Ézódos 32 - Bokyi Bible

Kyisu-Otyép-Mpong ńkyí ba/chi ké Gûl

¹ Ńdyí banet-Ézerel ba/ri ba/fu, Músis o/tôong kyíbóng-kaku, ne oo/rí ací áku chwóó, mbé ba/dim ba-da-bwom ba-fé Éron ké otyém, ba-sét ǎ ba/fu, be byi*fí byi-nyît ng ńkyí kii/chi onyinchéng mún mú odabángê Músis* mú o/tông bě kiǐfáng byi-byí byi-mîng Éjip*. Ké bubwô ámbu, chi bě [osówo] mú oda bě etông kiǐfáng.

² Éron o-sét kámbé o/fu, pii n̂g byibwáng-gûl ḿbyí banyi enen ne bwǎn enen mbe ba-fâ, ba-bâ ne mbyí ba-ba-kye mě.

³ Ne kángkáng banet kâng ba-pii byibwáng-gûl ḿbyí ba/mû ba-fâ, ba-bâ ne mbyí ba-ba-kye Éron.

⁴ Éron o-kúng byibwáng ámbyi, o-nyange kámbyí, o-yip gûl ámu o-ján ké kiǐchwóm ńkyí o/mán o-tî, o-chi kyisu-otyép-mpong-gûl. Banet ḿbé Ézerel ba-raa ba/fu, Ézerel, ńkyín osówo eten mú o/tông bě kiǐfáng byi-byí byi-mîng Éjip.

⁵ Ne Éron kâng o-bi kyikit-kyifen echi ké bushú-orím-bukye-gûl ámu, o-sét banet o/fu, dyijî dyi/chi dyi-chi nencí ńdyí byidakye Óburúkpâbí ofê.

⁶ Pirípirí ké orî-dyicófóróng, banet ba-bâ ne enyam, kyicê ńkyí badashí ba-chi kyifen ne kyicê ńkyí badaryí wǎ kyifen ńkyí okwáre ne Osówo. Banet-Ézerel ba-kyú kâng me ké dyijî eryí ńdyí dyi/bírî dyi-firi dyijî ńdyí badajwáp bato ba-nwam banwam.

⁷ Óburúkpâbí o-sét Músis o/fu, bwa esim kyísí ochéé ochee, ké nǎ, banet eyên ḿbé a/tông kámbé bukwóp ba-byí ba-mîng Éjip baa/chi kyibî ba-né mě.

⁸ Baa/mîng omíng kiǐfáng ńkyí n/sét kámbé n/fu, bacen. Baa/yip gûl ba-nyange ba-chi kyisu-otyép-mpong ne baa/kye kánkyí ofê, ba-chi byifen ba-kye kánkyí. Mbe ba-raa ng ba/fu, nkyí nké nkyi osówo ebe mú o-tông kámbé kiǐfáng ba-byí ké Éjip.

⁹ Me mu n-nyît ng eringe nyí banet ḿbén mbe ba-shwane e ké dyishí.

¹⁰ Nké *dachi a-kan a/fu, wo atîm mě arông*. Kafâ nke ka-sa ng mě ne mbé, ne n/chi n-ju kámbé. Â n/ju kámbé kâng, n/chi n-chi ǒ ne bwǎn eyên ba-firi kiǐtí-oshê.

¹¹ Nké Músis o/tîm Osówo Óburúkpâbí emen arông o/fu, Óburúkpâbí, ebóng amu a-jang ng esa kafâ éné ne banet eyên ḿbé wo a/kúng busa chwóó a-nyii kámbé ké abwô nyí Éjip.

¹² Ebóng wo a/chi a-chi banet ḿbé Éjip ba-kûraa ba/fu, wo a/fîm banet eyên ké Éjip a/fu, wo a-ju ng kámbé kángkáng ké eku. *Dachîsa kafâ*. Yángê dyityém, *dachi a-bâ banet eyên ne kyibî ńkyín*.

¹³ Zîim Ébarahâm ne Ázik ne Jekôp ḿbé bǎmgbán eyên. Zîim ocím mú shwaneshwane mú a/ryí kámbé a-sem dyizîn eyên a/fu, wo a-kyâ kámbé bwǎn ḿbé badajê wǎ ékpére nyí nyi kyíbóng, a-kye to kámbé esí ányi nyí a/ryí ocím a/fu, e-kyú u nyí ebe ne banyá ne banyá.

¹⁴ Ne Óburúkpâbí kâng o-yángê dyityém emen o-mîng bukyû ḿbú o/mû o/fu, nyǐ o-ju ng kámbé.

¹⁵ Músis o-shû kyíbóng-kaku o-yip biǐbáá-aká ámbyi byifee ḿbyí Óburúkpâbí o/sáng byije emen byicê byimúmú.

¹⁶ Osówo oyén nké o/chi aká ányi ne o-sáng byije emen ké nyǐ.

¹⁷ Jóshwa o/jwo ké banet-Ézerel mbe ba-wonge e, ne o-sét Músis o/fu, me n/jwo kyicoge-byití ké kyikit ńkyí banet-Ézerel mbe ba-kyú u.

¹⁸ Músis o-faa ǎ o/fu, kyicoge ánkyi kyi*fí wǎ dyiwonge ńdyí banet ḿbé baa/kpógê* ne kyi*fí to wǎ bukyû ḿbú banet ḿbé baa/kpógê kámbé* nkyi wǎ mbe ba-kwán n ekwan.

¹⁹ Ké nkéré mú Músis o/fárâng ké kyikit ńkyí banet-Ézerel mbe ba-kyú u, o/ri orím-bukye ámu ne banet ké mbe ba-ne ng ane, kafâ ka-bírî ǎ. O-bwa ne biǐbáá-aká ḿbyí o/mû o/níbî o-pwó ké kyikû-kaku byi-sêe.

²⁰ O-kúng orím-bukye ámu mú ba/chi, o-nyange kámú, o-kwa kámú legelege, o-fé ké omu. O-kúng kâng kámú o-kye banet-Ézerel ba-jwáp.

²¹ O-bí Éron o/fu, banet ḿbén ba/chi ǒ ebóng ńkyí aa/chi kámbé ba-chi kiimbâng-kyibî ńkyín.

²² Éron o-faa ǎ o/fu, *dasa kafâ ne me*. Wo amu a-nyît ng eringe nyí byibî mbyi byi-nyîn n banet ḿbén echi.

²³ Mbé ba/sét mě ba/fu, be byi*fí byi-nyît ng ńkyí kii/chi onyinchéng mún* mú odabángê Músis* mú o/fîm bě byi-byí ké Éjip*. Ké bubwô ámbu, chi bě osówo mú oda bě etông kiǐfáng.

²⁴ Me n/sét kámbé n/fu, babâ mě ne byibwáng-gûl ebe, ne banet ḿbé ba/mû ne mbyí ba-pii ba-kye mě. Me n/yip byibwáng-gûl ámbyi n-fé ké okwâ, ne orím-bukye-kyisu-otyép-mpong mún o-byí.

²⁵ Músis o/ri o/fu, Éron o*da/man eníbî banet-Ézerel* ne oo/chi kámbé ba-róng enyam ké bushú-banet-bushwôn ebe.

²⁶ Ne o-bwom ké ocím-dyifyi-oshê, o-raa kakânkakân o/fu, nang yeě nké o/bángê ne Óburúkpâbí obâ nyín. Ne kángkáng banet ḿbé kyikû-banet ńkyí Lyíva ba-dim ba-da-bwom ba-fé Músis ké kafâ.

²⁷ Ne o-raa mbé o/fu, Osówo Óburúkpâbí mú Ézerel mu o-kyâ nang yeě mú mu ké burwám enen busa o/fu, ben babwá bushwám enen ba-nung ké ocím-dyifyi mún ba-ribi ké mú áku, ba-ju bwǎn-bané enen ne bacín enen ne banet ḿbé mbe běn fáráng.

²⁸ Kyikû-banet ńkyí Lyíva ba-bángê, ne ba-ju égot-banyinchéng nyí e/byí nang onyiryiká ké dyicí ándyi.

²⁹ Músis o-sét kámbé o/fu, [kurún, ben baa/jware byiko enen] wǎ banchi kyifen-Osówo ḿbé mbe ba-chi i bǎmkpóngé ba-kyâ Óburúkpâbí, ké oju mú ba/ju bwǎn enen ne bwǎn-bané enen. Ké bubwô ámbu, Óburúkpâbí oo/jware běn.

³⁰ Ké orî-dyicí, Músis o-sét banet ḿbé Ézerel o/fu, ben baa/chi kiǐtí-kyibî. Nké kántîk, me n/chi n-chîce kyíbóng-kaku n-kâm Óburúkpâbí, katô m-man n ǎ etîm arông o-pwoo běn ké kyibî enen.

³¹ Músis o-bwa esim kâng o-kâm Óburúkpâbí o-sét ǎ o/fu, banet ḿbén baa/chi kiǐtí-kyibî. Baa/chi orím-bukye ké gûl ba-kye kámú ofê.

³² Kamgbe, pwoo kámbé ké kyibî ebe. Nké â a/fu, wo aa*pwoo kámbé* fîm dyizîn ejí ké nwet mú aa/sáng azîn nyí banet eyên.

³³ Óburúkpâbí o-faa ǎ o/fu, banet ḿbé baa/chi kyibî ké bushú ejí nké n/chi n-fîm azîn ebe ké nwet ejí.

³⁴ Kántîk, bwa esim a-da-kpî banet-Ézerel a-dim ne mbé ké kyikit ńkyí n/sét ǒ. Zîim a/fu, orím ejí mú onong o/chi o-tông ǒ kiǐfáng, nké nkéré mu o-bâ mú n/chi n-kye banet ḿbén busông ké dyishí-kyibî ebe.

³⁵ Ne Óburúkpâbí kâng o-twóm kyirwóm kyi-kâm banet ḿbé Ézerel, ké nǎ, mbé ba/tírîng Éron o-chi orím-bukye-gûl.