Ézódos 3 - Bokyi Bible

Osówo o/kó Músis

¹ Dyicí dyibónge, ké nkéré mú Músis mu o-tún n ebû nyí Jétoro mú one emen, mú o/mû nchi kyifen mú Médyan, o/kúng ebû ányi o-nyáng kyikim-dyikán o-da-ribi ké kaku ńké ka/já Osówo, ńké badakó Sána.

² Ányi nké orím mú onong, mú Óburúkpâbí o/byí o-kâm ǎ wǎ okwâ nké mu o-mang ng ké kyichí. Músis o/ri ké okwâ mu o-mang ng, nké kyichí kyi*fí kyi-shí i*.

³ Músis o-raa o/fu, nyín chwǒm-akat. Ebóng kyichí kyi*fí kyi-shí i*. N-king ng n-fárâng n-ri kpá.

⁴ Ńdyí Óburúkpâbí o/ri o/fu, Músis mu o-fárâng ng kyikit ánkyi o-câ, o/kó ǎ ké kafâ-kyichí ánkyi ké dyizîn o/fu, Músis. Músis o-bángê.

⁵ Osówo o-sét ǎ o/fu, *dachîking a-bâ kashú*. Pii abe eyên ké byiká, ké nǎ, wo a/cím byiká ké esí nyí e/já mě.

⁶ Me n-chi i Osówo mú banchí eyên ḿbé kpákpá, Osówo mú Ébarahâm ne Ázik ne Jekôp. Ne Músis kâng o-cít bushú emen, ké nǎ, mu o-shî ng etún achi o-ri Osówo.

⁷ Ne Óburúkpâbí o-raa ne nyǐ kâng o/fu, me nn/ri eringe nyí mbe ba-bên n banet ejí etî ké Éjip. Me nn/jwo ké mbe ba-tii ng ba/fu, me nnyii kámbé ké abwô nyí banet ḿbé ba/tî ba/fu, bakûtî kámbé wǎ básóng. Me mu n-nyît ng kángkáng kyi-kim ne afaníkong ebe

⁸ ne mm/bê n/fu, m-bâ ng enyii kámbé ké abwô nyí banet-Éjip, n-fîm kámbé ba-byí ké Éjip ba-jâ ké esí nyí e/rêe, nyí edabát byiryíng, nyí banet ḿbé Kínan ne Hyítat ne Ámórit ne Périzit ne Hyíbit ne Jébus mbe ba-kyú u kántîk.

⁹ Me nn/jwo ké ntûntû bukyû ḿbú banet ejí mbe ba-tii ng, ne mu n-ri ng eringe nyí banet ḿbé Éjip mbe ba-cít ng kámbé.

¹⁰ N-kú n-twóm m ǒ kántîk a-ca a-kâm otu mú Éjip eringe nyí a/chi a-kpî banet ejí ba-byí ké oshê emen.

¹¹ Nké Músis o/sét Osówo o/fu, me n*da/byí onet*. Me n-cen n nǎ ne n-ca n-kâm otu ámu n-da-kpî banet ḿbé Ézerel ba-byí ké Éjip.

¹² Osówo o-faa ǎ o/fu, me n/chi n-kyú ne wo ké kyikû, ne ké nkéré aa/kpî banet ámbe ba-byí ké Éjip, wo a/chi a-kye mě ofê ké kaku ńkén. Ńkyín nké kyi/chi kyi-tông kyi/fu, me nké n/twóm ǒ.

¹³ Nké Músis o/faa o/fu, â n/ce n-da-sét banet ḿbé Ézerel n/fu, Osówo mú banchí enen ḿbé kpákpá oo/twóm mě kyikit enen, mbé ba/chi ba-bí mě ba/fu, Osówo ámu o-bángê e nǎ. Me n-sét ng kámbé nǎ.

¹⁴ Osówo o-sét ǎ o/fu, [me nyǐ mú me mu. Ńkyín nké wo a/chi a-man a-sét kámbé a/fu, nyǐ mú mbe ba-kó ng ǎ, me mu,] ányi kyi/byí, Óburúkpâbí, oo/twóm mě kyikit enen.

¹⁵ Sét banet ḿbé Ézerel a/fu, me Osówo Óburúkpâbí mú banchí enen ḿbé kpákpá, Osówo mú Ébarahâm ne Ázik ne Jekôp nké nn/twóm ǒ kyikit enen. Ńdyín nké ndyi dyizîn ejí ńdyí dyi/chi dyi-waa ne banyá. Ndyí nké banet ḿbé mbe ba-bâ ké kashú kángkáng ba/chi ba-kû mě ekó.

¹⁶ Ca a-da-kó banet-ashí ḿbé Ézerel kyikit kyibónge a-sét kámbé a/fu, me Osówo Óburúkpâbí mú banchí enen ḿbé kpákpá, Osówo mú Ébarahâm ne Ázik ne Jekôp o/byí o-kâm ǒ. Sét kámbé a/fu, me nn/ri ńkyí banet ḿbé Éjip mbe ba-chi i kámbé, ne mm/bê n-kâm kámbé.

¹⁷ Me mm/bángê n/fu, n-fîm m kámbé ba-byí ké Éjip, nyí mbe ba-bên n kámbé dyitî, ne n/chi n-kúng kámbé n-ca ne mbé ké esí nyí edabát byiryíng, ké esí nyí banet ḿbé Kínan ne Hyítat ne Ámórit ne Périzit ne Hyíbit ne Jébus mbe ba-kyú u.

¹⁸ Banet ejí ba/chi ba-jwo ńkyí a/chi a-sét kámbé. Ne a-man a-kpî banet-ashí ḿbé Ézerel a-ca ne mbé kyikit-otu mú Éjip a-da-sét ǎ a/fu, Osówo Óburúkpâbí mú banet ḿbé Hyíburus oo/tông bě byiko emen. Kye bě ací achât byi-ca ké kyikim-dyikán byi-da-chi byifen byi-kye Osówo Óburúkpâbí eten.

¹⁹ Me mu n-nyît ng n/fu, otu mú Éjip oo*ba/chi o-bángê běn ba-ca* tete ba-tírîng ǎ otíríng.

²⁰ Nké me n/chi n-kúng busa ejí n-kye Éjip busông ké biinkaa byiko-byěm echi ké oshê ámu. Ké nkéré nn/chi kámbyí, o/chi o-mîng běn ba-dim.

²¹ Me n/chi n-chi banet ḿbé Éjip ba-kye ǒ ofê eringe nyí â banet ejí ba/dim, baa*ba/chi ba-dim abwô ábwo*.

²² Onyinyi-Ézerel nang orá o/chi o-dim o-kâm óbe-onyinyi-Éjip emen, ne o/chi o-bí ǎ o/fu, okye ǎ byídí ne byibwáng ḿbyí ba/chi ké gûl ne syílyíba. Banet ḿbé Ézerel ba/chi ba-kúng byěm ḿbyín ba-fé bwǎn ebe ké byiko ba-dim ne mbyí.