Ézódos 30 - Bokyi Bible

Kyikit-Kyifen echi ńkyí badashí Burwan

¹ Chi kyikit-kyifen echi ké byichí-akákya ńkyí badakûshí burwan.

² Baryên ne butang emen byikyú jangjang, basentyímyíta bajam bafee esim batánge ké butang ne baryên, ne bajam-basentyímyíta banyii esim diǐkpú ké bunyâam. Ashí emen nyí adabwom wǎ etwóm ké bakô emen banyii abwom cibicibi ne kyikit-kyifen echi ánkyi.

³ Cít bubóng emen ne kángkáng bakô emen banyii ne ashí emen ne gûl mú onong onong, a-chi ocím emen ké gûl.

⁴ Chi ékpâl efee ké gûl ḿbyí byi/chi byi-níbî echí nyí ba/chi ba-kûtû kánkyí, a-fé kámbyí ké kyikû-ocím emen, ké bakô emen bafee.

⁵ Chi echí ńnyín ké byichí-akákya, a-cít kámbyí ne gûl.

⁶ Tî kyikit-kyifen echi ńkyín ké esim-ékpígí nyí kyíjí, nyí nyi ké bushú-mkpukpu-byěm ejí, ké kyikit ánkyi nké n/chi n-kâm ǒ.

⁷ Kángkáng dyikurúku, â Éron o-kú o-bâ etyuryíkáng enap o-tî, oshí burwan ḿbú budanyîn kyinung ké kyikit ánkyi.

⁸ O-man o-chi eringe ányi ebónge â o/mee etyuryíkáng ké dyikurúku. Ba*dachi ba-mîng kyifen ńkyín ńkyí burwan eshí echi nang kabónge* ké kángkáng ací nyí nyi a-bâ*.

⁹ *Dachi a-shí burwan ḿbú badaciring ké kyikit-kyifen echi ńkyín*. *Dachi a-chi kyifen-enyam nang ńkyí esang-byichí ké nkyí* nang kyifen-bato *dachi a-chi ké nkyí*.

¹⁰ Kampén kabónge ké dyije, Éron ochi kyifen ńkyí badajware kyikit-kyifen echi ńkyín ké baróng ḿbé badachi kyifen-byibî epwoo, ḿbé odata ké ashí emen anyii nyí a/bwom wǎ etwóm. Bakûchi ńkyín kángkáng dyije ké kángkáng bankéré ḿbé mbe ba-bâ. Kyikit-kyifen echi ńkyín kyi-man kyi-kyú kiǐtí-kyikit-ociring, ne kyi-man kyi-já mě me Óburúkpâbí.

Akpuga-Dyishí nyí Mpyep mú Óburúkpâbí odakyú

¹¹ Óburúkpâbí o/sét Músis o/fu,

¹² â a/pan ocím-banet ḿbé mbe ké Ézerel, onyinchéng nang orá okye chwǒm ké bubwô-dyikpen emen eringe nyí oo*ba/chi o-kpú* ké kyikim-nkéré ńkyí badapan banet*.

¹³ Nang yeě nké ba/pan ǎ ba-fé ké banet ámbe epan, o-man o-kye ocím-akpuga mú badafé, mú o/tyeem ne akpuga nyí mpyep-ociring ejí. Nang yeě o-man o-kye kányí wǎ kyifen echi o-kye mě.

¹⁴ Nang yeě nké ba/pan ǎ, ányi kyi/byí, nang yeě nké oo/rí kyi-fím ké aje bujam kyi-ca kyíbóng, o-kyâ mě ocím-akpuga ámu.

¹⁵ Nfang-onet o*dachi o-kye a-jê a-shwôm* onet-kyikpu o-kye ocím kyísí* ké nkéré ba-kú ba-kyâ akpuga ńkyín ké bubwô-kyikpen ebe*.

¹⁶ Koo akpuga ńnyín ne banet ḿbé Ézerel a-tî kányí ké bǎmkpóngé ḿbé mpyep mú ndakyú echi. Akpuga-dyishí ńnyín a/chi a-bwom ké dyishí ńdyí akpen ebe, ne me n/chi n-zîim n-ku kámbé.

Dyicáng ńdyí badachi ké Borôn

¹⁷ Óburúkpâbí o/sét Músis o/fu,

¹⁸ chi dyicáng ńdyí dyiryên ké borôn a-chi kyikû emen to ké borôn. Tî kándyí ké otyém ne otyém mú mpyep mú ndakyú ne kyikit-kyifen echi, a-fé omu ké ndyí.

¹⁹ Éron ne bwǎn emen bakûkúng omu ámu ba-soo ng abwô ebe ne byiká,

²⁰ ne ba-kûnung ké mpyep mú ndakyú nang ne ba-kûce ké kyikit-kyifen echi ba/fu, mbé ba-da ng echi kyifen-byiryíng ba-kye mě. Â ba/chi éné, baa*ba/chi ba-ju kámbé*.

²¹ Mbé ba-man ba-soo abwô ne byiká ebe eringe nyí baa*ba/chi ba-kpú*. Nyín kyije ńkyí mbé ne bwǎn ebe ba/chi ba-tî ne banyá na banyá.

Bakút ḿbé badapwó Banet ké Dyishí ne ké Byěm-Osówo

²² Óburúkpâbí o/sét Músis o/fu,

²³ kúng byěm ḿbyí byidanyîn kyinung, ḿbyí byinong byinong. Kúng bakyílogaram-mîi nyâchât ne bakyílogaram-sínamon bachât ne bakyílogaram-bakyinkong bachât

²⁴ ne bakyílogaram-kása nyâchât. Kan kámbyí byi-tyeem ne akpuga nyí mpyep-ociring ejí. Fé balyíta-bakút-ólif banyii ké mbyí

²⁵ a-chi bakút-ociring ḿbé badapwó onet ké dyishí, ḿbé ba/chi kámbé wǎ bakút-kyinung.

²⁶ Yip kámbé a-ta mpyep mú ndakyú ne mkpukpu-byěm ejí

²⁷ ne ókpákpúrúk-kyifen echi ne kángkáng byipang emen ne kyikwap-etyuryíkáng ne kángkáng byipang emen ne kyikit-kyifen echi ńkyí badashí burwan

²⁸ ne kyikit-kyifen echi ńkyí badashí enyam ne kángkáng byipang emen ne dyicáng-abwô esoo ne kyikû emen.

²⁹ Jware byěm ḿbyín ké bukwóp ámbu ne mbyí kángkáng byi/chi byi-firi biǐtí-byěm-ociring, ne nang ebóng onet nang ebóng chwǒm ńkyí kyi/ta kámbyí, busa-ociring ebe bu/chi bu-némê onet ámu nang chwǒm ánkyi.

³⁰ Yip bakút ámbe to a-pwó Éron ne bwǎn emen ké dyishí, a-jware kámbé ba-firi banchi kyifen ḿbé badakûchi bǎmkpóngé ba-kye mě.

³¹ Sét banet-Ézerel a/fu, bakûkúng bakút-ociring ḿbén, ḿbé badasabe ké byěm ba-kûchi bǎmkpóngé ba-kyâ mě ké kángkáng bankéré ḿbé mbe ba-bâ.

³² Ba*dachi ba-pwó onet mú kwán kámbé* ne *da n̂g echi ba-kúng bukwóp ḿbú ba/chi kámbé ba-chi chwǒm kyikíri wǎ mbé*. Mbé ba-chi i bakút-ociring ne ba-man ba-tî kámbé wǎ bakút-ociring.

³³ Nang yeě nké o/chi bakút bakíri wǎ mbé, nang o-kúng kámbé o-pwó onet mú o*fí nchi kyifen ejí* mm*ba/chi n-chîkúng onet ámu wǎ onet ejí*.

Burwan-Kyifen echi

³⁴ Óburúkpâbí o/sét Músis o/fu, kan azong-burwan ńnyín, nyí adanyîn kyinung jangjang, sákate ne ónyicha ne gábánum ne ochíchí-faránkínsen.

³⁵ Kúng kámbyí a-chi burwan a-cibi wǎ bakút-kyinung. Fé bano eringe nyí budakyú kanong bu-firi chwǒm-ociring.

³⁶ Kúng kyicê a-kíbî legelege, a-kúng kámbú a-ca ké kafâ-mpyep mú ndakyú a-da-pwó kámbú ké bushú-mkpukpu-byěm ejí. Tî burwan ḿbún wǎ kiǐtí-chwǒm-ociring.

³⁷ *Da n̂g ekúng bukwóp ḿbú ba/chi kámbú ba-chi burwan bukíri wǎ mbú* ba-tî byiko enen*. Tî n̂g kámbú wǎ chwǒm-ociring ńkyí kyi/já mě.

³⁸ Nang yeě nké o/chi chwǒm ńkyí nkyi wǎ mbú, ńkyí odasabe wǎ bakút-kyinung, mm*ba/chi n-chîkúng onet ámu wǎ onet ejí*.