Ézódos 29 - Bokyi Bible

Eringe nyí Músis o/chi o-jware Éron ne Bwǎn Emen ba-firi Banchi Kyifen-Osówo

¹ Něen nké a/chi a-jware Éron ne bwǎn emen ba-firi banchi kyifen ḿbé badachi bǎmkpóngé ba-kye mě. Kúng kyisu-otyép-mpong ne etyítǎm efee ḿbyí byi*fí ne kyinêm ké byiko*.

² Kúng filáwa mú o/nwa o-shwôm, mú ba*da/fé bukye ḿbú budachi kámú o-mut*. Chi berêt ké mǔ a-fé bakút-ólif, okíri *dafé* ne okíri a-chi kámú wǎ bakye a-sabe kámú bakút.

³ Fé kámú kaakye a-kúng kámú a-kye mě ké nkéré a-kú a-chi i kyifen ńkyí kyisu-otyép-mpong ne etyítǎm ányi efee.

⁴ Bâ ne Éron ne bwǎn emen ké ocím-dyifyi-mpyep mú ndakyú, a-sét kámbé ba-kôo omu ké bushú ejí ba-cé kpárám.

⁵ Fé kâng Éron byídí ḿbyí nchi kyifen ejí, nkyû ne kyídí-kakim ne ágbádá nyí adacít kyídí-kakim ne kiimbam-kakim ne emâp.

⁶ Cít ǎ kyídí-dyishí, a-yip ekap-ociring nyí ba/sáng ányi ké nyǐ ba/fu, kyi/já Óburúkpâbí, a-bwá ké kyídí-dyishí ánkyi.

⁷ Kúng kâng bakút ḿbé badapwó onet ké dyishí a-pwó ǎ ké dyishí, a-jware ǎ.

⁸ Bâ ne bwǎn emen a-fé kámbé bankyû ké byiko.

⁹ Sît kámbé byicê-byídí ké osín, a-cít kámbé kyídí-dyishí. Éné nké wo a/chi a-jware Éron ne bwǎn emen ba-firi banchi kyifen ejí. Mbé ne bwǎn ebe nké ba/chi ba-kûchi bǎmkpóngé ba-kye mě wǎ banchi kyifen ne banyá ne banyá.

¹⁰ Bâ ne kyisu-otyép-mpong ké bushú-mpyep mú ndakyú, a-sét Éron ne bwǎn emen ba-twôom abwô ebe ké dyishí emen.

¹¹ Ju kyisu-otyép-mpong ánkyi ké bushú ejí, ké ocím-dyifyi-mpyep.

¹² Kúng kyicê-baróng emen a-kpere kámbé ké kafwa a-sabe ké byichí ḿbyí byi/bwom wǎ etwóm nyí kyikit-kyifen echi. A-yip kâng baróng ḿbé ba/waa a-pwó ké kyikû-kyikit-kyifen echi.

¹³ Ké nkéré aa/chi éné, kúng kángkáng bafwám ḿbé ba/lák ké kafâ-enyam ne kyikim-dyityém ńkyí kyi/nwa kyi-shwôm ne bampî bafee ne bafwám ḿbé badalák ké mbé, a-shí kámbyí ké kyikit-kyifen echi a-kye mě.

¹⁴ Nké yip enyam-kyisu-otyép-mpong ányi, ne ekwop emen ne efong emen a-da-shí ké dyishí-bukwóp-oshê. Kyifen ńkyín nké kyidasoo byibî ḿbyí banchi kyifen ejí.

¹⁵ Kúng otyítǎm obónge, a-sét Éron ne bwǎn emen ba-twôom abwô ebe ké dyishí emen.

¹⁶ Ju kámú a-yip baróng emen a-pwó ké kángkáng bakô-kyikit-kyifen echi banyii.

¹⁷ Két otyítǎm ámu boǒkím boǒkím, a-soo efong emen ne byiká emen, a-yip kámbyí a-twôom ké dyishí emen ne byikim ḿbyí áku.

¹⁸ Shí kyirim-otyítǎm ánkyi kyimúmú ké kyikit-kyifen echi wǎ kyifen-byiryíng. Kyinung ńkyí kyidafím ké kyifen ńkyín kyi-nyîn n mě.

¹⁹ Kúng otyítǎm mú obónge, mú ba/chi ba-jware kámbé ba-firi banchi kyifen, a-sét Éron ne bwǎn emen ba-twôom kámú abwô ké dyishí.

²⁰ Ju kámú a-kúng kyicê-baróng emen a-ta ké atông nyí bubwô-etyebéng nyí Éron ne bwǎn emen ne ké otyép-kafwa mú bubwô-etyebéng ne ké otyép-kafwa mú kyiká-bubwô-etyebéng. Yip baróng ḿbé ba/waa a-pwó ké kángkáng bakô-kyikit-kyifen echi banyii.

²¹ Kúng kyicê-baróng ḿbé mbe ké kyikit-kyifen echi ne kyicê-bakút ḿbé badapwó ké dyishí a-myî Éron ne bwǎn emen ne ké byídí ebe. Nyǐ ne bwǎn emen ne byídí ebe ba/chi ba-firi kâng banet ne byěm ejí.

²² Kúng bafwám ḿbé otyítǎm ámu, bafwám-ocî ne ḿbé ba/lák ké kafâ-enyam ne kyikim-dyityém ńkyí kyi/nwa kyi-shwôm ne bampî bafee ne bafwám ḿbé badalák ké mbé ne bunam ḿbú bubwô-etyebéng.

²³ Fîm berêt ké kafâ-kaakye-berêt mú baa/chi kyifen ba-kye mě. Fîm kyirim kyibónge ké dyizong-berêt nang dyirá, kyirim kyibónge ńkyí ba/chi ne bakút-ólif ne kyibónge ńkyí ba*da/fé kámbé* ne kyibónge ńkyí ba/chi wǎ bakye.

²⁴ Yip byiryíng ḿbyín kángkáng a-fé ké abwô nyí Éron ne bwǎn emen, a-sét kámbé a/fu, bakúng kámbyí ba-kye mě wǎ eyáré nyí ba/tigi ne dyityém ne ba-kye mě.

²⁵ Koo kâng byiryíng ámbyi ké abwô ebe a-shí kámbyí ké kyikit-kyifen echi. Twôom kámbyí ké kyifen ńkyí badashí kyirim kyimúmú, a-shí kámbyí a-kye mě wǎ kyifen-byiryíng. Kyinung ńkyí kyidafím ké kyifen ńkyín kyi-nyîn n mě.

²⁶ Kúng kakim-otyítǎm ámu a-kye mě wǎ eyáré-dyityém. Kyipang-enyam ńkyín kyi/chi kyi-já ǒ.

²⁷ Â ba/jware onet o-firi nchi kyifen ejí, bakúng kakim ne bunam-otyítǎm mú badajware kámbé ba-kye mě wǎ eyáré-dyityém nyí ba/chi ba-kye banchi kyifen.

²⁸ Nkyi ké dyityém ejí ńdyí mm*ba/chi n-yángê* n-fu, â banet ejí ba/chi kyifen ebe ńkyí okwáre ne me, kakim ne bunam-enyam byijá banchi kyifen. Nyín eyáré nyí edafím ne banet e-kâm mě me Óburúkpâbí.

²⁹ Â Éron o/kpú, bayip byídí-nchi kyifen-Osówo emen ba-kye bwǎn emen ba-kûfé ké nkéré mú baa/jware kámbé ba-firi banchi kyifen ejí.

³⁰ Wǎn-Éron mú o/chi o-kúng kyikit emen wǎ nchi kyifen ejí, mú mu o-câ ké mpyep mú me ndakyú, ofé byídí ámbyi ké ací káchâtkányi.

³¹ Kúng enyam-otyítǎm mú ba/kúng ba-jware Éron ne bwǎn emen ba-firi banchi kyifen ejí ba-rám kányí ké kyikit-ociring.

³² Bakyú ké ocím-dyifyi mú mpyep mú ndakyú ba-ryí kányí cibicibi ne berêt mú o/waa ké kaakye.

³³ Mbé ba/chi ba-ryí ńkyí ba/kúng ba-chi kyifen-byibî epwoo ké dyicí ńdyí badajware kámbé ba-firi banchi kyifen ejí. Banchi kyifen nké nke nké badaryí byiryíng ámbyi, ké nǎ, byi-chi i byiryíng-ociring.

³⁴ Â kyicê-enyam ne kyicê-berêt byi/waa, ba*da/ryí kámbyí ne dyicófóróng dyi-cé* bakúng kámbyí ba-shí. Ba*dachi ba-ryí kámbyí* ké nǎ, byi-chi i byiryíng-ociring.

³⁵ Jware Éron ne bwǎn emen ba-firi banchi kyifen ejí ké ací jangjang káchâtkányi, wǎ eringe nn/sét ǒ.

³⁶ Chi kyifen ké kyisu-otyép-mpong kángkáng dyicí eringe nyí ndapwoo banet byibî. Ńkyín kyi/chi kyi-jware kyikit-kyifen echi. Kúng bakút-ólif a-pwó ké nkyí a-chi kánkyí kyi-firi kyikit-ociring.

³⁷ Chi ńkyín kángkáng dyicí ké ací káchâtkányi. Â a/chi éné, kyikit-kyifen echi kyi/chi kyi-firi kiǐtí-kyikit-ociring ńkyí nang onet orá nang chwǒm to nang kyirá nké kyi/ta kánkyí, busa-ociring ḿbú mbu ké nkyí bu/chi bu-némê onet ámu nang chwǒm ánkyi.

Byifen ḿbyí Kángkáng Dyicí

³⁸ Kángkáng dyicí ké kángkáng ací nyí nyi a-bâ, chi kyifen ké kyikit-kyifen echi ńkyín ké bwǎn-etám-ebû bafee ḿbé baa/rí dyije dyibónge.

³⁹ Chi kyifen ké obónge ké dyicófóróng ne obónge ké dyikurúku.

⁴⁰ Chi kyifen ké wǎn-etám-ebû mú kashú ne kyílogaram-filáwa obónge mú onong, mú badachi berêt ké mǔ ne lyíta-bakút-ólif mú onong onong obónge. Pwó lyíta-bato obónge ké kyifen ánkyi echi.

⁴¹ Chi kyifen ké wǎn-ebû mú nnyinyěng ké dyikurúku, a-chi kánkyí ne ocím-filáwa obónge ne ocím-bakút obónge ne ocím-bato obónge wǎ kyifen ńkyí ké dyicófóróng. Ńkyín kyi/bwom wǎ kyifen-byiryíng ńkyí ba/chi ba-kye mě me Óburúkpâbí, ne kyinung emen kyi-nyîn n mě.

⁴² Ké kángkáng bankéré ḿbé mbe ba-bâ, bachi kyifen-byěm eshí ńkyín ké bushú ejí ké ocím-dyifyi-mpyep mú ndakyú. Ányi nké n/chi n-kâm banet ejí m-pem ne wo.

⁴³ Ányi nké n/chi n-kâm banet ḿbé Ézerel, ne busan ḿbú ragerage ḿbú budafím ké bushú ejí bu/chi bu-chi kyikit ánkyi kyi-firi kyikit-ociring.

⁴⁴ Me n/chi n-jware mpyep ámu ne kyikit-kyifen echi byi-firi byikit-ociring, ne n/chi n-jware to Éron ne bwǎn emen ba-kûchi bǎmkpóngé ba-kye mě wǎ banchi kyifen.

⁴⁵ Me n/chi n-kyú ké burwám ḿbú banet ḿbé Ézerel ne n/chi n-kyú Osówo ebe.

⁴⁶ Mbé ba/chi ba-nyît ba/fu, me n-chi i Osówo Óburúkpâbí ebe mú o/fîm kámbé ba-byí ba-mîng Éjip eringe ndaman ekyú ké burwám ebe. Me n-chi i Osówo Óburúkpâbí ebe.