Ézódos 35 - Bokyi Bible

Byije byi-kim ne Dyicí-Ékwâbashi

¹ Músis o/kó kángkáng banet ḿbé Ézerel o-raa ne mbé o/fu, něen nké Óburúkpâbí oo/sét o/fu, ben bakûchi.

² Ben bamu ne ací nyâchât nyí badakûchi bǎmkpóngé enen, nké ké ací káchâtkányi, dyicí ándyi dyicí-ociring, dyicí-dyijâng ńdyí n/jware kándyí dyi-já mě me Óburúkpâbí. Nang yeě nké o/chi bǎmkpóngé ké dyicí ándyi, baju ǎ.

³ *Da n̂g echi ba-wóngê nang okwâ ké byise enen ké dyicí-ékwâbashi*.

Eyáré nyí Mpyep mú Óburúkpâbí odakyú

⁴ Músis o-sét kángkáng banet-Ézerel o/fu, něen nké Óburúkpâbí oo/fé kyije o/fu,

⁵ kye n̂g Óburúkpâbí eyáré. Nang yeě mú mu o-ryuu ng o/fu, nyǐ o-kyâ, obâ ne eyáré nyí gûl ne syílyíba ne borôn

⁶ ne okpówo mú onong onong ne kyídí ńkyí bulûbulu ne ńkyí kpúúl ne ńkyí shíshét ne ńkyí ba/chi ké eríp-ebúbǔu

⁷ ne ńkyí ba/chi ké ekwop-otyítǎm nyí ba/fé bukye ḿbú shíshét ne ekwop-enyam nyí enong enong ne byichí-akákya

⁸ ne bakút ḿbé badafé ké otyuryíkáng ne byěm ḿbyí byidanyîn kyinung, ḿbyí badafé ké bakút ḿbé badajware byěm ne ḿbyí badafé ké burwan

⁹ ne aká nyí anong anong wǎ kanyílyan, nyí badalák ké kyídí-kakim ne kiimbam-kakim ḿbyí otu-nchi kyifen-Osówo.

Byěm ḿbyí badatî ké Mpyep mú Óburúkpâbí odakyú

¹⁰ Kángkáng banchi bampwô ké burwám enen babâ ba-ba-chi kángkáng byěm ḿbyí Óburúkpâbí oo/sét o/fu,

¹¹ bachi ké mpyep mú Óburúkpâbí odakyú ne byídí ḿbyí badacít kámú ké kafâ ne kyíjí ne byikit-mpyep ḿbyí badakpong byěm ne byichí emen kángkáng ne byikû-byichí emen.

¹² Ba-chi to mkpukpu-byěm-Osówo ne echí emen ne kiinkíbí emen ne ékpígí nyí edaku kámú.

¹³ Ba-chi ókpákpúrúk-kyifen echi ne echí emen ne kángkáng byipang emen ne berêt mú badachi kyifen ba-kye Osówo.

¹⁴ Ba-chi kyikwap-etyuryíkáng ne byipang emen ne etyuryíkáng ne bakút ḿbé badafé ké nyǐ.

¹⁵ Ba-chi kyikit-kyifen echi ńkyí badashí burwan ne echí emen ne bakút ḿbé badajware byěm-ociring ne burwan ḿbú budanyîn kyinung ne ékpígí nyí badacít ké ocím-mpyep.

¹⁶ Ba-chi kyikit-kyifen echi ńkyí badashí byifen ne kiǐchwóm ńkyí badakwa byěm ḿbyí ba/chi ké borôn ne echí emen ne kángkáng byipang emen. Ba-chi dyicáng-abwô esoo ne kyikû emen

¹⁷ ne ékpígí nyí oro-kyibám mú mpyep ne byikwap emen ne byikû-byikwap emen ne ékpígí nyí badacít ké ocím-dyifyi-oro emen.

¹⁸ Ba-chi boǒkím-byichí ne erí nyí badachi mpyep ne ékpígí nyí e/ro kámú

¹⁹ ne biǐnyínǒng-byídí ḿbyí banchi kyifen-Osówo badafé ké nkéré ba-kú ba-chi i bǎmkpóngé ké nfût-ociring ne byídí-ociring ḿbyí Éron mú nchi kyifen-Osówo ne bwǎn emen.

Banet-Ézerel ba/bê ne Eyáré Ebe

²⁰ Kángkáng banet ḿbé Ézerel ba-dim,

²¹ ne nang yeě nang yeě mú o/mû o-ryuu ng o/fu, nyǐ o-kyâ chwǒm, o/bê ne eyáré o-ba-kye Óburúkpâbí eringe nyí badachi mpyep mú odakyú. Ba/bê ne kángkáng byěm ḿbyí badakúng ne ba-chi bǎmkpóngé ḿbé Osówo ofê ekye.

²² Nang yeě mú o/mû o-ryuu ng, banyinchéng ne banyinyi, ba/bê ne boǒmkpák ḿbú bunong bunong ne boǒré-atông ne ékpâl ne byibwáng-kyitông ne kángkáng azong-byibwáng ḿbyí ba/chi ké gûl ba-ba-kye Óburúkpâbí wǎ eyáré-dyityém.

²³ Nang yeě mú o/mû ne okpówo mú onong onong nang byídí ḿbyí bulúbulu nang ḿbyí kpúúl nang ḿbyí shíshét nang ḿbyí ba/chi ké eríp-ebúbǔu nang ekwop-otyítǎm nyí ba/fé bukye ḿbú shíshét nang ekwop-enyam nyí enong enong, o/bê ne nkyí.

²⁴ Kángkáng banet ḿbé ba/man ekye syílyíba nang borôn ba/bê ne eyáré ebe ba-ba-kye Óburúkpâbí, ne nang yeě to mú o/mû ne kyichí-akákya, ńkyí badakúng ba-chi bǎmkpóngé ké nkyí, o/bê ne nkyí.

²⁵ Kángkáng banyinyi ḿbé badaman etím byěm, ba/bê ne okpówo mú onong onong ne bacat ḿbé bulûbulu ne ḿbé kpúúl ne ḿbé shíshét, ne eríp-etám-ebû.

²⁶ Mbé to ba/chi bacat ké eríp-ebúbǔu.

²⁷ Banet-ashí ba/bê ne aká nyí anong anong wǎ kanyílyan, nyí badalák ké kyídí-kakim ne kiimbam-kakim,

²⁸ ne byěm ḿbyí byidanyîn kyinung ne bakút ḿbé badafé ké etyuryíkáng ne ḿbé badajware byěm-ociring ne ḿbé badachi burwan ḿbú budanyîn kyinung.

²⁹ Kángkáng banet ḿbé Ézerel, ḿbé kyi/mû kyi/nyîn kámbé, ba/bê ne eyáré ebe ba-ba-kye Óburúkpâbí ké bǎmkpóngé ḿbé o/sét Músis o/fu, ochi.

Banchi Bampwô ḿbé badachi Mpyep mú Óburúkpâbí odakyú

³⁰ Músis o/sét banet-Ézerel o/fu, Óburúkpâbí oo/cá Bézalel mú wǎn-Orí, mú bonchí emen mú kánkán odabángê Hôo, ké kyikû ńkyí Júda.

³¹ Osówo oo/fé ǎ [busa] emen ké byiko, o-kye ǎ mpwô ne byinyídíng ḿbyí odachi nang ebóng dyizong-ḿkpóngé,

³² ḿbú odakabe eringe nyí chwǒm kyidakyú ne ba-chi kánkyí, ne ḿbú odachi byěm ké gûl ne syílyíba ne borôn,

³³ ne ḿbú odakét aká nyí anong anong, nyí badalák ké byěm, ne ḿbú odasím byěm ké byichí, ne ḿbú nang ebóng dyizong-bǎmkpóngé-mpwô echi.

³⁴ Óburúkpâbí oo/kye ǎ nyǐ ne Ohólyap mú wǎn-Ahísámak, mú o/fím ké kyikû-banet ńkyí Dǎn, byinyídíng ḿbyí badatángê banet bakíri bǎmkpóngé ebe.

³⁵ Oo/kye kámbé busa ḿbú badachi kángkáng azong-bǎmkpóngé-mpwô mú aká esím ne okabe kyi-kim ne byěm ḿbyí badachi, ne banchi okpówo mú onong onong, ne bacat ḿbé bulûbulu ne ḿbé kpúúl ne ḿbé shíshét, ḿbé badachi ké eríp-etám-ebû, ne byídí byikíri. Mbé ba-man n echi kángkáng azong-bǎmkpóngé-mpwô echi.