Ézódos 5 - Bokyi Bible

Músis ne Éron ba/bwom ké Bushú ḿbú Otu mú Éjip

¹ Ne Músis ne Éron ba-dim kâng ba-kâm otu mú Éjip, ba-sét ǎ ba/fu, Osówo Óburúkpâbí mú Ézerel o/sét o/fu, wo amîng banet emen ba-ca ké kyikim-dyikán ba-da-chi dyijî-kyifen ba-kye ǎ.

² Otu ámu o-bí kámbé o/fu, yeě odabángê Óburúkpâbí. Me mm*man n-jwo ńkyí nyǐ oda mě esét* m-mîng banet ḿbé Ézerel ba-dim*. Me nn*nyît Óburúkpâbí* ne mm*bángê banet ḿbé Ézerel ba-dim*.

³ Músis ne Éron ba-faa ǎ ba/fu, Osówo mú banet-Hyíburus oo/bê o-kâm bě. Kye bě ací achât byi-ca ké kyikim-dyikán byi-da-chi byifen byi-kye Osówo Óburúkpâbí eten. Â byi*da/chi éné* o/chi o-ju bě ké byirwóm nang ké byití.

⁴ Otu ámu o-raa ne Músis ne Éron o/fu, ebóng bamu ba-ryuu ng ba/fu, banet ḿbé Ézerel bamîng bǎmkpóngé ebe ḿbé mbe ba-chi i. Kpî n̂g básóng ámbe ba-bwa esim bǎmkpóngé echi.

⁵ Ben banet ḿbé Ézerel baa/jê ba-shwôm banet ḿbé Éjip, ne kántîk ba-kú ba-bâ emîng bǎmkpóngé echi.

⁶ Ké ochíchí-dyicí ándyi, otu ámu o/sét bantûn básóng ne banet-ashí-bǎmkpóngé ḿbé Ézerel o/fu,

⁷ *da n̂g echîkye banet ḿbé Ézerel biǐbyâa ḿbyí badacibi ne ecing ne ba-chi bolôk*. Bakûce ba-da-kyé kámbyí mbé bayén.

⁸ Nké ba-man ba-chi ocím-byirim-bolôk ḿbyí ba/mû ba-chi i kpákpá. *Da n̂g efîm kámbé kyirim nang kyibónge*. Ba*fí bǎmkpóngé chwóó ḿbé badachi*. Nkyí nké mbe ba-bí ng mě ba/fu, me mmîng kámbé ba-da-chi byifen ba-kye Osówo ebe.

⁹ Chi n̂g banet ḿbén ba-chi bǎmkpóngé ba-jê ba-shwôm eringe nyí ba/mû ba-chi i, ne *da n̂g ekye kámbé mpât mú badajáng* eringe nyí baa*já nkéré mú badajwo byiraa ḿbyí byi*fí ké kafâ*.

¹⁰ Bantûn básóng ámbe ne banet-ashí-bǎmkpóngé ḿbé Ézerel ba-dim ba-da-sét banet ḿbé Ézerel ba/fu, otu o/fu, nyǐ oo*kye běn to biǐbyâa ḿbyí bamu ba-cibi ng ne ecing ba-chi bolôk*.

¹¹ O/fu, ben ba-man ba-kûkyé kámbyí nang nyá nké ba/ri kámbyí ben bayén, nké ben bachi ocím-bolôk mú ben ba/mû ba-chi i kpákpá.

¹² Ne banet ḿbé Ézerel kâng ba-dim ké esí-Éjip emúmú biǐbyâa ekyé ḿbyí badacibi ne ecing ne ba-chi bolôk.

¹³ Banet ḿbé ba/mû ba-tún n kámbé wǎ básóng ba-tírîng kámbé ba/fu, bachi ocím-bolôk obónge ké dyicí wǎ eringe nyí ba/mû ba-chi i kpákpá ké nkéré mú ba/mû ba-kyâ kámbé biǐbyâa.

¹⁴ Ba-kpet emín banet-ashí ḿbé Ézerel, ḿbé ba-tî kámbé ba/fu, bakûri bǎmkpóngé. Ba-bí kámbé ba/fu, ebóng ba*fí to ba-chi i ocím-bolôk mú ba/mû ba-chi i kpákpá*.

¹⁵ Ne banet-ashí-bǎmkpóngé ḿbé Ézerel ba-dim ba-da-bí otu ba/fu, átá-otu, ebóng amu a-kyâ bě busông ḿbún.

¹⁶ Banet eyên ba*fí to ba-kyâ biǐbyâa ḿbyí byidacibi ne ecing ne byi-chi bolôk* nké ba/fu, be byichi ocím-bolôk obónge byi-ca kashú. Kántîk ba-kú ba-mín n bě, ne wo nké a/cen ne nkyí.

¹⁷ Otu o-raa ne mbé o/fu, ben ba-chi i banet-adare, ne ba*fí ba-ryuu ng ba/fu, ben ba-chi i bǎmkpóngé*. Nkyí nké kyi/chi ne bamu ba-bí ng mě ba/fu, me mmîng běn ba-da-chi byifen ba-kye Óburúkpâbí.

¹⁸ Bwa n̂g esim bǎmkpóngé echi. Baa*kye běn to biǐbyâa* ne ba-man ba-chi ocím-bolôk mú ba/mû ba-chi i kpákpá.

¹⁹ Ḿbé banet-ashí-bǎmkpóngé ámbe ba/nyît ba/fu, mbé ba/firi ké afaníkong eringe nyí ba/sét kámbé éné ba/fu, ba-man ba-chi ocím-bolôk obónge wǎ eringe nyí ba/mû ba-chi i kpákpá.

²⁰ Ńdyí ba-kú ba-dim m, ba/kwárê ne Músis ne Éron ḿbé ba/mû ba-bám m kámbé,

²¹ ba-raa ne mbé ba/fu, Óburúkpâbí oo/ri ńkyí baa/chi, ne o/chi o-kye běn busông ḿbú ba/chi byi-kú byi-sa ng otu ne banet-ashí-bǎmkpóngé emen kafâ. Baa/tông kámbé bukwóp ḿbú bada bě eju.

Músis o/fé Nshwam o-kye Óburúkpâbí

²² Ne Músis o-chîfé kâng nshwam o-kye Óburúkpâbí o/fu, ebóng amu a-kyâ banet eyên busông. Ebóng a/twóm mě nyín.

²³ Kyi-fím ké nkéré mú n/dim n-da-pem ne otu, o-kú o-bên n kámbé dyitî, ne a*da/chi ne chwǒm ńkyí adachwáp kámbé*.