Biblia Todo Logo
Bìoball air-loidhne

- Sanasan -

Fyilyípyan 3 - Bokyi Bible


Kanong echi ńké Ntûntû

1 Ké nkuli kyikû, ǎ bwǎn-bané ejí, kyi/bát Otu Kyítá okye běn bunyîn-dyityém chwóó. Me n*fí n-kérê ng* â n/chîsáng ńkyí m/mû nn/sáng ké kashú* ne kyi/chi kyi-chwáp běn ba-kyú kanong.

2 Bám m̂ byiko enen ne banet ḿbé mbe ba-chi i byibî-byěm. Banet ámbe ḿbé mbe wǎ bubyî, ḿbé mbe ba-tú ng dyishí ba/fu, mbé ba-jwóm m enyam-byiko ba-két.

3 Ké ebóng, be nké byi/cên ochíchí-dyicên, *chí mbé* ké ebóng, be byimu byi-fâ Osówo ké bubwô ḿbú Busun emen ne byimu byi-jêe ng ké dyikpen eten, ké ocibi ne Jisos Karâs. Be byi*fí byi-fâ atyém eten ké byěm ḿbyí badachi ké enyam-byiko nyí kyíjí*.

4 Me m-man n efé dyityém ejí ké azong-byěm ányi. Â onet nang obónge mu o-kabe ng o/fu, nyǐ o-man n efé dyityém emen ké byěm ḿbyí badachi ké enyam-byiko nyí kyíjí, o-kyú kanong, me mu ne bukwóp ḿbú bu/nwa bu-shwôm ḿbú ndafé dyityém ké mbyí.

5 Ba/fwon mě n-rí kyipyán kyibónge ba-cên mě. Me n-chi i onet-Ézerel ké kyikû ńkyí Běnjámin, onet-Hyíburus mú baróng emen ba*fí chwápchwapchwáp*. Kyi-kim ne byije ḿbyí banet-Jûs etî, me m/mû onet-ncibi mú badakó Fárasyî.

6 Me m/mû m/bángê ké ncibi ámu kanong kanong, ńkyí kyi/chi mě n-kye banet-ékwâbashi nyí Karâs busông, kyi-kim ne eringe nyí Osówo odakét mpan o-nwa onet ké byěm echi ḿbyí Byije-Músis byi/sét, me m/mû n*fí ne ébîn nang ebónge*.

7 Nké kángkáng byěm ámbyi ḿbyí me m/mû n/chi m-pan kámbyí wǎ mpún, kántîk, n-kú n-kabe ng n/fu, byi*da/byí chwǒm* ké bubwô ḿbú Karâs.

8 *Chí nang byěm ámbyi nké nke*. Me mu n-kabe ng kyi-kim ne kángkáng byěm n/fu, byi*da/byí chwǒm* ké bubwô ḿbú chwǒm ńkyí kyi/rêe kyi-shwôm. Chwǒm ánkyi, ányi onyît kyi-kim ne Jisos Karâs, Otu Kyítá ejí. Ké bubwô emen, me mm/pwó kángkáng byěm, byi/firi mě wǎ biǐbyém-byiryíng, eringe nyí ndakoo Karâs,

9 ne eringe nyí ndacibi to ne nyǐ kanong kanong. Me n*fí to ne kanong ńké ejí me oyén* dyizong-kanong ándyi ńdyí onet odakoo kándyí ké bubwô-Byije-Músis etî*. Me kántîk n/firi ne kanong ńké Osówo odakye onet ké bubwô ḿbú dyityém efé ne Karâs. Kanong ánke ka/fím ne Osówo, ne ka/jêem esim ké dyityém efé ne Karâs.

10 Ńkyí me mu n-ryuu ng kángkáng kyi/byí Karâs enyît, ne n-nyît to busa emen ḿbú bu/fím ké ojwóbe emen ké bukyû. N-ri to busông wǎ eringe nyí nyǐ o/ri, ne n-firi to wǎ nyǐ ké bukyû emen ḿbú o/kpú.

11 Ké okabe mú ndakabe n/fu, me to Osówo o/chi o-jwóbê mě m-bwa esim ké dyikpen.


Me mu n-zóngê e n-câ ké Dyifyi

12 Me n*fí n-sét ng n/fu, kii/byí mě dyishí* nang n-sét ng to n/fu, me nn/kwárê kerededet*. Me n/tôong n-kan n n/fu, n-koo ng eyáré ányi nyí Jisos Karâs oo/koo mě kpá o-kye byiko emen.

13 Ké ntûntû, ǎ bwǎn-bané ejí, me n*fí n-kabe ng n/fu, me mm/kpógê ké nkyí*. Nké chwǒm kyibónge ńkyí me mu n-chi i nkyi něen, me mu n-zú ng dyityém ejí ké ńkyí nkyi mě ké esim, ne mu n-nwa ng ne busa ejí kángkáng, eringe nyí ndakâm ńkyí nkyi mě ké kashú.

14 Me mu n-zóngê e kâng n-câ dángdáng ké dyifyi, eringe nyí ndakoo eyáré ányi. Eyáré ányi e-chi i okô mú Osówo mu o-kó ng banet ké bubwô ḿbú Jisos Karâs o/fu, bajâ ké dyikpen ńdyí kyíbóng.

15 Be kángkáng mú bii/kán ké dyityém, byikyú ne okabe ámu obónge. Â banet bakíri kâng ké burwám enen mbe ne okabe okíri, Osówo o/chi o-chi ńkyín kyi-wángê běn.

16 Nang kyi/bwa kyi-kyú nǎ, byica n̂g kashú ké bukwóp ámbu bubónge ḿbú bii/cen ké mbú tete byi-ribi kántîk.

17 Bwǎn-bané ejí, kû n̂g mě eleme ba-ca kashú. Be bii/tông běn kyiká-bucen ńkyí kyinong. Kû n̂g etî atông kâng ba-jwo banet ḿbé mbe ba-câ kashú ké kyiká-bucen ánkyi.

18 Me m/mû nn/sét běn kyi-kim ne chwǒm ńkyín kampén kampén. Ne kántîk n-kú n-chî ng eraa kyi-kim ne nkyí ne batíí ké achi, n/fu, banet mbe kô chwóó ḿbé akpen ebe nyi a-chi i kámbé ba-firi banet-bushwôn ḿbé Karâs ké bukyû emen ḿbú o/kpú ké kyikwap ńkyí ba/shwân ǎ.

19 Nkuli kyikû mú banet ámbe o/chi o-kyú ké kyikit-busông eri. Ké ebóng, Osówo mú banet ámbe, ányi byěm ḿbyí enyam-byiko ebe nyi e-ryuu ng. Mbé ba-tông ng byiko ké byěm ḿbyí éshwân e/mû e/chi e-kûchi kámbé. Ne mbé to mbe ba-kabe ng kyi-kim ne byěm ḿbyí mbyi ké ejíí ńnyín nké nke.

20 Nké be byi-chi i banet ḿbé oshê mú kyíbóng. Ne byimu byi-tî ng achi byi/fu, Onet-Onyii eten ofím kyíbóng o-bâ babap, ányi Jisos Karâs, Otu Kyítá.

21 Nyǐ o/chi o-yángê enyam-byiko eten nyí nyi kyeekyee, nyí edakpú, o-chi kányí e-firi wǎ nyí emen nyǐ oyén, nyí nyi ne busan ḿbú ragerage. O/chi o-kúng busa ḿbú nyǐ odaman echi kángkáng byěm byi-firi ké bubwô emen, ne o-yángê kányí.

Published by the Bible Society of Nigeria @ 1985

Bible Society of Nigeria
Lean sinn:



Sanasan