Ézódos 40 - Bokyi Bible

Ba/bi Mpyep mú Óburúkpâbí odakyú, ba-jware Kámú

¹ Óburúkpâbí o/sét Músis o/fu,

² ké mbwôp kashú-dyicí mú mbwôp kashú-otukáku, yip mpyep mú ndakyú a-bi cip.

³ Fé mkpukpu-byěm ejí mú ba/fé byije ejí diǐkpú, a-yip ékpígí a-tîm ké kashú emen.

⁴ Yip ókpákpúrúk a-fé ké kafâ a-twôom byipang emen ké mǔ. Yip to kyikwap-etyuryíkáng a-fé ké kafâ a-twôom etyuryíkáng ké nkyí.

⁵ Yip kyikit-kyifen echi ńkyí ba/chi ké gûl, ńkyí badashí burwan a-tî ké kashú-mkpukpu-byěm ejí, a-yip ékpígí nyí ocím-dyifyi a-tîm ké ocím-mpyep.

⁶ Yip kyikit-kyifen echi ńkyí badashí byifen a-tî ké bushú-mpyep.

⁷ Yip dyicáng-abwô esoo a-tî ké otyém ne otyém mú mpyep ne kyikit-kyifen echi, a-fé omu ké ndyí.

⁸ Yip ékpígí nyí oro-kyibám a-tîm kerékeré, a-fé ékpígí-ocím-dyifyi-oro.

⁹ Jware kâng mpyep ámu ne kángkáng byipang emen ké bakút-ociring epwó ké mǔ, ne o/chi o-firi mpyep-ociring.

¹⁰ Ké nnyinyěng, yip bakút-ociring a-pwó ké kyikit-kyifen echi ne kángkáng byipang emen, a-jware kánkyí, ne kyi/chi kyi-firi kiǐtí-kyikit-ociring.

¹¹ Jware to dyicáng-abwô esoo ne kyikû emen ké bukwóp ámbu bubónge.

¹² Bâ ne Éron ne bwǎn emen ké ocím-dyifyi-mpyep, a-sét kámbé ba-kôo omu ké bushú ejí.

¹³ Fé Éron byídí ḿbyí nchi kyifen ejí, a-pwó ǎ bakút ké dyishí, ne ké bukwóp ámbu a-jware ǎ eringe nyí odaman echi bǎmkpóngé wǎ nchi kyifen ejí.

¹⁴ Bâ ne bwǎn emen a-yip bankyû a-fé kámbé.

¹⁵ Pwó kámbé bakút ké dyishí wǎ eringe nyí a/pwó bonchí ebe, eringe nyí mbé badaman echi bǎmkpóngé ba-kye mě wǎ banchi kyifen ejí. Bakút ḿbén epwó ké dyishí ba/chi ba-chi kámbé ba-firi banchi kyifen ejí ké kángkáng bankéré ḿbé mbe ba-bâ.

¹⁶ Músis o/chi kángkáng byěm wǎ eringe nyí Óburúkpâbí o/sét ǎ.

¹⁷ Ké bubwô ámbu, ké mbwôp kashú-dyicí mú mbwôp kashú-otukáku mú nnyinyěng-dyije, mú ba/dim ba-mîng Éjip, Músis o/kúng mpyep mú Óburúkpâbí odakyú o-bi cip.

¹⁸ Músis o/fé byikû emen kyísí, o-kúng byichí ḿbyí mbyi wǎ bawíndu o-bi, o-kúng ḿbyí cángecangecánge o-cibi, o-fé byikwap emen.

¹⁹ O-yip kyídí ńkyí ké kafâ ne ńkyí kyíjí o-cít ké mpyep, wǎ eringe nyí Óburúkpâbí o/mû o/sét ǎ.

²⁰ Ne o-kúng kâng biǐbáá-aká ámbyi byifee o-fé ké kafâ-mkpukpu-byěm-Osówo. O-fé echí ké ékpâl-mkpukpu, o-yip kiinkíbí o-cít.

²¹ Ne o-yip kâng mkpukpu ámu o-fé ké kafâ-mpyep, o-yip ékpígí nyí edaku kámú o-tîm. Ké bukwóp ámbu, o/ku mkpukpu-byěm-Osówo, wǎ eringe nyí Óburúkpâbí o/sét ǎ.

²² O-yip ókpákpúrúk o-fé ké kafâ-mpyep ká kyicê-bushûyû, ké esim-ékpígí nyí kyíjí,

²³ o-yip berêt mú badachi kyifen ba-kye Óburúkpâbí o-twôom ké mǔ, wǎ eringe nyí Óburúkpâbí o/mû o/sét ǎ.

²⁴ O-yip kyikwap-etyuryíkáng o-fé ké kafâ-mpyep, ké kyicê-busyísen, kyi-bírî kashú ne ókpákpúrúk

²⁵ ne o-waa ányi ké bushú ḿbú Óburúkpâbí o-mee etyuryíkáng, wǎ eringe nyí Óburúkpâbí o/mû o/sét ǎ.

²⁶ O-yip kyikit-kyifen echi ńkyí badashí burwan, ńkyí ba/chi ké gûl, o-fé ké kafâ-mpyep, ké bushú-ékpígí,

²⁷ o-mee burwan ḿbú budanyîn kyinung, wǎ eringe nyí Óburúkpâbí o/mû o/sét ǎ.

²⁸ O-yip ékpígí o-tîm ké ocím-dyifyi-mpyep,

²⁹ ne o-yip kyikit ńkyí badashí byifen o-tî ányi ké kashú-ékpígí. Ké kyikit-kyifen echi ánkyi, o/chi byifen ḿbyí badashí byěm ne kyifen-esang-byichí, wǎ eringe nyí Óburúkpâbí o/mû o/sét ǎ.

³⁰ O-yip dyicáng-abwô esoo o-tî ké otyém ne otyém mú mpyep ne kyikit-kyifen echi, o-fé omu ké ndyí.

³¹ Músis ne Éron ne bwǎn emen ba/soo abwô ne byiká ebe ányi

³² nang nkéré orá nké ba/nung ké mpyep, nang ba/ce ké kyikit-kyifen echi, wǎ eringe nyí Óburúkpâbí o/mû o/sét ǎ.

³³ Músis o-yip ékpígí nyí e/wâng mpyep ne kyikit-kyifen echi o-fé ké kafâ o-tîm, ne o-tîm to ékpígí-ocím-dyifyi-oro ámu. Ne Músis o-man kâng kángkáng bǎmkpóngé ámbe.

Ófíbí mú o/bwom Kyíbóng-Mpyep mú Óburúkpâbí odakyú

³⁴ Ne ófíbí ámu o-cít mpyep ámu, ne busan ḿbú ragerage ḿbú bu/fím ké bushú ḿbú Óburúkpâbí, bu-sú ké kafâ-mpyep.

³⁵ Ké bubwô-busan ámbu, Músis o*da/man enung ké kafâ-mpyep*.

³⁶ Banet ḿbé Ézerel ba-dim m ké kyikit ńkyí mbe ba-kyú u, ba-jâ ké kyikíri nang nkéré orá mú ófíbí ámu o/mîng mpyep.

³⁷ Â ófíbí ámu o*da/dim ne ké mpyep* baa*mîng kyikit ánkyi*.

³⁸ Ké kángkáng bankéré ebe ḿbé mbe ba-yêe ng, mbé ba/mû ba-ri ng ófíbí mú Óburúkpâbí odakyú kyíbóng-mpyep ne esû, ne okwâ mú odamang kyíbóng ne buchú.