Ézódos 33 - Bokyi Bible

Óburúkpâbí o/sét Banet ḿbé Ézerel o/fu, badim ké Kaku ńké Sána

¹ Óburúkpâbí o/sét Músis o/fu, dim ké kyikit ńkyín, wo ne banet ḿbé a/kpî kámbé ba-byí ké Éjip, ba-wâa ké esí nyí n/ryí ocím n/fu, n-kyâ Ébarahâm ne Ázik ne Jekôp ne bwǎn ebe.

² Me n/chi n-twóm orím mú onong, mú oda běn etông kiǐfáng, ne n/chi n-ró banet ḿbé Kínan ne ḿbé Ámórit ne ḿbé Hyítat ne ḿbé Périzit ne ḿbé Hyíbit ne ḿbé Jébus ba-dim.

³ Ben bamu ba-wâa ng ké esí nyí enong enong, nyí edabát byiryíng. Nké me oyén mm*ba/chi n-ca ne ben ké kyikû* ké nǎ, ba-chi i banshwane ashí-banet ne m-man n běn eju ké bukwóp.

⁴ Ké nkéré mú banet ḿbé Ézerel ba/jwo ńkyín, ba-kpet dyikán eta, ne ba*da/chîfé byibwáng ebe*.

⁵ Óburúkpâbí o/mû oo/sét Músis o/fu, osét kámbé o/fu, ben ba-chi i banet ḿbé badashwane ké dyishí. Â n/ce ne ben ké kyikû nang ké kaǎnyín-nkéré, n-ju ng běn kángkáng. Kántîk, pii n̂g byibwáng enen. Me n/chi n-kabe ńkyí ndachi ne ben.

⁶ Ké bubwô ámbu, ké nkéré mú ba/dim ké kaku-Sána, banet ḿbé Ézerel ba*da/chîfé byibwáng*.

Mpyep mú Óburúkpâbí odakyú

⁷ Nang ké kyikit kyirá nké banet ḿbé Ézerel ba/bi bampyep ebe, Músis o-kúng ng mpyep-ociring o-tî kámú cáát ne kyikit ńkyí banet badakyú. Ba/mû ba-kó ng kámú mpyep mú Óburúkpâbí odakyú, ne nang yeě mú o/mû o-ryuu ng o/fu, nyǐ o-bí ng Óburúkpâbí chwǒm, o-câ ké mǔ.

⁸ Nang nkéré orá nké Músis o-kú o-wâa ng ké mǔ, banet ba-bwom m ké ecím-afyi-boompyep ebe tete Músis o-nung ké kafâ.

⁹ Ké nkéré mú Músis oo/nung, ófíbí o-fwam m efím kyíbóng o-shû kyísí o-ba-bwom ké ocím-dyifyi-mpyep ámu, ne Óburúkpâbí o-bwom m ké kafâ-ófíbí ámu o-pem ne Músis.

¹⁰ Banet ba-ri ng ófíbí ámu ba-bâ ké ocím-dyifyi-mpyep, ba-tíngê kyísí.

¹¹ Óburúkpâbí o-pem m ne Músis ba-ri ng barî, wǎ eringe onet odapem ne ocín emen. Ńdyí ba/man kâng, Músis o-bwa esim ké oshê. Nké mú wǎn-kyisat mú o/mû o-bángê e Jóshwa, mú wǎn-Nûn, mú o/mû o-chwáp ng Músis, o/mû o-kyú u ké kafâ-mpyep ámu.

Óburúkpâbí o/ryí Ocím o/fu, Nyǐ o-kyú u ne Banet Emen

¹² Músis o/sét Óburúkpâbí o/fu, nkyi ntûntû wo aa/sét mě a/fu, me ntông banet ḿbén kiǐfáng ba-ribi ké esí ányi, nké wo a*da mě esét onet mú o/chi o-cen ne me*. Wo aa/sét mě a/fu, wo amu a-nyît ng mě kanong kanong, ne wo nkyi kyi-nyîn n ǒ ne me.

¹³ Kántîk, â nkyi kyi-nyîn n ǒ ne me, sét mě byěm ḿbyí a/fu, a-chi i, eringe nyí me n/chi n-chi bǎmkpóngé n-kye ǒ, n-nyîn n ǒ n-câ kashú. Zîim to a/fu, wo aa/cá oshê mún a/fu, okyú mú eyên.

¹⁴ Óburúkpâbí o-sét ǎ o/fu, me n/chi n-ca ne ben ké kyikû, ne n/chi n-chi běn ba-kpógê.

¹⁵ Músis o-faa o/fu, â aa*ba/chi a-ca ne be ké kyikû* *dachi a-chi bě byi-mîng kyikit ńkyín*.

¹⁶ Onet o-cen n nǎ ne o-nyît o/fu, wo nkyi kyi-nyîn n ǒ ne banet eyên ne ne me, â wo a*da/ce ne be ké kyikû*. Â amu ne be, kyi/chi kyi-chi bě byi-yángê ne banet bakíri ḿbé mbe ké ejíí.

¹⁷ Óburúkpâbí o-sét Músis o/fu, me n/chi n-chi eringe nyí wo aa/bí mě a/fu, me nchi, ké nǎ, me mu n-nyît ng ǒ kanong kanong, ne amu a-nyîn n mě.

¹⁸ Né Músis o-bí ǎ kâng o/fu, kamgbe, mîng mě n-ri busan ḿbú ragerage ḿbú mbu bu-fím m ké bushú eyên.

¹⁹ Óburúkpâbí o-faa o/fu, me n/chi n-tông ǒ kángkáng busan ejí ḿbú ragerage, ne ké bushú eyên nké n/chi n-kó dyizîn-ociring ejí. Me n-chi i Óburúkpâbí, ne n-ri ng banet ḿbé ndacá kámbé bafip kanong kanong.

²⁰ Me mm*ba/chi m-bángê ǒ a-ri bushú ejí* ké nǎ, onet o*fí mú oda mě eri o-waa okpó*.

²¹ Nké nyín kyikit ńkyí nkyi ké bukô ejí, ńkyí adaman ebwom ké buká ḿbú buryên.

²² Â busan ḿbú ragerage ḿbú mbu bu-fím m ké bushú ejí bu/shwôm, me n/chi n-fé ǒ ké mbwo-buká ámbu, n-cít ǒ ké bubwô ejí tete n-shwôm.

²³ Â n/shwôm kâng, n/chi n-yip bubwô ejí, ne wo a/chi a-ri esim ejí, aa*ri bushú ejí*.