Ézódos 37 - Bokyi Bible

Ba/chi Mkpukpu-Byěm-Osówo

¹ Bézalel o/kúng byichí-akákya o-chi mkpukpu-byěm-Osówo, basentyímyíta bajam batánge esim diǐkpú ké butang ne bajam-basentyímyíta bachât esim nyâchât ké baryên ne bajam-basentyímyíta bachât esim nyâchât ké bunyâam.

² O-cít kafâ emen ne esim emen ké gûl mú onong onong, o-chi to ocím emen ké gûl o-wáp o-kwárê.

³ O-chi ékpâl enyii nyí badaníbî kámú o-fé ké byiká emen byinyii, byifee ké bukô bubónge.

⁴ O-chi echí nyí badaníbî kámú ké byichí-akákya, o-cít kámbyí ne gûl,

⁵ o-kúng kámbyí o-fé ké ékpâl ányi ké bakô emen.

⁶ O-chi kiinkíbí emen ké gûl mú onong onong, ńkyí nkyí basentyímyíta bajam batánge esim diǐkpú ké butang ne basentyímyíta bajam bachât esim nyâchât ké baryên.

⁷ O-chi biǐnyám byifee ne abyibabang ké gûl mú ba/díp odíbíng,

⁸ kyibónge kyibónge ké dyishí-kiinkíbí-mkpukpu. O/chi kámbyí byi-kyú wǎ chwǒm kyibónge ne kiinkíbí.

⁹ Biǐnyám ámbyi byi/bwom ké kiinkíbí byi-bírî barî kashú ne abyibabang ebe nyí a/paam a-cít kánkyí.

Ba/chi Ókpákpúrúk mú Berêt, mú ba/chi Kyifen ba-kye Osówo

¹⁰ O-chi to ókpákpúrúk ké byichí-akákya mú o/mû bajam-basentyímyíta banyii esim nyíryinyi ké butang ne basentyímyíta bajam bafee esim banyii ké baryên ne bajam-basentyímyíta bachât esim nyâchât ké bunyâam.

¹¹ O/cít kámú ne gûl mú onong onong, o-chi to ocím emen ké gûl o-wáp o-kwárê.

¹² O-chi ocím emen o-rêe ké bajam-bamyílyímyíta bachât esim onyiryiká o-wáp kámú o-fé ké kafâ, o-fé to bakô ba-wáp ocím kerékeré.

¹³ O-chi ékpâl enyii ké gûl, nyí badaníbî kámú, o-fé kányí ké bakô emen banyii ḿbé byiká byi/mû.

¹⁴ Ékpâl ányi nyí e/níbî echí nyí badayip ókpákpúrúk ámu ba/mû ba/fé kányí fáráng ne ocím emen.

¹⁵ O/chi echí ányi ké byichí-akákya o-cít kámbyí ne gûl.

¹⁶ O-chi acáng ne bammîk ne etyu ne acáng nyí aryên ké gûl, ḿbyí ba/chi ba-kûchi kyifen-bato.

Ba/chi Kyikwap-Etyuryíkáng

¹⁷ O/chi kyikwap-etyuryíkáng ké gûl mú onong onong. O/chi kyikû emen ne okyukyu emen ké gûl mú ba/díp odíbíng. O/lák ekong-byichí nyí badamee, nyí ee/bwá kyirim ne boǒshǎan ké kyikû, ké nkyí, e-kyú cibicibi ne kyikwap kyiyén.

¹⁸ O/chi bamgbang nyâchât ba-bwom ké bakô emen, bachât bachât ké kyicê kyibónge.

¹⁹ Mgbang nang orá o/mû ne ekong-byichí echât nyí ba/mee kányí wǎ ekong-ámon nyí ee/bwá dyiku ne boǒshǎan ké kyikû.

²⁰ Okyukyu-kyikwap-etyuryíkáng ámu o/mû ne ekong-byichí nyí ba/chi kányí wǎ ekong-ámon nyí ee/bwá dyiku ne boǒshǎan ké kyikû.

²¹ Ba/cibi bamgbang bafee ba-tú dyiku-ekong-kyichí dyibónge.

²² Aku-ekong-byichí ányi ne bamgbang ne kyikwap-etyuryíkáng byi/bwom wǎ chwǒm kyibónge ńkyí ba/chi ké gûl mú onong onong, mú ba/díp odíbíng.

²³ O-chi etyuryíkáng káchâtkányi nyí badatwôom ké kyikwap ánkyi, o-chi chwǒm ńkyí badarîp okwâ ne boǒcáng emen ké gûl mú onong onong.

²⁴ O/kúng bakyílogaram-gûl mú onong onong bujam esim onyiryiká o-chi kyikwap-etyuryíkáng ánkyi ne kángkáng byipang emen.

Ba/chi Kyikit-Kyifen echi ńkyí badashí Burwan

²⁵ O-chi kyikit-kyifen echi ńkyí badashí burwan ké byichí-akákya. Kyi/mû baryên ne butang jangjang. Kyi/mû bajam-basentyímyíta bafee esim batánge ké butang ne baryên, ne bajam-basentyímyíta banyii esim diǐkpú ké bunyâam. Ashí emen nyí a/bwom wǎ etwóm ké bakô emen a/bwom wǎ chwǒm kyibónge ne kyikit ánkyi.

²⁶ O/cít bubóng emen ne bakô emen banyii ne ashí emen ké gûl mú onong onong, o-chi ocím emen ké gûl o-wáp o-kwárê.

²⁷ O-chi ékpâl efee nyí badakúng kánkyí, o-fé kányí ké kyikû-ocím emen ké bakô emen bafee, e-níbî echí nyí badakûtû kánkyí.

²⁸ O/chi echí ányi ké byichí akákya, o-cít kámbyí ne gûl.

Ba/chi Bakút ḿbé badajware Byěm-Ociring ne Burwan

²⁹ O/chi to bakút-ociring ḿbé badajware byěm ne ochíchí-burwan ḿbú budanyîn kyinung o-cibi kámbú wǎ bakút-kyinung.