángkáng banet dyityém ńdyí dyinong. Otu Kyítá mu o-bâ abeabe.

⁶ *Da n̂g ekérê kyi-kim ne chwǒm nang kyibónge*. Nké ké kángkáng banshwam enen efé, bí n̂g Osówo kyi-kim ne ńkyí bamu ba-ryuu ng. Nang nkéré orá, bí n̂g ǎ ké bukwóp ḿbú asǎma ekó.

⁷ Ne bunyîn-dyityém ḿbú Osówo ḿbú bu/shwôm byinyídíng ḿbyí onet bu/chi bu-kûbám atyém enen ne okabe enen kanong ké ocibi ne Jisos Karâs.

⁸ Ké nkuli kyikû, ǎ bwǎn-bané ejí, kû n̂g echi byěm ḿbyí byinong ḿbyí byida běn ekye akpee. Byěm ḿbyí mbyi ntûntû, ḿbyí biǐtí, ḿbyí mbyi kanong, ḿbyí kpárádádát, ḿbyí mbyi byi-nwa ng ne mbyi ne ofê.

⁹ Kû n̂g echi byěm ḿbyí ben ba/kwâa, ba-koo ne me, kángkáng ḿbyí ben ba/koo ké byiraa ejí ne ké édúú ejí. Ne Osówo mú mu o-kyâ bě bunyîn-dyityém o/chi o-kyú ne ben.

Asǎma ekó ké Bubwô-Eyáré

¹⁰ Bunyîn-dyityém ḿbú me mu ne mbú ké dyikpen ejí ne Otu Kyítá bu/jê kanong kanong. Nang ké kii/rí něen chwóó, ben ba/chîjá mpât mú badatông ba/fu, ben bamu ba-kérê ng kyi-kim ne me. Me n*da/sét n/fu, ben ba/mû baa/mîng ekérê kyi-kim ne me*. Ben ba/mû ba*fí ofíng ne mpât mú badatông kánkyí*.

¹¹ Ne me n*fí n-raa ng ńkyín* ké nǎ, me mu n-kabe ng n/fu, ben baa/né mě*. Ké ebóng, me nn/kwâa eringe nyí ndaman ekyú kanong ne ńkyí me mu ne nkyí.

¹² Me mu n-nyît ng eringe nyí nkyi, â onet o*fí ne chwǒm* ne eringe nyí nkyi, â onet mu ne byěm byi-jê byi-shwôm eringe nyí mu o-ryuu ng. Me nn/kwâa kadip ńkén. Eringe nyí nang me mu nyá, nang ké nkéré orá, me kyi-kwárê ng mě, nang n/zût, nang mu esong, nang byěm bii/jang mě ejê, nang byi/jang mě esîi.

¹³ Me mu ne busa ḿbú Karâs mu o-kyâ mě ḿbú ndakyú nang ké ebóng dyikpen.

¹⁴ Nké ben ba/cángê dyityém kanong kanong ńkyí ba/chwáp mě ké afaníkong ejí.

¹⁵ Ben banet ḿbé ba/fím Fyilyípa, ben bayén bamu ba-nyît ng kanong kanong ba/fu, ké nkéré me m/mîng Masedónya, ké bambwôp kashú-ací nyí m/kpet esét banet Bǎmpém ḿbé Banong, ben kǎnchí ké burwám-banet-ékwâbashi nyí Karâs nké ba/chwáp mě. Ben nké ba/mû ne me ké byěm ḿbyí n/ryí mpún ne ḿbyí n*da/ryí*.

¹⁶ Kampén kafee, ké nkéré m/mû n-ryuu ng ochwâp, ńdyí m/mû ké Tesalonáka, ben ba/twóm mě ochwâp ámu.

¹⁷ Kyi*fí wǎ me mu n-ryuu ng n/fu, n-koo ng eyáré* nké me mu n-ryuu ng n/fu, mpún onung běn ké akpuga enen.

¹⁸ Nyín kâng dyishí-nwet ńdyí dyi/bwom ké kángkáng byěm ḿbyí ben baa/kye mě. Byěm ámbyi bii/jê byi-shwôm ne eringe nyí me mu n-ryuu ng. Me mu ne kángkáng byěm ḿbyí mu n-ryuu ng, kántîk mú Epaforodátus oo/ba mě ekye kángkáng eyáré enen. Eyáré ńnyín nyi wǎ byěm ḿbyí byidanyîn kyinong ḿbyí badakye Osówo wǎ kyifen echi ńkyí nyǐ odakoo ne ńkyí kyida ǎ enyîn dyityém.

¹⁹ Ne Osówo ejí, ne kángkáng bujê-efang emen ké Jisos Karâs, o/chi o-kye běn kángkáng byěm ḿbyí bamu ba-ryuu ng.

²⁰ Akpee akyú ne Osówo mú mu Bonchí eten ne banyá ne banyá. Kyi/bát kyikyú éné.

Nkuli Kyikû-Kyiraa eta

²¹ Ta n̂g kángkáng banet-Osówo ḿbé mbe ké ocibi ne Jisos Karâs kyiraa. Barî-banet eten ḿbé kwán ne me ba/ta běn kyiraa.

²² Kángkáng banet-Osówo ḿbé mbe kwán, aciringaciring ḿbé mbe ké kyibám ńkyí otu mú Rûm ba/ta běn kyiraa.

²³ Kyi/bát kanong ńké Jisos Karâs, Otu Kyítá kakyú ne ben ashí amúmú.