Ézódos 34 - Bokyi Bible

Bannyinyěng-Biǐbáá-Aká

¹ Óburúkpâbí o/sét Músis o/fu, két biǐbáá-aká byifee wǎ ḿbyí kashú, ne n/chi n-sáng byiraa ḿbyí byi/mû ké biǐbáá-aká ḿbyí kashú, ḿbyí a/sé.

² Kpá byiko nencí ké dyicófóróng, a-yú kaku ńké Sána, a-kâm mě áku ké dyishí-kaku.

³ Onet o*dachi o-bâ ne wo ké kyikû* ne n*fí n-ryuu ng n/fu, onet nang obónge obâ ké kyikit-kaku ánkyi nang obónge*. Nang mpong nang ebû e*dachi e-ryí nang baryî ké kyikû-kaku*.

⁴ Ne Músis o-két kâng biǐbáá-aká byikíri byifee, ne ké dyicófóróng pirípirí o-yip kámbyí o-yú kaku ńké Sána, wǎ eringe nyí Óburúkpâbí o/mû o/sét ǎ.

⁵ Óburúkpâbí o/shû kyísí ké ófíbí o-ba-bwom ányi ne Músis, o-kó byiko emen ké dyizîn-ociring emen ńdyí Óburúkpâbí.

⁶ Ne Óburúkpâbí o-shwôm kâng Músis ké bushú ne o-raa o/fu, me Óburúkpâbí n-chi i Osówo mú bafip bada mě echi chwóó ne banet, mú kafâ kaa*sa ǎ ochéé óchee* ne o-tông ng kiǐtí-kyijé, ne o-tî ng ocím emen mú odaryí.

⁷ Me n-tî ng ocím ejí mú ndaryí ké [égot-aje nyí ee*nwa epan*] ne m-pwoo ng banet byibî. Nké mm*mîng etáng-bwǎn nang echât nang enyii busông ekye* ké dyishí-byibî ḿbyí banchí ebe ba/chi*.

⁸ Músis o-tíngê kyísí ochéé óchee o-kye ǎ ofê.

⁹ O-raa o/fu, Óburúkpâbí, â wo ké ntûntû nkyi kyi-nyîn n ǒ ne me, me mu m-bí ng ǒ n/fu, ca ne be ké kyikû. Banet ḿbén ba-shwane e ashí, nké pwoo bě ké byibî eten, a-koo bě wǎ banet eyên.

Óburúkpâbí o/bwât Ocím mú o/ryí ne Banet-Ézerel

¹⁰ Óburúkpâbí o/sét Músis o/fu, n-kú m-bâ eryí ocím kántîk ne banet ḿbé Ézerel. Ké bushú ebe, me n/chi n-chi biǐtí-byěm ḿbyí ba*da/chi ne ké kyikit nang kyibónge ké ejíí* ké oshê nang obónge*. Kángkáng banet ba/chi ba-ri azong-biǐtí-byěm ḿbyí me Óburúkpâbí ndaman echi, ké nǎ, me mu m-bâ ebachi kiinkaa byiko-chwǒm n-kye běn.

¹¹ Tî n̂g byije ḿbyí me n/chi n-kye běn kurún. Me n/chi n-ró banet ḿbé Ámórit ne ḿbé Kínan ne ḿbé Hyítat ne ḿbé Périzit ne ḿbé Hyíbit ne ḿbé Jébus ba-dim, â ba-kú ba-fárâng ng kámbé ba-câ.

¹² *Da n̂g echi ba-chi kyikwáré ne banet ḿbé eshê nyí bamu ba-wâa ng* ké nǎ, kyikwáré ánkyi kyi-kyú u běn wǎ kyibî-kaǎtám.

¹³ Nké bên n̂ byikit-byifen ebe echi ne aká-ociring ebe ne nyí osówo-onyinyi ebe mú badakó Ashéra.

¹⁴ *Da n̂g echi ba-fé Osówo okíri* ké nǎ, me Óburúkpâbí n*fí m-bángê e n/fu, byěm byikíri byikan bujinjang ne me*.

¹⁵ *Da n̂g echi kyikwáré ne banet-oshê mú bamu ba-wâa ng ké mǔ* ké nǎ, ké nkéré ba-kú ba-kyâ erím-bakye ebe ofê, ba-chi i byifen ba-kyâ kányí, ba/chi ba-kó běn ba/fu, bada-kyú ne mbé, ne kyi/chi kyi-chi běn ba-ryí byiryíng ḿbyí ba/sháng bakye ebe.

¹⁶ Bwǎn enen ḿbé banyinchéng ba-man n ebé bacinbánet-banyinyi ḿbé badaman echi kámbé baa*fé to dyityém ne me* ba-kpet esháng erím-bakye ebe.

¹⁷ *Da n̂g echi erím-bakye ké biǐré ba-kûkye kányí ofê*.

¹⁸ Kû n̂g etî dyijî-kyifen ńkyí berêt mú ba*da/chi o-mut*. Wǎ eringe nyí me nn/sét běn, ryí n̂g berêt mú baa*fé bukye ḿbú odamut* ké ací káchâtkányi, ké otukáku mú Ábip, ké nǎ, ké otukáku ámu nké ben ba/dim ba-mîng Éjip.

¹⁹ Ókpá-wǎn-onyinchéng nang orá ne mbwôp kashú-otyép-kyitú nang orá mú ba/fwon byi/já mě.

²⁰ Nké ben ba-man n eré ba-koo mbwôp kashú-wǎn-kaanyam-atû nang orá o-firi mú enen â ba/kúng wǎn-etám-ebû ba-chi kyifen ké dyishí emen. Â ba*da/ré wǎn-kaanyam-atû ámu* bún n̂ kámú kyitông. Ré n̂g ba-koo to ókpá-wǎn-onyinchéng nang orá. Onet nang obónge o*dachi o-bâ ké bushú ejí* â o*fí ne eyáré nyí oda mě ekye*.

²¹ Ben bamu ne ací nyâchât nyí badachi bǎmkpóngé enen, nké ké ací káchâtkányi, *da n̂g echi bǎmkpóngé* nang ké nkéré mú kyifát ekpang* nang byiryíng efuu*.

²² Tî n̂g dyijî-kyifen ńkyí byiryíng efuu ké nkéré mú badakpet ebóng bambwôp kashú-esang-byichí nyí badakó wît, ba-tî to dyijî-kyifen ńkyí boompyep ebi ké ashí-burwom, ké nkéré ba-kú ba-bóng ng byirim-byichí enen.

²³ Kángkáng banyinchéng ba-man ba-ba-kye mě me Óburúkpâbí mú Osówo mú Ézerel ofê kampén kachât ké kángkáng dyije.

²⁴ Ké nkéré mú nn/ró banet-bushwôn enen ké bushú enen, n-nere esí enen, onet o*fí mú o/chi o-kan o/fu, nyǐ o-kpógê ng oshê enen* ké nkéré mú ajî-byifen ḿbyín byichât*.

²⁵ Â ba-kú ba-chi i kyifen ké enyam ba-kye mě, *da n̂g ekúng berêt mú ba/fé bukye ḿbú budachi kámú o-mut* ba-cibi ne kyifen ánkyi*. *Da n̂g echi ba-mîng kyipang-enyam nang kyibónge nyí badaju ké dyijî-kyifen ńkyí Shwôm* e-rí dyicí*.

²⁶ Kángkáng dyije, kúng n̂g mbwôp kashú-esang-byichí nyí badabóng ba-bâ ne nyǐ ké kyise ńkyí ejí. *Da n̂g erám wǎn-ebû ké abî nyí ba/nwárê boné emen*.

²⁷ Óburúkpâbí o-sét Músis o/fu, sáng byije ḿbyín kyísí, ké nǎ, ké bubwô ḿbú byije ḿbyín nké mu n-ryí i ocím mún ne wo ne Ézerel.

²⁸ Músis o/rí áku ne Óburúkpâbí bajam-ací bafee, nang byiryíng o*da/ryí* nang omu o*da/jwáp*. Músis o/sáng byije-ocím eryí ḿbyí Byije-Osówo diǐkpú ké biǐbáá-aká ámbyi.

Músis o/shû Kaku ńké Sána

²⁹ Ké nkéré mú Músis o/shû kaku ńké Sána ne byije ámbyi diǐkpú, bushú emen bu/mû bu-kú bu-san n, ké nǎ, o/mû o-pem m ne Óburúkpâbí, nké Músis oyén o*da/nyît o/fu, bushú emen mbu bu-san n*.

³⁰ Éron ne kángkáng banet ba/ri Músis ké bushú emen bu-kú bu-san n, ba-kpet ǎ eshî ece ké byiko.

³¹ Nké Músis o/kó kámbé, ne Éron ne kángkáng banet-ashí-Ézerel ba-dim ba-kâm ǎ, ne Músis o-pem ne mbé.

³² Ké nkéré mú oo/pem ne mbé, kángkáng banet ḿbé Ézerel ba-da-bwom ba-wâng ǎ ba-fé ké kafâ, ne Músis o-sét kámbé kángkáng byije ḿbyí Óburúkpâbí o/kye ǎ ké kaku ńké Sána.

³³ Ké nkéré mú Músis o/man bǎmpém epem ne mbé, o/yip kaǎsém o-cít bushú emen.

³⁴ Nang nkéré orá nké Músis o-kú o-da ng epem ne Óburúkpâbí ké kafâ-mpyep mú Óburúkpâbí odakyú, Músis o-pii ng kaǎsém ánke. Ké nkéré oo/byí ké kafâ-mpyep ámu, o-sét ng banet ḿbé Ézerel kángkáng byěm ḿbyí Óburúkpâbí oda ǎ esét o/fu, osét,

³⁵ ne ba-ri ng ba/fu, bushú emen mbu bu-san n. Ne o-kúng kâng kaǎsém ánke o-cít ké bushú tete nkéré okíri mú o/chi o-chîdapem ne Óburúkpâbí.