Fyilyípyan 1 - Bokyi Bible

¹ Me Pôl ne Tyímótyi ḿbé byimu bǎmgbán ḿbé Jisos Karâs nké byimu byi-sáng ng léta mún byi-kye banet-Osówo ḿbé mbe ba-kyú u ké Fyilyípa, ḿbé mbe ké ocibi ne Jisos Karâs. Byimu byi-sáng ng to byi-kye banet-ochwâp ne banet-ashí-ékwâbashi nyí Karâs.

² Kyi/bát Osówo mú mu Bonchí eten ne Jisos Karâs, Otu Kyítá bakye běn ochwâp ne bunyîn-dyityém.

Nshwam mú Pôl o/fé o-kye Osówo ké Bubwô ḿbú Banet ḿbé Fyilyípa

³ Me mu n-kó ng Osówo ejí asǎma ké bubwô enen, nang nkéré orá nké n/zîim běn.

⁴ Nang nkéré orá nké n-kú n-fâ nshwam ké bubwô enen ashí amúmú, n-fâ kámú ne bunyîn-dyityém,

⁵ ké eringe nyí ben baa/chwáp mě ké bǎmkpóngé ḿbé Bǎmpém ḿbé Banong, kyi-fím ké mbwôp kashú-dyicí tete kyi-ribi kántîk.

⁶ Ne ké bubwô ámbu kâng, me mu n-nyît ng ńkyín n/fu, Osówo mú o/kpet bǎmkpóngé ḿbé banong ḿbén echi ké atyém enen o/chi o-ca ne mbé kashú káshu tete ba-man ké Dyicí ńdyí Jisos Karâs.

⁷ Ben bamu ké dyityém ejí kángkáng nkéré. Ne ké bubwô ámbu, nkyi kanong ńkyí me ndakabe ké bukwóp ḿbún kyi-kim ne ben. Ké ebóng, ben ashí amúmú baa/bwom ne me ké esim, ké bǎmkpóngé ḿbén echi ḿbé Osówo oo/kye mě kántîk mú me n/firi ké mgbokobá, ne ké nkéré mú m/mû ké byiko ejí mú ndabwom Bǎmpém ḿbé Banong ké esim, n-sét to kanong kanong kyi-kim ne mbé.

⁸ Osówo mu o-nyît ng o/fu, me mu n-sét ng ntûntû eringe mu n-raa ng něen n/fu, ekyíkéré nyí me mu n-kérê ng ké kafâ-dyityém ejí kyi-kim ne ben ashí amúmú nyi e-fím m ké dyityém ńdyí Jisos Karâs nyǐ oyén.

⁹ Nyín něen nshwam ejí mú me mu n-fâ n-kyâ Osówo ké bubwô enen. Me mu n-fâ n/fu, kyijé enen kyikûkán kyi-ca kashú káshu, cibicibi ne byinyídíng ḿbyí ntûntû ne bubong to ḿbú byěm ḿbyí byinong echi.

¹⁰ Eringe ben badaman ecá chwǒm ńkyí nkyi kyi-nwa ng kyi-shwôm. Fím ányi kâng, Karâs o/chi o-fîm běn ké kángkáng byibî-byěm ne ké kángkáng ébîn, ké Dyicí emen.

¹¹ Akpen enen a/chi a-sú ne édúú nyí enong enong, nyí edafím ké abwô nyí Jisos Karâs kǎnchí, eringe nyí byidakye Osówo ofê ne akpee.

Dyikpen ányi Karâs

¹² Me mu n-ryuu ng n/fu, ben banyît, ǎ bwǎn-bané ejí, ba/fu, byěm ḿbyí bii/chi mě, ké ntûntû, bii/chwáp Bǎmpém ḿbé Banong ba-ca kashú,

¹³ Ké bubwô ámbu, kángkáng banet ḿbé mbe ba-bám m kyibám-otu ńkyín ne kángkáng banet bakíri ḿbé mbe nyín mbe ba-nyît ng ba/fu, me mu ké mgbokobá, ké nǎ, me n-chi i ḿgbán mú Karâs.

¹⁴ Ne mgbokobá ejí mú me mu ké mǔ oo/chi bujê-banet chwóó ba-bwa ba-fé dyityém ba-shwôm ké Otu Kyítá, ńkyí kii/chi kámbé ba-kú ba-cíp ng achi-banet ba-shwôm, bushî bu*fí to kámbé* ké nkéré nang orá nang orá ké kyitwóm ńkyí mbe ba-sét ng banet.

¹⁵ Nké banet bakíri mbe ba-sét ng kyi-kim ne Karâs, ké nǎ, orêm mu o-chi i kámbé ne ashwôn a-nyîn n kámbé. Nké banet bakíri mbe ba-sét ng kyi-kim ne nyǐ ne kángkáng okabe mú onong.

¹⁶ Banet ḿbén mbe ba-chi i éné ké bubwô-kyijé, ké ebóng, mbe ba-nyît ng ba/fu, Osówo oo/kye mě bǎmkpóngé ḿbé ndabwom Bǎmpém ḿbé Banong ké esim.

¹⁷ Banet ḿbé babónge ba*fí ba-sét ng kyi-kim ne Karâs ne dyityém ebe* nké mbe ba-sét ng ne okabe mú badachi byěm ba-kye byiko ebe. Mbé mbe ba-kabe ng ba/fu, eringe nyí me mu něen ké mgbokobá, mbé ba-chi i afaníkong ejí a-jê a-shwôm.

¹⁸ Ńkyí ánkyi kyi*da/byí chwǒm*. Nkyi kyi-nyîn n mě kyi-kim ne nkyí, ké bubwô ḿbú mbe ba-sét ng kyi-kim ne Karâs ké bukwóp nang burá nang burá, nang mbe ne okabe mú onong, nang mbe ne mú kyibî. Ne n/chi n-waa ké bunyîn-dyityém,

¹⁹ ké ebóng, me mu n-nyît ng n/fu, ké bubwô ḿbú banshwam enen ne ké ochwâp mú mu o-fím m ne Busun ḿbú Jisos Karâs, ba/chi ba-fîm mě ké mgbokobá.

²⁰ Okabe ejí mú mu mě ké kafâ-dyityém ne achi etî ejí nyi něen, n/fu, mm*ba/chi m-mîng bǎmkpóngé ejí* nké n/fu, ké kángkáng nkéré, aciringaciring kántîk, busa bu/chi bu-nung mě kanong kanong. Eringe nyí ne kyirim ejí kángkáng, me n/chi n-chi ba-kûkye Karâs ofê, nang mu n-kpen n, nang mu m-kpú u.

²¹ Ké ebóng, dyikpen ńdyín dyi/byí mě me ebóng. Ké kakim ejí, dyi-chi i Karâs. Bukyû kâng bu/chi bu-bâ ne chwǒm ńkyí kyinong kyi-shwôm.

²² Nké â ńkyí n/chi m-kpen n-ca kashú m-man n echi bǎmkpóngé ḿbé banong bakíri n-ca kashú, me n*fí n-nyît ng ńkyí ndafîm*.

²³ Byěm ḿbyín bii/kám mě byicê byimúmú. Me mu n-ryuu ng kanong kanong n/fu, m-mîng ng dyikpen ńdyín n-da-kyú ne Karâs, ńkyí kyi/nwa kanong kanong kyi-shwôm.

²⁴ Nké nkyi kiǐtí-chwǒm kanong kanong kyi-shwôm ńkyí ndakyú okpó ké bubwô enen.

²⁵ Me mu n-nyît ng ńkyín, ne ké bubwô ámbu, me mu n-nyît ng n/fu, n/chi n-kyú okpó. Me n/chi n-kyú n-ca kashú ne ben ashí amúmú, eringe nyí ben badachîce kashú ba-kyú ké bunyîn-dyityém ké dyityém ńdyí ba/fé ne Karâs.

²⁶ Ké bubwô ḿbún, ké nkéré mú me n/chi n-chîkyú ne ben, ben ba/chi ba-já bukwóp ḿbú bunong ba-shwôm, ḿbú badakûtông byiko kyi-kim ne me ké dyikpen enen, ké Jisos Karâs.

²⁷ Ńkyí nkyi kiǐtí-chwǒm nkyi něen, kyi/fu, dyizong-dyikpen enen ńdyí bamu ba-kyú u dyikyú wǎ eringe nyí Bǎmpém ḿbé Banong ḿbé Karâs mbe ba-ryuu ng. Eringe nyí â nang m/man ebê, nang n*da/man ebê m-ba-ri běn* me n/chi n-jwo n/fu, ben ba/bwom shwaneshwane ne okabe obónge, ne bamu ba-nwa ng ne onet-bushwôn enen ké burwám, cibicibi ne okabe obónge nké nke, ké bubwô-dyityém efé ké Bǎmpém ḿbé Banong.

²⁸ *Da n̂g echi ba-shî banet-bushwôn enen*. Kyú n̂g kángkáng nkéré ne dyityém ńdyí shwaneshwane, ne ńkyín kyi/chi kyi-tông kámbé kyi/fu, mbé baa*ba/chi ba-kpógê* ben nké ba/chi ba-kpógê. Ké ebóng, Osówo nké mu o-kyâ běn busa ḿbú badakpógê.

²⁹ Ké ebóng, Osówo oo/kye běn bukwóp ḿbú badafé Karâs, *chí ké obánge ekyú ne nyǐ nké nke* nké ké busông eri to ké dyishí emen.

³⁰ Kántîk, ben ba-man n ebwom ne me ké bunwa ámbu. Bunwa ámbu bubónge nké ba/ri mě mu n-nwa ng kámbú ké nkéré mú o/shwôm ké esim, ne mbú bubónge ámbu nké n/tôong n-nwa ng wǎ eringe nyí bamu ba-jwo ng.