Ézódos 8 - Bokyi Bible

¹ Ne Óburúkpâbí o-sét Músis o/fu, ca a-da-sét otu a/fu, Óburúkpâbí mu o-sét ng ǎ o/fu, omîng banet emen ba-dim ba-da-kye ǎ ofê.

² Â a/né, n/chi n-kye oshê eyên busông ḿbú n/chi n-twóm búsáng bu-cít kámú omúmú.

³ Búsáng bu/chi bu-sú ké kace ńké Nâl chwóó bu-shwôm ḿbú budabyí bu-mîng kánké bu-ba-nung ké kyibám-butu eyên ne nfût eyên ne karíng eyên ne byise ḿbyí banet-ashí-oshê eyên ne ḿbyí banet eyên. Bu-nung to ne ké byikit-byiryíng erám eyên ne butí-byiryíng eyên.

⁴ Bu/chi bu-yú ǒ ké byiko ne banet eyên ne banet-ashí-oshê eyên.

⁵ Óburúkpâbí o-sét Músis o/fu, sét Éron o-da-bwom o-níbî ochí emen kyíbóng ké buce ne ewo nyí nyi ne omu ne ajwáng, o-chi búsáng bu-byí bu-ba-cít esí emúmú nyí Éjip.

⁶ Éron o-dim kâng o-da-níbî ochí emen ké kángkáng buce, ne búsáng bu-byí bu-ba-cít esí emúmú.

⁷ Nké banchi bambirirím ḿbé Éjip ba/kúng bambirirím ebe ba-chi to búsáng bu-byí bu-bâ kyíjí.

⁸ Otu o-twóm ba-kó Músis ne Éron, o-sét kámbé o/fu, fé n̂g nshwam ba-kye Óburúkpâbí o-kúng búsáng ḿbún o-dim ne mbú, ne n/chi m-mîng banet enen ba-dim ba-da-chi byifen ba-kye ǎ.

⁹ Músis o-faa ǎ o/fu, kyi-nyîn n mě ńkyí ndafé nshwam ké bubwô eyên. Sét mě nkéré mú n/chi n-fé nshwam ámu ké dyishí eyên ne ńdyí banet-ashí-oshê eyên ne banet eyên, eringe nyí búsáng budadim, ne boo*kyú to ké kyikit kyikíri* kyi-cibi ne ké kafâ-kace ńké Nâl*.

¹⁰ Otu o-sét Músis o/fu, fé nencí. Músis o-faa ǎ o/fu, me n/chi n-chi eringe nyí wo a/bí, ne a/chi a-nyît a/fu, Osówo okíri o*fí to* kyi-cibi ne Osówo Óburúkpâbí eten*.

¹¹ Búsáng bu/chi bu-dim bu-mîng ǒ ne banet-ashí-oshê eyên ne banet eyên kángkáng ne boo*kyú to ké kyikit kyikíri* kyi-cibi ne ké kafâ-kace ńké Nâl*.

¹² Ne Músis ne Éron kâng ba-dim ba-mîng otu, ne Músis o-fé nshwam o-kye Óburúkpâbí o/fu, okúng búsáng ḿbú o/mû oo/twóm bu-kâm otu.

¹³ Óburúkpâbí o-chi eringe nyí Músis o/bí ǎ, ne búsáng ké kafâ-byise kángkáng ne kafâ-kabám kángkáng ne ké dyikán kángkáng bu-kpú.

¹⁴ Banet ḿbé Éjip ba-kpaa kámbú ba-tî biǐjú biǐjú tete oshê o-kpet enung byikwóm-búsáng mbyí mbyi.

¹⁵ Ńdyí otu o/ri o/fu, búsáng boo/kpú, o-chîkpet eshwane ké dyishí, ne wǎ eringe nyí Óburúkpâbí o/mû o/sét, otu ámu o*da/jwo ńkyí Músis ne Éron ba/sét ǎ*.

¹⁶ Óburúkpâbí o-sét Músis o/fu, sét Éron o-yip ochí emen o-díp kyísí ne édúkǎndú nyí nyi ké esí-Éjip emúmú e/chi e-bírî boonyam ḿbú budajwóm.

¹⁷ Ne Éron kâng o-yip ochí emen o-díp kyísí, ne kángkáng édúkǎndú e-bírî boonyam ḿbú budajwóm bu-cít kángkáng banet ne byitú.

¹⁸ Banchi bambirirím ba-kan ba/fu, mbé ba-kúng ng bambirirím ebe ba-chi boonyam bu-byí, nké ba*da/man echi*. Boonyam bu/cít kángkáng byikit,

¹⁹ ne banchi bambirirím ba-sét otu ba/fu, Osówo nké o/chi ńkyín. Nké otu o/mû o-shwane e dyishí, ne wǎ eringe nyí Óburúkpâbí o/mû o/sét, otu ámu o*da/jwo ńkyí Músis ne Éron ba/sét ǎ*.

²⁰ Óburúkpâbí o-sét Músis o/fu, ké dyicófóróng pirípirí, ca a-da-kâm otu ké nkéré o-kú o-wâa ng ké kace, a-sét ǎ a/fu, Óburúkpâbí o/fu, wo amîng banet emen ba-dim ba-da-kye ǎ ofê.

²¹ Me mu n-kuri ng ǒ ekó n/fu, â a/né, me n/chi n-kye ǒ busông ḿbú ndatwóm ecincing e-kâm ǒ ne banet-ashí-oshê eyên ne banet eyên kángkáng. Ecincing e/chi e-cít kángkáng esí ne byise ḿbyí banet ḿbé Éjip.

²² Nké n/chi n-nyii kyikim-esí ńkyí Góshen, ńkyí banet ejí mbe ba-kyú u, ecincing ee*kyú ányi*. Me n/chi n-chi ńkyín eringe nyí wo adanyît a/fu, me Óburúkpâbí mu ké esí ńnyín n-chi i bǎmkpóngé.

²³ Me n/chi [m-pap] banet ejí ké burwám-banet eyên. Akat ńnyín a/chi a-chi nencí.

²⁴ Óburúkpâbí o-twóm ecincing e-ba-sú ké kyibám ńkyí otu ne ké byise ḿbyí banet-ashí-oshê emen. Ecincing ányi e/bên kángkáng esí nyí Éjip.

²⁵ Ne otu o-kó Músis ne Éron o-sét kámbé o/fu, ca n̂g ba-da-chi byifen ba-kye Osówo enen ké oshê mún.

²⁶ Músis o-faa ǎ o/fu, kii*nwa ńkyí byidachi éné* ká nǎ, banet ḿbé Éjip ba-ciring ng enyam nyí byidayip byi-chi kyifen byi-kye Osówo Óburúkpâbí eten, ne kii*ba/chi kyi-nyîn kámbé*. Â byi/kúng enyam ányi byi-chi kyifen, banet ḿbé Éjip ba-ri bě, kafâ ka/chi ka-sa kámbé ba-tím bě aká ba-ju.

²⁷ Byi-man byi-cen bucen ké ací achât ké kyikim-dyikán byi-da-chi byifen byi-kye Osówo Óburúkpâbí eten wǎ eringe nyí nyǐ o/sét bě.

²⁸ Otu o-sét ǎ o/fu, n/chi m-mîng běn ba-ca ba-da-chi byifen ba-kye Osówo Óburúkpâbí enen, â baa*ba/chi ba-jang ece tíbítíbí*. Fé n̂g nshwam ba-kye Osówo ké bubwô ejí.

²⁹ Músis o-faa ǎ o/fu, â n-dim m nyín m-bâ, n/chi n-fé nshwam n-kye Óburúkpâbí n/fu, okúng ecincing nencí e-dim ǒ ké byiko ne banet-ashí-oshê eyên ne kángkáng banet eyên. Nké *dachi a-chî bě enîm* a-né banet ḿbé Ézerel a/fu, ba*dachi ba-ca ba-da-chi kyifen ba-kye Óburúkpâbí*.

³⁰ Músis o-dim o-mîng otu o-da-fé nshwam o-kye Óburúkpâbí,

³¹ ne Óburúkpâbí o-chi wǎ eringe Músis o/bí ǎ. Ecincing e-mîng otu ne banet-ashí-oshê emen ne kángkáng banet emen, nang obónge o*da/waa*.

³² Nké nang ké ńkyín kyi/chi, otu ámu o/chîshwane ké dyishí o*da/bángê banet ḿbé Ézerel ba-dim*.