Ézódos 31 - Bokyi Bible

Banchi Bampwô ḿbé badakûchi Bǎmkpóngé ké Mpyep mú Óburúkpâbí odakyú

¹ Óburúkpâbí o/sét Músis o/fu,

² me nn/cá Bézalel mú wǎn-Orí, mú bonchí emen mú kánkán o/mû o-bángê e Hôo, ké kyikû-banet ńkyí Júda,

³ ne nn/fé ǎ [busa] ejí ké byiko. Me nn/kye ǎ bubong ne mpwô ne byinyídíng ḿbyí odachi nang ebóng dyizong-bǎmkpóngé,

⁴ byinyídíng ḿbyí odakabe eringe nyí badachi nang ebóng chwǒm ne eringe nyí odachi bǎmkpóngé ámbe ké gûl ne syílyíba ne borôn,

⁵ byinyídíng ḿbyí odaman ekét aká nyí adashwane kasî ne ḿbyí odasím byichí ne ḿbyí dyizong-bǎmkpóngé-mpwô nang dyirá.

⁶ Me nn/cá to Ohólyap mú wǎn-Ahísámak ké kyikû-banet ńkyí Dǎn n/fu, ochi bǎmkpóngé ne nyǐ. Me nn/kye to banet-bǎmkpóngé ḿbé áku kiǐtí-byinyídíng eringe nyí badachi kángkáng byěm ḿbyí nn/kye busa n/fu, bachi

⁷ mpyep mú ndakyú, ne mkpukpu-byěm ejí ne kiinkíbí emen, ne kángkáng byěm ḿbyí badafé ké kafâ-mpyep,

⁸ ne ókpákpúrúk-kyifen echi ne byipang emen, ne kyikwap-etyuryíkáng ńkyí gûl mú onong onong ne kángkáng byipang emen, ne kyikit-kyifen echi ńkyí badashí burwan,

⁹ ne kyikit-kyifen echi ńkyí badashí byěm ne kángkáng byipang emen, ne dyicáng-abwô esoo ne kyikû emen,

¹⁰ ne byídí-banchi kyifen ejí ḿbyí bii*nwa eri* ḿbyí Éron ne bwǎn emen badafé ké nkéré ba-kú ba-chi i bǎmkpóngé wǎ banchi kyifen-Osówo,

¹¹ ne bakút ḿbé badasabe ké byěm ejí, ne burwan ḿbú budanyîn kyinung, ḿbú badashí ké nfût-ociring. Â ba-kú ba-chi i byěm ḿbyín, bachi kámbyí kerededet wǎ eringe nyí nn/sét ǒ.

Dyicí-Ékwâbashi ányi Dyicí-Dyijâng

¹² Óburúkpâbí o/sét Músis

¹³ o/fu, osét banet ḿbé Ézerel o/fu, tî n̂g dyicí-ékwâbashi enen wǎ dyicí-ociring ejí ńdyí badajáng, ké nǎ, dyi/bwom bě wǎ ekap ké kángkáng bankéré ḿbé mbe ba-bâ, eringe nyí dyi/chi dyi-tông bě dyi/fu, me Óburúkpâbí nn/chi běn ba-firi banet ejí.

¹⁴ Ben ba-man ba-tî dyicí-dyijâng enen, ké nǎ, dyi-chi i dyicí-ociring. Nang yeě nké o*da/tî dyicí ándyi* o-dim o-da-chi bǎmkpóngé ké ndyí, baju ǎ.

¹⁵ Ben bamu ne ací nyâchât nyí badachi bǎmkpóngé, nké dyicí ńdyí ké ací káchâtkányi dyi-chi i dyicí-dyijâng ńdyí n/jware kándyí, ńdyí dyi/já mě. Nang yeě nké o/chi bǎmkpóngé ké dyicí ándyi, baju ǎ.

¹⁶ Banet ḿbé Ézerel batî dyicí ńdyín wǎ ekap nyí ocím mú byi/ryí ne barî byi-sem dyizîn ejí.

¹⁷ Dyi-chi i ekap nyí edawaa ne banyá, nyí e/bwom ké dyishí ńdyí banet ḿbé Ézerel ne me, ké nǎ, me Óburúkpâbí n/chi bubóng ne esí ké ací nyâchât, ne ké ací káchâtkányi m/mîng bǎmkpóngé echi n-jáng.

¹⁸ Ké nkéré mú Osówo oo/sét Músis kángkáng byěm ké kaku ńké Sána, o/kye Músis biǐbáá-aká ámbyi byifee ḿbyí Osówo oyén o/sáng byije emen.