Ézódos 39 - Bokyi Bible

Ba/zim Byídí ḿbyí Banchi Kyifen-Osówo

¹ Banet-bǎmkpóngé-byídí ḿbyí ba/chi ké eríp-etám-ebû, ḿbyí bulûbulu ne ḿbyí kpúúl ne ḿbyí shíshét ba-zim byídí-banchi kyifen-Osówo ḿbyí byinong byinong, ḿbyí banchi kyifen-Osówo badafé ké nkéré ba-kú ba-chi i bǎmkpóngé ké kafâ-nfût-ociring. Mbé ba/zim byídí-nchi kyifen-Osówo ba-kye Éron wǎ eringe nyí Óburúkpâbí o/sét.

² Ba/kúng okpówo mú onong onong, mú ba/chi ké eríp-etám-ebû nyí bulûbulu ne nyí kpúúl ne nyí shíshét ne bacat-gûl ba-zim kyídí-kakim.

³ Mbé ba/díp byikim-gûl byi-firi gbalegbale, ba-két kámbyí boǒkím boǒkím ḿbú badafé ké kyídí ánkyi ńkyí bulûbulu ne shíshét ne kpúúl.

⁴ Ba-zim boǒrí-byikem bufee, ba-tú ké bakô-kyídí-kakim ánkyi eringe nyí badaman ezim kánkyí.

⁵ Ba/tú emâp nyí ba/tím kányí kanong kanong ké dyizong-kyídí ándyi dyibónge ké kyídí-kakim ánkyi eringe edakyú cibicibi ne kyídí-kakim, wǎ eringe nyí Óburúkpâbí o/mû o/sét Músis.

⁶ Ba-kúng kâng aká nyí badakó kanyílyan ba-chi kánkyí ba-lák ké gûl. Ba-sáng azîn nyí bwǎn-Jekôp ashí diǐkpú ne afee kanong kanong ké nkyí.

⁷ Ba-kúng kánkyí ba-lák ké boǒrí-byikem ámbu, eringe byidabwom ké dyishí-byikû-banet diǐkpú ne byifee ḿbyí Ézerel, wǎ eringe nyí Óburúkpâbí o/mû o/sét Músis.

Ba/zim Kiimbam-Kakim

⁸ Ba/zim kiimbam-kakim ké dyizong-kyídí dyibónge wǎ ńdyí ba/zim kyídí-kakim, ba-fé to basáng eringe ebónge ké nkyí.

⁹ Kyi/mû baryên ne butang jangjang ne ba/bîim kánkyí kafee, ne kyi/mû basentyímyíta bujam ne bafee ké baryên ne butang.

¹⁰ Ba-tú etáng-aká nyí adashwane kasî enyii ké nkyí. Ké otáng mú mbwôp kashú, ba/tú aká nyí badakó rúbyi ne tópas ne gánet.

¹¹ Ké nnyinyěng-otáng, ba-tú aká nyí badakó émárol ne safára ne dámon.

¹² Ké etáng echât, ba-tú nyí badakó túkos ne ágat ne ámátyis.

¹³ Ne ké etáng enyii, ba-tú nyí badakó búrol ne kanyílyan ne jásapa. Aká ńnyín ba/lák kányí ké biǐbáá-gûl.

¹⁴ Buká nang burá ké aká ányi diǐkpú ne afee ba/sáng dyizîn dyibónge ńdyí wǎn-Jekôp eringe nyí azîn ányi adabwom ké dyishí-byikû-banet ḿbyí Ézerel diǐkpú ne byifee.

¹⁵ Ké kiimbam-kakim kyiyén ba/kpong boǒrí-gûl ḿbú ba/muu wǎ orí.

¹⁶ Ba/chi biǐbáá-gûl byifee ne ékpâl-gûl efee ba-tú ké bakô-ashí-byikem-kiimbam.

¹⁷ Ba/tú boǒrí-gûl ámbu bufee ké ékpâl-gûl ányi to efee,

¹⁸ ba-yip ashí-boǒrí-gûl afee nyí abónge ba-tú ké biǐbáá-gûl ámbyi byifee, ne ké bukwóp ámbu, ba-tú kámbú ké kashú-boǒrí-byikem ḿbú kyídí-kakim.

¹⁹ Ba-chi ékpâl-gûl efee ba-tú kányí ké bakô-kiimbam-kakim ḿbé kyísí, ké kyicê ńkyí ké kafâ, ńkyí kyi/kim ne kyídí-kakim.

²⁰ Ba-chîchi ékpâl ekíri efee ba-tú kányí ké kyikim ńkyí kyísí, ńkyí boǒrí-byikem ḿbú kyídí-kyikim ḿbú ké kashú, fáráng ne ocím-emâp nyí enong enong, nyí ba/tím otím.

²¹ Wǎ eringe nyí Óburúkpâbí o/mû o/sét Músis, ba/yip ékpâl nyí kiimbam-kakim ba-ziri ne ékpâl nyí kyídí-kakim ké orí mú bulûbulu, eringe nyí kiimbam-kakim kii*kyú pogepoge*.

Ba/chi Byídí-Banchi Kyifen-Osówo Byikíri

²² Ágbádá nyí badafé a-cít kyídí-kakim ba/zim kányí ké kyídí ńkyí bulûbulu, ńkyí ba/chi ké eríp-etám-ebû.

²³ Ba/tím kyitông emen kyi-cîp eringe nyí kii*járê*.

^24-26 Ké ocím emen mú kyísí kerékeré ba/fé byirim-byichí ḿbyí badakó pamagáránat, ḿbyí ba/tím ké bacat ḿbé bulûbulu ne ḿbé kpúúl ne ḿbé shíshét, ba-tú boǒgbáng ké otyém ne otyém ebe, wǎ eringe nyí Óburúkpâbí o/mû o/sét Músis.

²⁷ Ba-zim bankyû ḿbé Éron ne bwǎn emen

²⁸ cibicibi ne byídí-dyishí ne ebáta-okpówo

²⁹ ne kyicê-kyídí ńkyí badasît ké osín, ńkyí ba/zim ké byídí-okpówo mú onong onong ne ḿbyí ba/chi ké eríp-etám-ebû ḿbyí bulûbulu ne ḿbyí shíshét ne ḿbyí kpúúl, ba-fé basáng ḿbé banong banong ké nkyí, wǎ eringe nyí Óburúkpâbí o/mû o/sét Músis.

³⁰ Ba-chi byibwáng byibónge, ḿbyí mbyi ekap nyí Éron o/já Óburúkpâbí, ké gûl mú onong onong, ba-sáng ányi ké mbyí ba/fu, kyi/já Óburúkpâbí.

³¹ Ba-yip kámbyí ba-bwá ké bushú-kyídí-dyishí ne bucat ḿbú bulûbulu, wǎ eringe nyí Óburúkpâbí o/mû o/sét Músis.

Ba/man Bǎmkpóngé ámbe

³² Ba-man kâng kángkáng bǎmkpóngé ḿbé mpyep mú Óburúkpâbí odakyú. Banet ḿbé Ézerel ba/chi kángkáng byěm wǎ eringe nyí Óburúkpâbí o/mû o/sét Músis.

³³ Ba-yip mpyep ámu ne kángkáng byěm ḿbyí mbyi ké mǔ ba-ba-kye Músis, ne boǒmkpák emen, ne byichí ḿbyí badacibi ne barî wǎ bawíndu, ne ḿbyí cángecangecánge, ne byikwap emen ne byikû ebe,

³⁴ ne kyídí ńkyí ba/cít kámú, ńkyí ba/chi ké ekwop-otyítǎm nyí ba/fé bukye ḿbú shíshét, ne ekwop-enyam nyí enong enong nyí ba/cít kámú, ne ékpígí nyí e/ku kámú.

³⁵ Ba-ba-kye ǎ to mkpukpu-byěm-Osówo ne biǐbáá-aká ámbyi ḿbyí ba/fé ké kafâ, ne echí emen ne kiinkíbí emen.

³⁶ Ba-kye ǎ to ókpákpúrúk ne byipang emen ne berêt mú ba/chi kyifen ba-kye Osówo,

³⁷ ne kyikwap-etyuryíkáng ńkyí ba/chi ké gûl mú onong onong, ne etyuryíkáng emen ne kángkáng byipang emen ne bakút ḿbé badafé ké etyuryíkáng.

³⁸ Ba-kye ǎ to kyikit-kyifen echi ńkyí ba/chi ké gûl, ne bakút-ociring ne burwan ḿbú budanyîn kyinung, ne ékpígí nyí badacít ké mpyep-Óburúkpâbí,

³⁹ ne kyikit-kyifen echi ńkyí ba/chi ké borôn, ne kiǐchwóm ńkyí badakwa byěm, ńkyí ba/chi to ké borôn, ne echí emen ne kángkáng byipang emen. Ba-kye ǎ to dyicáng-abwô esoo ne kyikû emen,

⁴⁰ ne ékpígí nyí oro-kyibám-mpyep mú Óburúkpâbí, ne byikwap emen ne byikû emen ne ékpígí nyí ocím-dyifyi-oro, ne erí emen ne byikim ḿbyí badacibi kámú ba-fé kyísí, ne kángkáng byěm ḿbyí badachi bǎmkpóngé ké mpyep ámu.

⁴¹ Ba-kye ǎ to byídí ḿbyí byinong byinong ḿbyí banchi kyifen-Osówo badakûfé ké kafâ-nfût-ociring, byídí-ociring ḿbyí Éron mú nchi kyifen-Osówo ne bwǎn emen.

⁴² Banet ḿbé Ézerel ba/chi kángkáng bǎmkpóngé ámbe kerededet wǎ eringe nyí Óburúkpâbí o/mû o/sét Músis.

⁴³ Músis o-kpúrî kángkáng byěm o-ri o/fu, ba/chi kámbyí kángkáng kerededet wǎ eringe nyí Óburúkpâbí o/mû o/sét ǎ. Ne Músis o-jware kâng kámbé.