Fyilyípyan 2 - Bokyi Bible

Eringe nyí Karâs o/jwâa Byiko Emen Kyísí ne eringe nyí mu Kiǐtí

¹ Dyikpen enen ké Karâs ndyi dyi-chi i běn ba-kyú shwaneshwane dí. Kyijé emen nkyi kyi-fâ běn dyityém dí. Ben bamu ké bucín ne Busun-Osówo dí. Ben bamu ba-cángê e dyityém ne barî, ba-ri ng barî bafip dí.

² Me mu n-tírîng ng běn kâng n/fu, chi n̂g mě n-kyú ké bunyîn-dyityém kanong kanong ké byěm ekabe eringe ebónge ne kyijé kyibónge ekyú ne barî ne okyû mú badakyú ne barî ké dyityém dyibónge ne okabe obónge.

³ *Da n̂g echi chwǒm nang kyibónge ne okabe mú badakye byiko enen* mú byiko etông*. Nké kúng n̂g byiko enen kyísí ne barî, ba*dachi ba-kûkabe ba/fu, me n/cángê n-shwôm banet ḿbé áku*.

⁴ Kû n̂g ekyé byěm ḿbyí byidajê barî-banet ḿbé áku, *chí ḿbyí byida běn ejê ben nké nke*.

⁵ Dyityém ńdyí badaman ba-kyú ne ndyí, ndyí nké Jisos Karâs o/mû ne ndyí, ńdyí dyi/fu,

⁶ kángkáng nkéré, nyǐ mu dyizong dyibónge ne Osówo. Nké nyǐ o*da/kabe o/fu, ké busa, nyǐ o-kan n o-firi jangjang ne Osówo*.

⁷ Nké ké okabe mú emen nyǐ oyén, nyǐ o/zú abwô ké nkyí, ne o-kúng dyizong ńdyí ḿgbán. Nyǐ o/firi wǎ onet, ne o-byí ne enyam-byiko wǎ nyí onet.

⁸ Nyǐ o/bwa ne byiko emen kyísí kyísí, ne nyǐ o-cen ké kiǐfáng ńkyí ofê ekye o-ribi ké bukyû, bukyû emen ḿbú o/kpú ké kyikwap ńkyí ba/shwân ǎ ké nkyí.

⁹ Ké bubwô ḿbún, Osówo oo/yip ǎ o-tî ké kyikit ńkyí kyi/nyâam kyi-shwôm kyíbóng. Ne o-fé ǎ to dyizîn ńdyí dyi/rêe dyi-shwôm dyizîn nang dyirá nang dyirá.

¹⁰ Eringe nyí ké ofê mú dyizîn ńdyí Jisos, kángkáng byěm ḿbyí mbyi kyíbóng ne ḿbyí mbyi ké ejíí ne ḿbyí ké oshê-bakúsí byi-man byi-tím arông ebe kyísí.

¹¹ Ne mbyí kángkáng to byi-man byi-sét wááng byi/fu, Jisos Karâs o-chi i Otu Kyítá, ké akpee nyí Osówo Bonchí eten.

Kû n̂g esan wǎ Etyuryíkáng ké Ejíí

¹² Ké bubwô ḿbún kâng, ǎ bacín-dyityém ejí, eringe nyí kángkáng nkéré ba/chi ńkyí n/sét běn, ké nkéré mú me m/mû ne ben, nkyi kiǐtí kyi-bwa kyi-shwôm oshwǒm ńkyí ben badachi ńkyí me nda běn esét kántîk mú me n*fí to ne ben*. Chi n̂g bǎmkpóngé ba-ca kashú ne bushî ne banê etím, eringe nyí badachi onyii enen o-kwárê kerededet.

¹³ Ké ebóng, Osówo kángkáng nkéré mu o-chi i běn bǎmkpóngé ké dyityém, eringe nyí badakûbángê ba-kyú ne busa ḿbú badachi ńkyí okabe emen o/fu, bachi.

¹⁴ Chi n̂g kángkáng byěm baa*rime ké kyitông* ba-kán nang ké dyishí ne barî*

¹⁵ eringe nyí badakyú kpárádádát, baa*kyú ne ébîn* wǎ bwǎn ḿbé banong ḿbé Osówo, ḿbé mbe ba-kyú u ké ejíí nyí banet ḿbé baa/bên ne bambên byije. Ba-man ba-kûsan ké burwám ebe wǎ ékpére nyí nyi e-chi i bubóng bu-firi ne kiinwángé

¹⁶ ké nkéré ba-kú ba-sét ng kámbé kyitwóm kyi-kim ne dyikpen ńdyí ne banyá. Â bamu ba-chi i éné, me n/chi n-já bukwóp ḿbú ndatông byiko kyi-kim ne ben ké Dyicí ńdyí Karâs, ké ebóng, kyi/chi kyi-tông kyi/fu, kángkáng busa ejí ne bǎmkpóngé ejí byi*da/waa kyísí dyikáá*.

¹⁷ Katô baróng ḿbé dyikpen ejí ba/chi ba-pwôo wǎ chwǒm ńkyí badakúng ba-chi kyifen ńkyí dyityém enen ńdyí ba/fé ne Karâs ndyi dyi-chi i dyi-kyâ Osówo. Â nkyi éné, me mu ké bunyîn-dyityém, ne bunyîn-dyityém ejí ḿbún bu/ta běn to ashí amúmú.

¹⁸ Ké bukwóp ámbu bubónge, ben to ba-man ba-kyú ké bunyîn-dyityém, ba-chi to bunyîn-dyityém enen ámbu bu-ta mě.

Tyímótyi ne Epaforodátus

¹⁹ Me n/fé dyityém ne Jisos, Otu Kyítá, n/fu, n/chi m-man běn etwóm Tyímótyi o-kâm běn abeabe, eringe bǎmpém ḿbé n/chi n-jwo kyi-kim ne ben ba/chi ba-fé mě busa.

²⁰ Nyǐ kǎnchí nké mu ne okabe obónge ne me, ne mu o-kérê ng ké ntûntû kyi-kim ne ben.

²¹ Burwám-banet ḿbé kwán mbe ba-kérê ng kyi-kim ne ńkyí kyi/fárâng kámbé. Ba*fí ba-kérê ng kyi-kim ne bukwóp ḿbú Jisos Karâs*.

²² Ne ben bayén bamu ba-nyît ng eringe nyí nyǐ oo/tông o/fu, nyǐ o/kwárê, ne eringe nyí nyǐ ne me wǎ wǎn ne bonchí bii/chi bǎmkpóngé kyikit kyibónge ké dyishí ńdyí Bǎmpém ḿbé Banong.

²³ Me mu n-kabe ng n/fu, n/chi n-twóm ǎ o-kâm běn kâng, â me m/man n-nyît eringe nyí byěm byi/chi byi-kyú ne me.

²⁴ Ne me n/fé dyityém ne Otu Kyítá n/fu, me oyén n/chi m-man n-kâm běn abeabe.

²⁵ Me nn/kabe n/fu, nkyi kanong ńkyí nda běn etwóm wǎn-boné eten ké bubwô ḿbú Jisos Karâs, mú odabángê Epaforodátus, mú oo/chi bǎmkpóngé, o-nwa bunwa ké kyicê ńkyí ejí, ne mú oo/chi bǎmkpóngé wǎ onet-kyitwóm enen ké ochwâp mú mu o-chwáp ng mě.

²⁶ Nyǐ mu o-ryuu ng kanong kanong o/fu, nyǐ o-ri ng běn ashí amúmú, ne dyityém emen dyi*fí ǎ to kanong* ké nǎ, ben ba/jwo ba/fu, nyǐ mu o-rwôm m.

²⁷ Ké ntûntû, o/mû o-rwôm m, ne o/nángê o-kpú. Nké Osówo o/ri ǎ bafip, *chí nang nyǐ nké nke* o/ri mě me to, ne o/fîm mě ké bafip ḿbé ba/jê ba-shwôm.

²⁸ Kyi-kú kyi-nyîn n mě kâng kyi-shwôm ńkyí nda ǎ etwóm o-kâm běn, eringe nyí ben ba/chi ba-chîfiri ké bunyîn-dyityém ké nkéré mú baa/ri ǎ, ne bafip ḿbé ejí ba/chi ba-man.

²⁹ Koo n̂g ǎ kâng ne kángkáng bunyîn-dyityém wǎ wǎn-boné ké bubwô ḿbú Otu Kyítá. Kye n̂g kángkáng azong-banet nyí nyi wǎ nyǐ ofê,

³⁰ ké ebóng, o/fé dyikpen emen ké afaníkong, ne o/nángê o-kpú ké dyishí ńdyí bǎmkpóngé ḿbé Karâs, eringe nyí o/chi o-kye mě ochwâp mú ben bayén ba*da mě eman ekye*.