Ézódos 4 - Bokyi Bible

Osówo o/kye Músis Busa ḿbú odachi Byěm-Akat

¹ Ne Músis o-faa kâng Óburúkpâbí o/fu, â banet ḿbé Ézerel ba*da/fwôo atông ba-jwo mě kâng*. Me n-chi i nǎ, â ba/sét mě ba/fu, wo a*da/byí a-kâm mě*.

² Ne Óburúkpâbí o-bí Músis o/fu, wo a/níbî ebóng ké bubwô. Músis o-faa o/fu, ochí.

³ Óburúkpâbí o-sét ǎ o/fu, twóp kámú kyísí. Ké nkéré mú Músis o/twóp kámú kyísí, o/bírî efyi, ne Músis o-byí ne ochéé.

⁴ Ne Óburúkpâbí o-sét Músis o/fu, siring kyísí a-níbî kányí ké ocî. Ne Músis o-siring kâng kyísí o-níbî kányí, ne e-chîbírî ochí.

⁵ Óburúkpâbí o-sét ǎ o/fu, chi ńkyín a-tông banet ḿbé Ézerel eringe nyí badanyît ba/fu, Osówo Óburúkpâbí mú banchí enen ḿbé kpákpá, Osówo mú Ébarahâm ne Ázik ne Jekôp oo/byí o-kâm ǒ.

⁶ Óburúkpâbí o-chîsét Músis o/fu, fé bubwô ké kafâ-nkyû eyên. Músis o-chi éné, ne ké nkéré mú o/zú kámbú, bu-firi ne kyibî-orwôm-enyam-byiko.

⁷ Ne Óburúkpâbí o-sét ǎ o/fu, bwa ne bubwô eyên a-chîfé ké kafâ-nkyû. Ne o-chi éné, ne ké nkéré mú o/chîzú kámbú, orwôm ámu o/rím, bu-firi kanong wǎ enyam-byiko emen.

⁸ Ne Óburúkpâbí o-sét ǎ kâng o/fu, â a/chi akat nyí kashú ba*da/bángê ne wo* ńnyín a/chi a-chi kámbé ba-bángê ne wo.

⁹ Nké â a/chi akat ńnyín afee, nké ba*da/bángê ne wo* ba-jwo ńkyí a/sét kámbé* kpé omu ké kace ńké Nâl a-pwó kyísí. Omu ámu o/chi o-bírî baróng.

¹⁰ Nké Músis o/raa o/fu, aa*wááng* ǎ Óburúkpâbí*. *Da mě etwóm me*. Me mm*man eraa kyiraa* ne n*da/bwom ne wǎ onet mú odaman eraa* kyi-fím ké nkéré mú a/kpet eraa ne me*.

¹¹ Óburúkpâbí o-bí ǎ o/fu, yeě mu o-kyâ onet ocím mú odaraa kyiraa. Yeě mu o-chi i onet o-waa kiǐmyímé. Yeě mu o-kyâ ǎ achi, o-sé ǎ to achi. Me Óburúkpâbí nké mu n-chi i kámbyí.

¹² Ca kâng. Me n/chi n-chwáp ǒ a-kûman eraa, ne n/chi n-sét ǒ ńkyí adaraa.

¹³ Nké Músis o/chîfaa o/fu, aa*wááng* ǎ Óburúkpâbí*. Twóm onet okíri.

¹⁴ Ńdyí Músis o/raa ńkyín, kafâ ka-kpet esa Óburúkpâbí ne Músis, ne o-raa o/fu, Éron mú wǎn-boné eyên mú o/fím ké kyikû ńkyí Lyíva kâng. Me mu n-nyît ng n/fu, nyǐ o-man n eraa kyiraa kanong kanong. O-kú o-bâ ké bukwóp kántîk o/fu, nyǐ o-bâ ng ǒ ekâm, ne kyi/chi kyi-nyîn ǎ â o/ri ǒ.

¹⁵ A-man n epem ne nyǐ, a-sét ǎ ńkyí odasét. Me n/chi n-chwáp běn ashí amúmú ba-kûman eraa, ne n/chi n-sét běn ńkyí badachi.

¹⁶ Nyǐ o/chi o-kûpem banet ké bubwô eyên. Ne wo a/chi a-kyú ǎ wǎ Osówo emen, a-kû ǎ esét ńkyí odasét.

¹⁷ Kúng ochí mún a-ca ne mǔ. Mǔ nké a/chi a-kúng kámú a-kûchi byěm-akat.

Músis o/bwa Esim Éjip

¹⁸ Ne Músis o-bwa esim o-kâm Jétoro mú one emen o-da-sét ǎ o/fu, mîng mě m-bwa esim n-kâm bwǎn-bané ejí ké Éjip n-da-ri â ba/tôong okpó. Jétoro o-bángê, o-sét ǎ o/fu, oca kanong.

¹⁹ Ké nkéré mú Músis o/mû o/tôong ké Médyan, Óburúkpâbí o/sét ǎ o/fu, bwa esim ké Éjip, ké nǎ, kángkáng banet ḿbé ba/mû ba/fu, mbé ba-ju ng ǒ baa/kpú.

²⁰ Ne Músis o-kúng onyi emen ne bwǎn emen ḿbé banyinchéng o-twôom ké kaanyam-atû o-dim ne mbé Éjip, o-kúng ochí ámu mú Osówo o/sét ǎ o/fu, okúng.

²¹ Óburúkpâbí o-chîraa ne Músis o/fu, kántîk mú a-kú a-bwa ng esim Éjip, nyît a/fu, wo a/chi a-chi kángkáng akat nyí me nn/kye ǒ busa n/fu, chi ké bushú-otu mú Éjip. Nké n/chi n-shwane otu ámu dyishí ne oo*ba/chi o-bángê banet ḿbé Ézerel ba-dim*.

²² Wo a-man a-sét ǎ kâng a/fu, me Óburúkpâbí n/sét n/fu, Ézerel e-chi i ókpá-wǎn-onyinchéng ejí.

²³ Me n/sét n/fu, mîng banet ejí ba-dim ba-da-kye mě ofê, nké wo a/né. Kántîk n-kú m-bâ eju ókpá-wǎn-onyinchéng eyên.

²⁴ Ké kyikit ńkyí Músis o/rí ńdyí mu o-wâa ng Éjip, Óburúkpâbí o/kâm Músis o-kan o/fu, nyǐ o-ju ng ǎ.

^25-26 Ne Zipóra mú onyi-Músis o-yip buká ḿbú budanen o-két ntaam mú wǎn emen, o-kúng kámú o-ta Músis ké byiká. O-sét Músis o/fu, ké bubwô ḿbú dyicên ecên, wo a-chi i otyép ejí mú baróng. Ne ké bubwô ámbu, Óburúkpâbí o-mîng Músis eju.

²⁷ Ké nkéré ámu, Óburúkpâbí o/mû oo/sét Éron o/fu, ca ké kyikim-dyikán a-da-kwárê ne Músis. Ne Éron o-dim o-da-kâm ǎ ké kaku ńké ka/já Osówo, ne ké nkéré mú o/kâm ǎ, o/rwâm ǎ.

²⁸ Ne Músis o-sét Éron kángkáng byěm ḿbyí Óburúkpâbí o/sét ǎ ké nkéré mú o/sét ǎ o/fu, obwa esim Éjip. O/sét ǎ to kyi-kim ne byěm-akat ḿbyí Óburúkpâbí o/sét ǎ o/fu, ochi.

²⁹ Ne Músis ne Éron kâng ba-dim Éjip ba-da-kó kángkáng banet-ashí-Ézerel kyikit kyibónge.

³⁰ Éron o-sét kámbé kángkáng byěm ḿbyí Óburúkpâbí o/sét Músis, ne Músis o-chi kángkáng akat ányi o-tông kámbé.

³¹ Mbé ba-bángê, ne ké nkéré mú ba/jwo ba/fu, Óburúkpâbí oo/bê o-kâm kámbé, ne oo/ri eringe nyí ba*fí ba-man n kámbé etî* mbé ba/tíngê kyísí ba-kye ǎ ofê.