Ézódos 36 - Bokyi Bible

¹ Bézalel ne Ohólyap ne kángkáng banet-bǎmkpóngé ḿbé áku, ḿbé Óburúkpâbí oo/kye kámbé bubong ne byinyídíng, ḿbé mbe ba-nyît ng eringe nyí badachi kángkáng byěm ḿbyí ba/chi ba-kúng ba-bi mpyep-ociring nké ba/chi ba-chi kángkáng byěm wǎ eringe nyí Óburúkpâbí oo/sét.

Banet-Ézerel ba/bê ne Eyáré Chwóó

² Músis o/kó Bézalel ne Ohólyap ne kángkáng banet-mpwô ḿbé áku, ḿbé Óburúkpâbí oo/fé kámbé byinyídíng, ne ḿbé mbe ba-ryuu ng ba/fu, mbé ba-chwáp ng, ne Músis o-sét kámbé o/fu, bakpet bǎmkpóngé echi.

³ Banet-bǎmkpóngé ámbe ba-koo kángkáng eyáré ké abwô nyí Músis, nyí banet ḿbé Ézerel ba/bê ne nyǐ ba/fu, bakúng ba-chi mpyep ámu. Nké banet-Ézerel ba*da/mîng Músis eyáré ebe ebakye kángkáng dyicófóróng*.

⁴ Ne banchi mpwô ḿbé mbe ba-chi i bǎmkpóngé ámbe ba-dim kâng

⁵ ba-da-sét Músis ba/fu, banet mbe ba-bâ ne byěm ḿbyí bii/jê byi-shwôm, ḿbyí byidakúng byi-chi bǎmkpóngé mbé Óburúkpâbí oo/sét o/fu, bachi.

⁶ Ne Músis o-twóm ejá kâng e-kâm kángkáng banet-Ézerel o/fu, onet nang obónge o*dachi o-chîbê ne eyáré nyí badakúng ba-bi mpyep*. Ne banet kâng ba-mîng eyáré ebê ne nyǐ.

⁷ Byěm ḿbyí banet ba/wá ba-kye, byi/jê byi-shwôm ḿbyí badakúng ba-man bǎmkpóngé.

Eringe nyí ba/chi Mpyep mú Óburúkpâbí odakyú

⁸ Banet ḿbé badanyît bǎmkpóngé-mpwô ba-shwôm ké burwám-banet-bǎmkpóngé ámbe nké ba/chi mpyep mú Óburúkpâbí odakyú. Ba/chi kámú ké byicê-okpówo diǐkpú ḿbyí byinong byinong, mú ba/chi ké bacat ḿbé bulûbulu ḿbé kpúúl ne ḿbé shíshét, ḿbé ba/chi ké eríp-etám-ebû ḿbyí ba/tím biǐnyám ḿbyí mbyi ne abyibabang ké mbyí.

⁹ Kyicê-kyídí nang kyirá kyi/mû eringe ebónge, bamyíta diǐkpú ne bafee ké butang ne bamyíta bafee ké baryên.

¹⁰ Ba/zim byicê byitánge ba-cibi ne barî, ba-zim to ḿbyí áku byitánge ba-cibi ne barî.

¹¹ Ké byicê ámbyi byifee, ké esim ebe nyí kyíjí, ba/tú boorim-bacat ḿbú bulûbulu ké mbyí.

¹² Ké kyicê ńkyí kyiryên, ńkyí mbwôp kashú, ba/tú bajam-boorim-bacat bafee esim diǐkpú, ba-tú to eringe ebónge ké kyicê ńkyí áku, byi-tyeem ne barî.

¹³ Ba-chi bajam-boǒmkpák bafee esim diǐkpú ké gûl, ḿbé badayip byikim-byídí ámbyi byifee ba-cibi ne barî byi-firi kyídí kyibónge.

¹⁴ Ne ba-chi kâng kyídí ńkyí badacít ké mpyep ámu, ké byicê-byídí diǐkpú ne din ḿbyí ba/chi ké eríp-ebúbǔu.

¹⁵ Ba/chi byicê-byídí ámbyi kángkáng jangjang, bamyíta diǐkpú ne bachât ké butang ne bamyíta bafee ké baryên.

¹⁶ Ba-yip byikim byitánge ba-zim ne barî, ba-chi kyicê ńkyí kyiryên kyibónge, ba-zim to ḿbyí áku nyâchât, ba-chi to kyicê ńkyí kyiryên kyibónge.

¹⁷ Ba-tú boorim-bacat bajam bafee esim diǐkpú ké ocím mú kyicê kyibónge ne eringe ebónge to ké ocím mú kyicê ńkyí áku.

¹⁸ Ba-chi bajam-boǒmkpák bafee esim diǐkpú ké borôn, ḿbú badakúng byicê ámbyi byifee ba-cibi kyikit kyibónge, kyi-firi kyídí kyibónge ńkyí badacít ké mpyep.

¹⁹ Ba-chîchi byídí byikíri byifee ḿbyí badacít esim-mpyep nyí kyíjí kyibónge ba/chi ké ekwop-otyítǎm nyí ba/fé bukye ḿbú shíshét, ńkyí kyibónge ba-chi ké ekwop-enyam nyí enong enong.

²⁰ Ba-cibi byichí-mpyep ḿbyí badabi cip ké byichí-akákya.

²¹ Dyifîp nang dyirá dyi/mû bamyíta banyii ké butang ne bajam-basentyímyíta bachât esim nyâchât ké baryên.

²² Ba/cibi kámbyí ne ashí-byichí afee nyí a/bwa kyíjí, nyí badakúng kányí ba-cibi ne ashí-byichí akíri. Kángkáng byichí ámbyi byi/mû ne ashí anyii, nyí badakám ba-cibi ne byichí byikíri.

²³ Ba/cibi afîp-byichí bujam ké kyicê ńkyí busyísen,

²⁴ ne bajam-byikim-syílyíba bafee ḿbyí badafé ké byikû ebe, byikim byifee ké kyikû-kyichí kyibónge, byi-níbî ashí emen afee nyí a/cibi byichí ne barî.

²⁵ Ba-cibi afîp-byichí bujam ké kyicê-mpyep ńkyí bushûyû

²⁶ ne bajam-byikim-syílyíba bafee, byikim byifee ké kyikû-kyichí kyibónge.

²⁷ Ké esim-mpyep, ké kyicê ńkyí esû edaríbî e-jâ, ba/cibi byichí nyâchât

²⁸ ne byichí byifee ké bukô nang burá.

²⁹ Ba/cibi byichí-bakô ḿbyí ké kyikim ńkyí kyísí, byi-cibi ne barî tete byi-ribi kyíbóng. Ba/kúng bukwóp ámbu ne ba-cibi byichí byifee ḿbyí byi/chi bakô ámbe bafee.

³⁰ Kángkáng afîp-byichí a/mû nyíryinyi ne byikim-syílyíba onyiryiká ne din, byikim byifee ké kyikû-kyichí nang kyirá.

³¹ Ba-cibi efang nyí cángecangecánge onyiryiká ké byichí-akákya, byichí byitánge ké kyicê-mpyep kyibónge,

³² ne byitánge to ké kyicê-mpyep ńkyí áku, ne byitánge ké kyicê ńkyí esû edaríbî e-jâ, ké esim-mpyep.

³³ Ngô o/fím ké dyishí-mpyep dyibónge o-ribi ké ḿbyí áku.

³⁴ Ba/cít byichí ámbyi kángkáng ne gûl, ba-cibi kámbyí ne barî ké ékpâl-gûl, e-níbî byichí ḿbyí cángecangecánge, ḿbyí ba/cít kámbyí to ne gûl.

³⁵ Ba-chi ékpígí ké okpówo mú onong onong, mú ba/chi ké bacat ḿbé bulûbulu ne ḿbé kpúúl ne ḿbé shíshét, ḿbé ba/chi ké eríp-etám-ebû, mú ba/tím biǐnyám ḿbyí mbyi ne abyibabang ké mǔ.

³⁶ Ba-chi byikwap byinyii ké byichí-akákya, ḿbyí byidaníbî ékpígí, ba-cít kámbyí gûl, ba-cibi kámbyí ké boǒré-gûl. Ne ba-chi byikim-syílyíba byinyii ḿbyí byidaníbî byikû-byikwap ámbyi.

³⁷ Ké ocím-dyifyi-mpyep ámu, ba/chi ékpígí nyí okpówo mú onong onong, nyí ba/chi ké bacat ḿbé bulûbulu ne ḿbé kpúúl ne ḿbé shíshét, ḿbé ba/chi ké eríp-etám-ebû mú ba/zim basáng ḿbé banong banong ké mǔ.

³⁸ Ké ékpígí ńnyín, ba/chi byikwap byitánge ḿbyí ba/fé boǒmkpák ké mbyí, ba-cít ashí ebe ne biǐré ámbyi ké gûl, ba-chi byikim-borôn byitánge ba-fé ké byikû-byikwap ámbyi.