Fyílyímon 1 - Bokyi Bible

¹ Me Pôl mú mu onet-mgbokobá ké dyishí ńdyí Jisos Karâs ne Tyímótyi mú wǎn-boné eten nké byimu byi-sáng ng léta mún byi-kye ocín eten Fyílyímon mú mu óten-onet-bǎmkpóngé,

² byi-kye to banet-ékwâbashi nyí Karâs ḿbé mbe ba-cibi ng ké kyise eyên, byi-kye to wǎn-boné eten mú onyinyi, mú odabángê Áfyá ne óten-onet-súja mú Karâs, mú odabángê Ákyipus.

³ Kyi/bát Osówo Bonchí eten ne Jisos Karâs, Otu Kyítá bakye běn ochwâp ne bunyîn-dyityém.

Kyijé ńkyí Fyílyímon ne Dyityém Emen ńdyí o/fé ne Karâs

⁴ Fyílyímon mú wǎn-ńnâ, kángkáng nkéré mú me mu n-fâ nshwam, me mu n-zîim m ǒ, n-kó ng Osówo ejí asǎma.

⁵ Ké nǎ, me n/jwo kyi-kim ne kyijé eyên ńkyí amu a-tông ng kángkáng banet-Osówo ne dyityém eyên ńdyí wo a/fé ne Jisos, Otu Kyítá.

⁶ Mu n-fâ nshwam ejí n/fu, ocibi eten ne wo wǎ banet ḿbé ba/bángê ké Karâs ochi bě byi-kûnyît kanong kanong kyi-kim ne ojware nang orá mú be byimu ne mǔ ké dyikpen eten ńdyí byimu byi-kyú u ne Karâs.

⁷ Kyijé eyên, ǎ wǎn-ńnâ, kii/kye mě bunyîn-dyityém ḿbú kiǐtí ne kii/fé mě busa chwóó. Wo aa/chi atyém nyí kángkáng banet-Osówo a-firi ké bunyîn-dyityém.

Pôl o/tîm Fyílyímon Arông ké Chwǒm

⁸ Ké bubwô ámbu, me m/mû m-man n erêe dyityém wǎ wǎn-boné eyên ké bubwô ḿbú Karâs, n-sét ǒ ké busa n/fu, chi ńkyí ba/fu, wo achi.

⁹ Nké kyijé kyi/bwa nkyi kyi-tírîng ng mě kyi/fu, me mbí ǒ ochwâp. Me mu n-chi i ńkyín nang ké me mu Pôl mú onet-kyitwóm mú Jisos Karâs, ne kántîk me n/firi to onet-mgbokobá ké dyishí emen.

¹⁰ Me mu m-bí ng ǒ kâng ké bubwô ḿbú Onézyímus, mú mu wǎn mú ejí ké bubwô ḿbú Karâs. Ké ebóng, ké nkéré mú me mu něen ké mgbokobá, me n/firi ǎ bonchí mú busun.

¹¹ Ké nkéré mú o/shwôm ké esim, nyǐ o/mû o*fí o-chwáp ng ǒ* nké kántîk nyǐ o-man n ǒ echwáp ne me to.

¹² Me n-kú n-twóm m ǎ o-bwa esim o-kâm ǒ, ne dyityém ejí dyi/waa ne nyǐ.

¹³ Kyi/mû kyi-nyîn n mě ńkyí nyǐ o/mû odawaa nyín ne me, eringe nyí me mu něen ké mgbokobá, ké bubwô ḿbú Bǎmpém ḿbé Banong, eringe nyí oda mě ekûchwáp ké bubwô eyên.

¹⁴ Bwa kwán, me n*fí n-ryuu ng n/fu, wo achwáp mě ké busa*. Nké me kyi-nyîn n mě ńkyí wo adachi kánkyí eringe nyí dyityém eyên dyi/sét ǒ. Me mm*ba/chi n-chi kâng chwǒm nang kyibónge* tete wo a-bángê.

¹⁵ Kyi-man n ekyú něen kyi/fu, Onézyímus o/mû o/dim o-mîng ǒ ké kaǎnyín-nkéré, eringe nyí odabwa esim o-ba-kyú ne wo ne banyá.

¹⁶ Ké ebóng, nyǐ o*fí to wǎ ósóng nké nke* nké nyǐ oo/rêe o-shwôm ósóng. Nyǐ o/firi wǎn-ńnâ-kyijé ké bubwô ḿbú Karâs. Nyǐ mu o-nyîn n mě dyityém kanong kanong. Ne nyǐ o/chi o-nyîn ǒ to kanong kanong wǎ ósóng ne wǎ wǎn-ńnâ to ké bubwô ḿbú Otu Kyítá.

¹⁷ Nké â wo amu a-kabe ng kyi-kim ne me wǎ ónen, chî ǎ ekoo wǎ eringe nyí a/mû a/chi a-koo mě.

¹⁸ Â nyǐ oo/chi ǒ kyibî-chwǒm nang kyibónge, nang mu o-ryí i ǒ dyifwá-chwǒm nang kyibónge, yip kánkyí a-fé ké bubwô ejí.

¹⁹ Me Pôl nké mu n-kúng ng bubwô ejí n-sáng ńkyín n/fu, me Pôl n/chi n-ré ǒ dyifwá. Me nn*zîim ǒ ké ntûntû n/fu, wo a/ryí mě dyifwá-dyikpen eyên chíchí*.

²⁰ Ké bubwô ámbu, ǎ wǎn-ńnâ, kamgbe, kye mě ochwâp mún ké bubwô ḿbú Otu Kyítá, n/fu, chi dyityém ejí dyi-kyú ké bunyîn-dyityém wǎ wǎn-boné ké bubwô-Karâs.

²¹ Me m/bángê ké ntûntû, ké mu n-sáng ng ńkyín n/fu, wo a/chi a-chi ńkyí me m/bí. Ké ntûntû, mu n-nyît ng n/fu, a/chi a-chi kyi-jê kyi-shwôm oshwǒm.

²² Nap to nfût obónge a-tî mě, ké ebóng, me mu n-tî ng achi n/fu, Osówo o/chi o-jwo banshwam enen ashí kángkáng, o-bwa ne me o-kye běn.

Nkuli Kyikû-Kyiraa eta

²³ Épafaras mú mu ké mgbokobá ne me ké dyishí ńdyí Jisos Karâs o/ta běn kyiraa.

²⁴ Eringe ebónge to nké Mâk ne Aryisatákus ne Dyímas ne Lûk ḿbé mbe báten-banet-bǎmkpóngé ba/ta běn kyiraa.

²⁵ Kyi/bát ochwâp mú Jisos Karâs, Otu Kyítá okyú ne ben kángkáng.