Ézódos 6 - Bokyi Bible

¹ Ne Óburúkpâbí o-sét Músis o/fu, wo a/chi a-ri kántîk ńkyí n/chi n-chi otu ámu. N/chi n-chi ǎ ké busa o-mîng banet ejí ba-dim. Ké ntûntû, n/chi n-chi ǎ o-ró kámbé ba-dim ké esí emen.

Osówo o/kó Músis

² Osówo o/sét Músis o/fu, me n-chi i Óburúkpâbí.

³ Me m/byí n-kâm Ébarahâm ne Ázik ne Jekôp wǎ Osówo mú o/rêe o-shwôm, nké n*da/chi kámbé ba-nyît mě ké dyizîn ejí ńdyí dyinong* ńdyí Óburúkpâbí*.

⁴ Me n/ryí to ocím ne mbé mú n/sem byiko ejí n/fu, n-kyâ kámbé esí nyí Kínan, nyí mbé ba/mû ba/kyú wǎ bacinbánet.

⁵ Kántîk nn/jwo dyibyê ńdyí banet ḿbé Ézerel mbe ba-byâ, ńdyí banet ḿbé Éjip mbe ba-tî ng kámbé wǎ básóng, ne nn/zîim ocím ejí mú m/mû n/ryí.

⁶ Ké bubwô ámbu, sét banet ḿbé Ézerel kâng a/fu, me mu n-sét ng kámbé n/fu, me n-chi i Óburúkpâbí. Me n/chi n-nyii běn n-chi běn ba-fem ké búsóng ḿbú banet ḿbé Éjip mbe ba-tî ng běn. Me n/chi n-kúng kiǐtí-busa ejí n-kye kámbé kyibî-busông ne n/chi n-nyii běn.

⁷ Me n/chi běn ba-firi banet ḿbé ejí me oyén, ne me n/chi n-kyú Osówo enen. Ben ba/chi ba-nyît ba/fu, me n-chi i Osówo Óburúkpâbí enen, ké nkéré mú nn/fîm běn ké búsóng ḿbú bamu ké mbú ké Éjip.

⁸ Me n/chi m-bâ ne ben ké esí nyí n/ryí Ébarahâm ne Ázik ne Jekôp ocím mú n/sem byiko ejí n/fu, n-kyâ kámbé, ne n/chi n-kye běn kányí e-já běn. Me n-chi i Óburúkpâbí.

⁹ Músis o/kúng ńkyín o-sét banet ḿbé Ézerel, nké mbé ba*da/fwôo atông* ké nǎ, dyityém ebe dyi*fí to ne mbé* ké bubwô-kyibî-búsóng ḿbú mbe ba-tî ng kámbé.

¹⁰ Ne Óburúkpâbí o-sét Músis o/fu,

¹¹ ca a-da-sét otu mú Éjip a/fu, o-man o-mîng banet ḿbé Ézerel ba-dim ké esí emen.

¹² Nké Músis o/faa o/fu, nang banet ḿbé Ézerel nké nke ba*fí ba-jwo ng mě* kyi-cen n nǎ ne otu o-jwo mě. Me n/térê ké kyiraa eraa.

¹³ Óburúkpâbí o-sét Músis ne Éron o/fu, sét n̂g banet ḿbé Ézerel ne otu mú Éjip ba/fu, me nn/kye běn busa n/fu, kpî n̂g banet ḿbé Ézerel ba-byí ké Éjip.

Byikû-Banet ḿbyí Músis ne Éron

¹⁴ Rúben mú ókpá-wǎn-onyinchéng mú Jekôp o/mû ne bwǎn-banyinchéng ashí anyii, Hánok ne Pálu ne Hézoron ne Kámyi. Mbé nké ba/mû banchí ḿbé kpákpá ḿbé byikû-banet ḿbyí mbyi byi-bángê e azîn ebe.

¹⁵ Syímyon o/mû ne bwǎn-banyinchéng ashí nyâchât, Jémwel ne Jámin ne Óhat ne Jákin ne Zóha ne Shôl mú o/fwon ne onyinyi-Kínan. Mbé ba/mû banchí ḿbé kpákpá ḿbé byikû-banet ḿbyí mbyi byi-bángê e azîn ebe.

¹⁶ Lyíva o/mû ne bwǎn-banyinchéng ashí achât, Géshon ne Kóhat ne Merári. Mbé nké ba/mû banchí ḿbé kpákpá ḿbé byikû-banet ḿbyí mbyi byi-bángê e azîn ebe. Lyíva o/rí bajam-aje nyâchât esim onyiryiká ne afee.

¹⁷ Géshon o/mû ne bwǎn-banyinchéng bafee, Lyíbyinyi ne Shímye, ne mbé ba/mû ne bwǎn chwóó.

¹⁸ Kóhat o/mû ne bwǎn-banyinchéng ashí anyii, Amáram ne Éza ne Héboron ne Ózel. Kóhat o/rí bajam-aje nyâchât esim diǐkpú ne achât.

¹⁹ Merári o/mû ne bwǎn-banyinchéng ashí afee, Mahályi ne Múshi. Ḿbén nké mbe byikû-banet ḿbyí Lyíva ne bwǎn ebe.

²⁰ Amáram o/bé wǎn-boné-bonchí emen mú onyinyi mú odabángê Jókebet, mú o/fwon ǎ Éron me Músis. Amáram o/rí bajam-aje nyâchât esim onyiryiká ne afee.

²¹ Éza o/mû ne bwǎn-banyinchéng ashí achât, Kóra ne Néfek ne Zíkiri.

²² Ózel o/mû to ne bwǎn-banyinchéng ashí achât, Myíshal ne Ézafan ne Sítiri.

²³ Éron o/bé Elyíshéba mú wǎn-Amínádap, mú wǎn-boné emen mú onyinyi o/mû o-bángê e Náshwon. O/fwon ǎ Nádap ne Abyíhu ne Elyǎza ne Étama.

²⁴ Kóra o/mû ne bwǎn-banyinchéng ashí achât, Áse ne Ekána ne Abyǎsap. Mbé nké ba/mû banchí ḿbé kpákpá ḿbé byikim-banet ḿbyí kyikû-banet ńkyí Kóra.

²⁵ Elyǎza mú wǎn-Éron o/bé wǎn mú Pútyel ne o-fwon ǎ Fyinéhas. Mbé nké ba/mû banet-ashí-byikû-banet ḿbyí Lyíva.

²⁶ Éron ne Músis nké Óburúkpâbí o/sét kámbé o/fu, bakpî byikû-banet ḿbyí Ézerel ba-byí ké Éjip.

²⁷ Mbé nké ba/sét otu mú Éjip ba/fu, ozú banet ḿbé Ézerel abwô.

Kyitwóm ńkyí Óburúkpâbí o/twóm Músis ne Éron

²⁸ Ké nkéré mú Óburúkpâbí o/raa ne Músis ké esí nyí Éjip,

²⁹ o/sét ǎ o/fu, me n-chi i Óburúkpâbí. Sét otu mú Éjip kángkáng byiraa ḿbyí mu n-sét ng ǒ.

³⁰ Nké Músis o/faa o/fu, wo amu a-nyît ng a/fu, me n/térê ké kyiraa eraa. Otu mú Éjip o-cen n nǎ ne o-jwo mě.