Ézódos 7 - Bokyi Bible

¹ Óburúkpâbí o/raa o/fu, me n/chi n-chi ǒ a-firi wǎ Osówo ké bushú ḿbú otu mú Éjip, ne Éron mú wǎn-boné eyên o/chi o-sét ǎ byiraa wǎ mkpábé eyên.

² Sét Éron kángkáng byěm ḿbyí mu n-sét ng ǒ, ne nyǐ o/chi o-sét otu o-mîng banet ḿbé Ézerel ba-dim ké oshê emen.

³ Nké n/chi n-chi otu o-kûshwane dyishí, ne oo*ba/chi o-jwo ńkyí ada ǎ esét* nang m-bwa n-chi biinkaa byiko-byěm nǎ ké Éjip*.

⁴ Ne n/chi m-bâ ne kiǐtí-busông ké Éjip, n-fîm byikû-banet ejí byi-byí ké esí nyí Éjip.

⁵ Nkéré ámu nké banet ḿbé Éjip ba/chi ba-nyît ba/fu, me n-chi i Óburúkpâbí, ké nkéré mú n/chi n-kúng kiǐtí-busa ejí n-nwa ne mbé, n-fîm banet ḿbé Ézerel ba-byí ké oshê ebe.

⁶ Músis ne Éron ba/chi ńkyí Óburúkpâbí o/sét kámbé.

⁷ Ké nkéré mú ba/sét otu byiraa ḿbyín, ányi Músis o/mû oo/rí bajam-aje banyii ne Éron o/mû oo/rí bajam banyii esim-aje achât.

Ochí mú Éron

⁸ Óburúkpâbí o/sét Músis ne Éron o/fu,

⁹ â otu o/bí o/fu, ben batông â ben bamu ne busa ké akat echi, sét Éron o-kúng ochí emen o-twóp kyísí ké bushú-otu, ne o/chi o-bírî efyi.

¹⁰ Ne Músis ne Éron ba-dim kâng kyikit-otu ba-da-chi eringe nyí Óburúkpâbí o/sét kámbé. Éron o/twóp ochí emen kyísí ké bushú-otu ne banet-ashí-oshê emen, o-bírî efyi.

¹¹ Otu o-kó banet-byinyídíng emen ne banchi bambirirím, ne ba/kúng bambirirím ebe ba-chi to ńkyí Éron o/chi.

¹² Ba/twóp to echí ebe kyísí e-bírî efyi. Nké ochí mú Éron o/kúng echí nyí áku o-myii.

¹³ Nké otu o*da/yángê dyityém emen* wǎ eringe nyí Óburúkpâbí o/mû o/sét o/fu, otu ámu oo*ba/chi o-jwo Músis ne Éron*.

Osówo o/twóm Byěm-Busông ké Éjip

¹⁴ Ne Óburúkpâbí o-sét Músis o/fu, otu mu o-jang ng eshwane dyishí ne o*fí o-bángê e banet ejí ba-dim*.

¹⁵ Ké bubwô ámbu, dim a-da-kâm ǎ ké dyicófóróng ké nkéré o-kú o-dim m ké kace ńké Nâl. Kúng ochí mú m/mû n/chi kámú o-bírî efyi, a-bám ǎ ké bukô-kace.

¹⁶ Ké nkéré oo/kâm ǒ, sét ǎ a/fu, Osówo Óburúkpâbí mú banet ḿbé Hyíburus o/twóm mě o/fu, me nsét ǒ wo a-mîng banet emen ba-dim ba-da-kye ǎ ofê ké kyikim-dyikán. Nké tete kurún, wo a*fí a-bángê e*.

¹⁷ Kántîk, ǎ átá-otu, Óburúkpâbí mu o-sét ng ǒ o/fu, wo a/chi a-nyît dyizong-onet ńdyí nyǐ mu, ké ńkyí nyǐ o/chi o-chi. Kan achi a-ri, n/chi n-kúng ochí ejí mún n-díp ké kace, ne omu o/chi o-bírî baróng.

¹⁸ Ekworê e/chi e-kpú, ne kace ka/chi ka-kpet enung kyinung ńkyí banet baa*man to ejwáp kánké*.

¹⁹ Óburúkpâbí o-sét Músis o/fu, sét Éron o-yip ochí emen o-da-bwom o-níbî kámú kyíbóng ké kángkáng buce ne ewo nyí nyi ne omu ne biǐdé-omu ḿbyí mbyi ké Éjip. Omu mú mu ké kángkáng byikit ámbyi o/chi o-bírî baróng. Ne esí emúmú e/chi e-firi baróng bárong, cibicibi ne omu mú mu ké acáng ne butí.

²⁰ Ne Músis ne Éron ba-chi eringe nyí Óburúkpâbí o/sét kámbé. Ké bushú ḿbú otu ne banet-ashí-oshê emen, Éron o/yip ochí emen o-díp ké kace. Kángkáng omu mú mu ké nké o-bírî baróng.

²¹ Ekworê nyí e/mû ké nké e-kpú, ka-kpet enung kyinung ńkyí banet-Éjip ba*da/chîman ejwáp omu emen*. Éjip emúmú e-firi baróng bárong.

²² Banchi bambirirím ḿbé otu ba-kúng byinyídíng ebe ba-chi to ńkyí Éron o/chi. Otu o*da/tigi o-yángê dyityém emen*. Wǎ eringe nyí Óburúkpâbí o/mû o/sét, otu ámu o*da/jwo ńkyí Músis ne Éron ba/sét ǎ*.

²³ O/waa ányi o-bwa esim ké kyibám emen, o*da/chîbwom o-ri nang ńkyí ba/chi*.

²⁴ Kángkáng banet ḿbé Éjip ba-dim abíng-omu mú badajwáp esím ké bakô-kace, ké nǎ, ba*fí to ba-man n ejwáp omu mú ké kace*.

²⁵ Ací a/rí káchâtkányi ńdyí Óburúkpâbí o/díp kace.