Ézódos 38 - Bokyi BibleBa/chi Kyikit-Kyifen echi ( Ézódos 27:1-8 ) 1 O/chi kyikit-kyifen echi ké byichí-akákya, ńkyí badashí byěm-kyifen. Kyi/mû baryên ne butang jangjang, bamyíta bafee ne kaǎnyín ké butang ne baryên, ne myíta obónge ne kaǎnyín ké bunyâam. 2 O/dóng ashí wǎ etwóm ké bakô emen banyii ḿbé kyíbóng, o-chi kámbé ba-kyú cibicibi ne kyikit ánkyi. O-cít kánkyí kángkáng ne borôn. 3 O/chi to kángkáng byipang ḿbyí kyikit-kyifen echi ánkyi, acáng ne basóburu ne acáng nyí aryên ne acáng nyí badafé okwâ ne egiryimgbáng-asháng. Kángkáng byěm ḿbyín o/chi kámbyí ké borôn. 4 O-chi kiǐchwóm ńkyí badakwa byěm ké borôn o-fé kánkyí ké ocím-kyikit-kyifen ánkyi mú kyísí, kyi-bwom ké bujinjang kafee mú bunyâam-kyikit-kyifen echi. 5 O-chi ékpâl enyii nyí badakûyip kánkyí, o-fé kányí ké bakô emen banyii. 6 O-chi echí nyí badatû kánkyí ké byichí-akákya, o-cít kányí ne borôn, 7 o-yip kányí o-fé ké ékpâl nyí nyi ké bakô-kyikit ánkyi. Kyikit-kyifen echi ánkyi ba/chi kánkyí ké byicê-byichí, ba-chi otyém emen o-ríbî. Ba/chi Dyicáng-Abwô esoo ké Borôn ( Ézódos 30:18 ) 8 O/chi dyicáng ńdyí dyiryên ne kyikû emen ké éyên nyí borôn, nyí ḿbé banyinyi ḿbé ba/mû ba-chi i bǎmkpóngé wǎ bǎmgbán ké ocím-dyifyi mú mpyep mú Óburúkpâbí odakyú. Ba/chi Oro-Kyibám mú odawâng Mpyep mú Óburúkpâbí odakyú ( Ézódos 27:9-19 ) 9 O/kúng okpówo mú onong onong o-chi oro-kyibám mú o/wâng mpyep mú Óburúkpâbí o-fé ké kafâ. Ké kyicê ńkyí busyísen, oro ámu o/mû bajam-bamyíta bafee esim banyii ké butang. 10 Ba-tím kámú ké byikwap ḿbyí ba/chi ké borôn bujam, ḿbyí ba/fé byikû emen ké borôn ne biǐré ḿbyí byitang byitang ne boǒmkpák ḿbú ba/chi ké syílyíba. 11 Oro ámu o/mû eringe ebónge ké kyicê ńkyí bushûyû. 12 Ké kyicê ńkyí esû edaríbî e-jâ, oro ámu o/mû bamyíta bujam ne bafee ké butang ne byikwap diǐkpú, ne byikû ebe to diǐkpú, ne boǒmkpák ne biǐré ḿbyí byitang byitang, ḿbyí ba/chi ké syílyíba. 13 Ké kyicê ńkyí esû edabyí, ké kyicê ńkyí dyifyi emen dyi/mû, oro ámu o/mû to bamyíta bujam esim bafee ké butang. 14-15 Ké bakô-dyifyi ándyi, oro o/mû bamyíta nyâchât ne kyicê ne byikwap byichât ne byikû-byikwap to byichât. 16 Ba/kúng okpówo mú onong onong ne ba-chi oro ámu omúmú, mú o/wáp kerékeré. 17 Byikû-byikwap emen ba/chi ké borôn, ba-kúng syílyíba ba-chi boǒmkpák ne biǐré ḿbyí byitang byitang ne ashí-byikwap. Ba/cibi kángkáng byikwap ḿbyí byi/mû ké oro ámu ké biǐré ḿbyí byitang byitang, ḿbyí ba/chi ké syílyíba. 18 Kyídí ńkyí kyi/cít ocím-dyifyi-oro ámu ba/chi kánkyí ké okpówo mú onong onong, mú ba/chi ké bacat ḿbé legelege, ḿbé bulûbulu ne ḿbé kpúúl ne ḿbé shíshét, ba-zim kánkyí basáng ḿbé banong banong. Kyi/mû bamyíta kátángekányi ké butang ne bamyíta bafee ké bunyâam, wǎ oro mú o/wáp kerékeré. 19 Ba/tím kyídí-ocím-dyifyi ánkyi ké byikwap byinyii ḿbyí ba/fé byikû ebe ké borôn. Boǒmkpák emen ne ashí-byikwap emen ne biǐré ḿbyí byitang byitang ba/chi ké syílyíba. 20 Kángkáng byikim-biǐré ḿbyí ba/mán mpyep ámu kyísí ne ḿbyí ba/cibi oro mú o/wáp kámú, ba/chi kámbyí ké borôn. Biǐré ḿbyí ba/kúng ba-chi Mpyep mú Óburúkpâbí odakyú 21 Nyín něen ocím-biǐré ḿbyí ba/kúng ba-chi mpyep mú Óburúkpâbí odakyú, ké kyikit ńkyí ba/tî biǐbáá-aká byifee ḿbyí ba/sáng Byije-Osówo diǐkpú ké mbyí. Músis nké o/fu, babâ ne ocím-biǐré ámu, ne bǎmgbán-banchi kyifen-Osówo nké ba/kye kámú ḿbé ba/mû ba-chi i bǎmkpóngé ne Étama mú wǎn-Éron, mú nchi kyifen-Osówo. 22 Bézalel mú wǎn-Orí, mú bonchí emen mú kánkán o/mû o-bángê e Hôo, ké kyikû ńkyí Júda, nké o/chi kángkáng byěm ḿbyí Óburúkpâbí o/sét o/fu, bachi. 23 Ohólyap mú wǎn-Ahísámak, mú o/fím ké kyikû-banet ńkyí Dǎn, mú o/mû o-chwáp ng Bézalel, o/mû onet-mpwô mú odaman esím byěm ké aká, ne mú odaman ekabe eringe nyí badachi bǎmkpóngé-mpwô ne onet to mú odaman echi okpówo mú onong onong, mú bulûbulu ne mú kpúúl ne mú shíshét, mú ba/chi ké eríp-etám-ebû. 24 Kángkáng gûl mú ba/kúng ba-kye Óburúkpâbí wǎ eyáré-dyityém ba/fu, bakúng kámú ba-chi mpyep-ociring o/mû égot-bakyílogaram etánge ké burô, mú ba/kan kámú o-tyeem ne akpuga nyí mpyep-ociring. 25 Syílyíba mú ba/pan banet ké oshê omúmú ne ba-kye o/mû égot-bakyílogaram onyiryiká ne efee ne bakyílogaram bujam esim diǐkpú ké burô, mú o/tyeem ne akpuga nyí mpyep-ociring. 26 Ocím mún nké o/byí ké kángkáng syílyíba mú kángkáng banet ḿbé ba/pan kámbé ké banet epan ba/kye, mú nang yeě nang yeě o/kye ocím mú emen, mú o/tyeem ne akpuga nyí mpyep-ociring. Banet ḿbé ba/mû baa/kán kyi-fím ké aje bujam kyi-jâ kyíbóng, ḿbé ba/mû ba/pan kámbé ba/mû égot-banet etánge etánge ké bajam-byikit bujam esim diǐkpú ne byichât ne égot efee esim bajam-banet káchâtkányi esim diǐkpú. 27 Ké ocím-syílyíba, égot-bakyílogaram onyiryiká ne efee nké ba/yip ba-chi bajam-byikû-byikwap batánge, ḿbyí byikwap ḿbyí mpyep ne ḿbyí oro mú o/wáp mpyep ámu. Kyikû-kyikwap nang kyirá kyi/ryí bakyílogaram-syílyíba bujam esim diǐkpú ne banyii. 28 Bézalel o/kúng bakyílogaram-syílyíba bujam esim diǐkpú ḿbé ba/waa o-chi biǐré ḿbyí byitang byitang ne boǒmkpák ne ḿbyí ba/cít ashí-byikwap. 29 Borôn mú ba/mû ba/kye Óburúkpâbí o/mû égot-bakyílogaram diǐkpú ne efee ne bakyílogaram bujam esim batánge. 30 Bézalel o/kúng kámú o-chi byikû-byikwap ḿbyí ocím-dyifyi-mpyep mú Óburúkpâbí odakyú. O-kúng to borôn ámu o-chi kyikit-kyifen echi ne kiǐchwóm ńkyí badakwa byěm ne kángkáng byipang ḿbyí mbyi ké kyikit-kyifen echi, 31 ne byikû-byikwap ḿbyí ba/tím ékpígí nyí oro ne ocím-dyifyi-oro ne kángkáng byikim-biǐré ḿbyí ba/kúng ba-mán mpyep kyísí ne oro mú o/wáp mpyep ámu o-fé ké kafâ. |
Published by the Bible Society of Nigeria @ 1985
Bible Society of Nigeria