Ézódos 9 - Bokyi Bible1 Óburúkpâbí o/sét Músis o/fu, ca a-da-sét otu a/fu, Osówo Óburúkpâbí mú banet ḿbé Hyíburus o/fu, wo amîng banet emen ba-dim ba-da-fé ǎ. 2 Â wo a/chîné a/fu, ba*dace* 3 nyǐ o/chi o-kye ǒ busông ḿbú odatwóm kyibî-orwôm kyi-kám kángkáng byitú eyên, bubyî-orá ne boonyam-atû ne bampong ne ebû. 4 Nyǐ o/chi o-pap byitú ḿbyí banet ḿbé Éjip ne ḿbyí banet ḿbé Ézerel, ne ḿbyí banet ḿbé Ézerel bii*ba/chi byi-kpú*. 5 O/fu, nyǐ Óburúkpâbí oo/tî dyicí ńdyí nencí, ńdyí nyǐ o/chi o-chi chwǒm ńkyín. 6 Ké orî-dyicí, Óburúkpâbí o/chi wǎ eringe nyí o/sét, ne kángkáng byitú-banet ḿbé Éjip byi/kpú. Nké kyitú ńkyí onet-Ézerel nang kyibónge kyi*da/kpú*. 7 Otu o-bí kyi-kim ne ńkyí kyi/chi, ne ba-sét ǎ ba/fu, kyikû ńkyí onet-Ézerel nang kyibónge kyi*da/kpú*. Nké otu ámu o/mû o-shwane e dyishí ne o*da/bángê banet ḿbé Ézerel ba-dim*. 8 Ne Óburúkpâbí o-sét kâng Músis ne Éron o/fu, kpere n̂g atông ké akwâ. Músis o/chi o-da-bwom ké bushú ḿbú otu o-pwó kányí kyíbóng. 9 Atông ányi a/chi a-káng ké kángkáng esí nyí Éjip wǎ édúkǎndú, ne a/chi a-chi byifyí byi-tú banet ne byitú, byi-puu byi-bírî byibáp. 10 Ne Músis ne Éron ba-kpere kâng atông ba-da-bwom ké bushú ḿbú otu. Músis o-kúng kányí o-pwó kyíbóng, ne atông ányi a-chi byifyí byi-tú banet ne byitú, ḿbyí byi/puu byi-bírî byibáp. 11 Ḿbé banchi bambirirím ba*da/man ebyí ba-kâm Músis* ké nǎ, byifyí byi/tú kámbé byiko byimúmú, wǎ eringe nyí byi/tú to banet-Éjip ḿbé áku. 12 Nké Óburúkpâbí o/chi otu ámu o-shwane dyishí, ne wǎ eringe nyí Óburúkpâbí o/mû o/sét, otu ámu o*da/jwo ńkyí Músis ne Éron ba/sét ǎ*. 13 Ne Óburúkpâbí o-sét kâng Músis o/fu, ké dyicófóróng pirípirí, ca a-da-kâm otu a-sét ǎ a/fu, Osówo Óburúkpâbí mú banet-Hyíburus o/sét o/fu, mîng banet emen ba-dim ba-da-kye ǎ ofê. 14 Ntáng mún mm*ba/chi n-kye banet-ashí-oshê eyên ne banet eyên nké nke busông* n-kyâ ǒ to wo oyén, eringe nyí a/chi a-nyît a/fu, Osówo okíri o*fí to mú mu wǎ me ké ejíí ńnyín emúmú*. 15 Â m/mû n/kúng kiǐtí-busa ejí n-twóp ǒ kyirwóm ne banet eyên, něen nn/ju běn ashí kángkáng. 16 Nké eringe nyí n/chi n-tông ǒ busa ejí, me m/mîng ǒ a-kpen eringe nyí dyizîn ejí dyi/chi dyi-káng ejíí emúmú. 17 Nké wo a/tôong a-tông ng byiko, a-né ng a/fu, banet ejí ba*dadim*. 18 Ké nkéré mún nencí, n/chi n-chi kyibî-abíp kyi-róng ńkyí banet-Éjip ba/mû ba*da/ri ne nang kabónge*. 19 Kántîk, kye busa ba-kúng kángkáng byitú eyên ne byěm byikíri ḿbyí amu ne mbyí, ba-fé ké kyise. Abíp a/chi a-róng banet ne byitú ḿbyí byi/chi byi-waa kyíjí ké byiko, byi-kpú kángkáng. 20 Bushî bu/mû bu/róng banet-ashí-oshê bakíri ké ńkyí Óburúkpâbí o/sét, ne ba-kúng básóng ne byitú ebe ba-fé ké kafâ-kyise. 21 Nké banet bakíri ba*da/jwo ekó nyí Óburúkpâbí o/kuri* ba-mîng básóng ne byitú ebe kyíjí. 22 Ne Óburúkpâbí o-sét kâng Músis o/fu, yip bubwô eyên kyíbóng ne abíp a/chi a-róng ké esí nyí Éjip emúmú, a/chi a-róng banet ne byitú ké byiko ne ké byíkwôn ké dyikán. 23 Ne Músis o-yip ochí emen kyíbóng, ne Óburúkpâbí o-twóm etare ne abíp ne kasabang byi-róng kyísí. Óburúkpâbí o/twóm 24 abíp nyí aryên aryên ne kasabang ńké ka/kédê ka-jâ kú ka-jâ kú. Abíp ányi a/mû a/bên a-shwôm kángkáng abíp nyí banet-Éjip ba/mû ba*da/ri ne nang kabónge*. 25 Abíp ányi a/róng ké kángkáng byěm ḿbyí byi/mû kyíjí ké Éjip emúmú, cibicibi ne kángkáng banet ne byitú. A/róng ké byíkwôn ḿbyí byi/mû ké byifát, a-jâa to byire-byichí kángkáng. 26 Kyikim-esí ńkyí Góshen, ńkyí banet ḿbé Ézerel ba/mû ba-kyú u nké nke nké abíp a/mû a*da/róng*. 27 Otu o-twóm ba-kó Músis ne Éron o-sét kámbé o/fu, nn/chi kyibî ntáng mún. Óburúkpâbí o*da/róng* me ne banet ejí nké byi/róng. 28 Fé n̂g nshwam ba-kye Óburúkpâbí. Etare ńnyín ne abíp ńnyín bii/kwárê. Me n/ryí ocím n/fu, m-mîng ng běn ba-dim. Baa*ba/chi ba-chîkyú nyín*. 29 Músis o-sét ǎ o/fu, â n-dim m ké oshê mún m-bâ, n/chi n-yip abwô ejí kyíbóng, n-fé nshwam n-kye Óburúkpâbí. Etare e/chi e-mîng, ne abíp aa*róng to* eringe nyí wo adanyît a/fu, ejíí emúmú e/já Óburúkpâbí. 30 Nké me mu n-nyît ng n/fu, wo ne banet-ashí-oshê eyên ba*da/kpet ne Osówo Óburúkpâbí eshî*. 31 Byíkwôn ḿbyí ké dyikán, ḿbyí badakó bályi ne fálak, ḿbyí byi/mû bii/kán byi/bên kángkáng. 32 Nké byíkwôn byikíri ḿbyí badakó wît, ḿbyí byi/mû byi*da/kán ne* byi*da/bên*. 33 Músis o-dim o-mîng otu, o-byí ké oshê o-da-yip abwô emen kyíbóng o-fé nshwam o-kye Óburúkpâbí. Etare ne abíp ne omu byi-mîng. 34 Ké nkéré otu oo/ri ńkyí kyi/chi, o/chîchi kyibî kyikíri. Nyǐ ne banet-ashí-oshê emen ba/waa ba-shwane e ké dyishí ba-câ, 35 ne wǎ eringe nyí Óburúkpâbí o/mû oo/sét ké ocím mú Músis, otu ámu o*da/bángê banet ḿbé Ézerel da-dim*. |
Published by the Bible Society of Nigeria @ 1985
Bible Society of Nigeria