Ézódos 28 - Bokyi Bible

Byídí ḿbyí Banchi Kyifen-Osówo badafé

¹ Kó Éron mú wǎn-boné eyên ne bwǎn emen ḿbé banyinchéng, Nádap ne Abyíhu ne Elyǎza ne Étama, ké burwám-banet-Ézerel ba-bâ ba-kâm ǒ, eringe nyí mbé badakyú banchi kyifen ejí.

² Zim byídí ḿbyí banchi kyifen-Osówo a-fé Éron eringe nyí byi/chi byi-kye ǎ ofê ne bunong ké byiko.

³ Chi kángkáng banchi bampwô ḿbé me nn/fé kámbé mpwô ké abwô, ba-zim Éron byídí eringe nyí bada ǎ ejware wǎ nchi kyifen mú odachi bǎmkpóngé ejí.

⁴ Sét kámbé ba-zim kiimbam-kakim ne kyídí-kakim ne ágbádá ne nkyû mú badatím byěm ké mǔ ne kyídí-dyishí ne kyicê-kyídí ńkyí badasît ké osín. Bazim byídí-banchi kyifen-Osówo ḿbyín ba-kye Éron ne bwǎn emen eringe nyí mbé badachi bǎmkpóngé ba-kye mě wǎ banchi kyifen ejí.

⁵ Banzim byídí ámbyi ba-kúng kyídí ńkyí ba/chi ké eríp-etám-ebû, ńkyí ba/fé bukye ḿbú bulûbulu ne ḿbú kpúúl ne ḿbú shíshét ne okpówo mú onong onong, ba-zim ké bacat-gûl.

⁶ Bazim kyídí-kakim ké byídí-eríp-etám-ebû ḿbyí bulûbulu ne ḿbyí kpúúl ne ḿbyí shíshét ne ké okpówo ne bacat-gûl, ba-tím kánkyí.

⁷ Batú boǒrí-byikem ḿbú badaziri ké bakô-kyídí-kakim.

⁸ Bazim emâp nyí ba/tím kányí kanong kanong ké dyizong-kyídí dyibónge ba-cibi ne kyídí-kakim ánkyi eringe nyí edakyú wǎ kyipang-kyídí ánkyi.

⁹ Kúng aká afee nyí badakó kanyílyan a-sáng azîn nyí bwǎn-Jekôp ashí diǐkpú ne afee ké nyǐ,

¹⁰ ké bunye ké bunye, wǎ eringe nyí ba/fwon kámbé. Sáng bwǎn nyâchât nyâchât ké buká bubónge.

¹¹ Kyé onet-mpwô mú odaman esáng byěm ké aká nyí adashwane kasî, o-sáng azîn nyí bwǎn-Jekôp ámbe ashí diǐkpú ne afee ké aká ányi afee, o-lák kányí ké biǐbáá-gûl byifee.

¹² Yip aká ányi a-fé ké boǒrí-byikem-kyídí-kakim ánkyi, a-bwom ké dyishí-byikû-banet ḿbyí Ézerel diǐkpú ne byifee. Ké bukwóp ámbu, Éron o/chi o-tû azîn ebe ké byikem emen, eringe nyí me Óburúkpâbí ndakûzîim banet ejí kángkáng nkéré.

¹³ Chi biǐbáá-gûl byifee

¹⁴ ne boǒrí bufee ké gûl mú onong onong a-ním kámbú wǎ orí mú badamuu a-tú ké biǐbáá-gûl ámbyi.

Kiimbam-Kakim

¹⁵ Zim kiimbam-kakim ńkyí otu-nchi kyifen ejí, ńkyí odakûkúng o-nyît okabe mú ejí. Bakúng dyizong-kyídí dyibónge ne bacat to babónge, ḿbyí ba/zim kyídí-kakim ba-zim kánkyí, ba-tím kánkyí to eringe ebónge.

¹⁶ Kyikyú baryên ne butang jangjang, a-fút kánkyí kafee, basentyímyíta bujam ne bafee ké butang ne eringe ebónge to ké baryên.

¹⁷ Tú etáng-aká nyí adashwane kasî enyii ké nkyí. Ké otáng mú kashú, tú aká nyí badakó rúbyi ne tópas ne gánet.

¹⁸ Ké nnyinyěng-otáng, tú aká nyí badakó émárol ne safára ne dámon.

¹⁹ Ké etáng echât, tú aká nyí badakó túkos ne ágat ne ámátyis,

²⁰ ne ké etáng enyii, tú aká nyí badakó búrol ne kanyílyan ne jásapa. Lák aká ńnyín ké biǐbáá-gûl.

²¹ Ké aká ńnyín diǐkpú ne afee nang burá basáng dyizîn ńdyí wǎn-Jekôp obónge ké mbú, a-bwom ké byikû-banet ḿbyí Ézerel diǐkpú ne byifee.

²² Ké kiimbam-kakim ánkyi, chi boǒrí ké gûl mú onong onong, a-ním kámbú wǎ orí mú badamuu.

²³ Chi ékpâl efee ké gûl a-tú kámbú ké bakô-ashí-byikem-kiimbam,

²⁴ a-kúng boǒrí-gûl ámbu bufee a-tú ékpâl ányi efee.

²⁵ Yip boǒrí-gûl ḿbú áku bufee a-tú ké biǐbáá-gûl ámbyi byifee, a-cibi kámbyí ké kashú-boǒrí-byikem ḿbú kyídí-kakim.

²⁶ Chi Kâng ékpâl-gûl efee a-tú kányí ké bakô-kiimbam-kakim ḿbé kyísí, ké kafâ-kiimbam ńké ba/kim ne kyídí-kakim.

²⁷ Chîchi ékpâl-gûl ekíri efee a-tú kányí ké kyikim ńkyí kyísí e-twôom ké boǒrí-byikem ḿbú kyídí-kakim fáráng ne ocím emen, emâp nyí ba/tím kanong kanong e-waa kyísí, nyǐ e-waa kyíbóng.

²⁸ Yip orí mú bulûbulu a-ziri ékpâl nyí kiimbam-kakim ne nyí kyídí-kakim kyikit kyibónge eringe nyí kiimbam-kakim kyidakyú kyíbóng-emâp nyí ba/tím otím, eringe nyí kiimbam-kakim kii*kyú pogepoge*.

²⁹ Ké nkéré Éron oo/nung ké nfût-ociring, nyǐ ofé kiimbam-kakim ńkyí ba/sáng azîn nyí byikû-banet ḿbyí Ézerel, eringe nyí me Óburúkpâbí ndakûzîim banet ejí kángkáng nkéré.

³⁰ Fé ámám nyí badakó búrim ne túmim ké kafâ-kiimbam-kakim eringe nyí Éron odakúng kányí ké nkéré mú odabê ké bushú ejí. Ké bankéré ámbe, o-man o-fé kiimbam-kakim ánkyi kángkáng nkéré eringe nyí odanyît okabe ejí, o-sét banet ḿbé Ézerel.

Byídí ḿbyí Banchi Kyifen-Osówo Byikíri

³¹ Ágbádá nyí badafé ba-cít kyídí-kakim zim kányí ké kyídí-eríp-etám-ebû ńkyí bulûbulu.

³² A-kyú u ne kyitông ńkyí badafé dyishí, ne batím kyitông ánkyi kyi-cîp eringe nyí kii*járê*.

^33-34 Ké ocím emen mú kyísí kerékeré, fé byirim-byichí ḿbyí badakó pamagáránat, ḿbyí ba/tím ké bacat ḿbé bulûbulu ne ḿbé kpúúl ne ḿbé shíshét, a-tú boǒgbáng-gûl ké otyém ebe.

³⁵ Éron ofé ágbádá ńnyín ké nkéré o-kú o-chi i bǎmkpóngé wǎ nchi kyifen ejí. Ké nkéré o-kú o-bâ ké bushú ejí ké nfût-ociring, nang ké nkéré o-kú o-byí i ké mǔ, ba/chi ba-jwo eringe nyí boǒgbáng budadíp, ne baa*ba/chi ba-ju ǎ*.

³⁶ Chi byibwáng byibónge ké gûl mú onong onong, a-sáng ányi ké mbyí a/fu, kyi/já Óburúkpâbí.

³⁷ Yip bucat ḿbú bulûbulu a-bwá kámbyí a-cibi ne kyídí-dyishí.

³⁸ Éron okûbwá kánkyí ké mbwô emen, eringe nyí me Óburúkpâbí n/chi n-koo kángkáng byifen ḿbyí banet ḿbé Ézerel badachi ba-kye mě, nang ba*da/man echi byifen ámbyi ké bukwóp ḿbú dángdáng*.

³⁹ Tím nkyû ne kyídí-dyishí ne kyídí-osín ḿbyí Éron ké okpówo mú onong onong. Tím kyídí-osín emen kanong kanong.

⁴⁰ Zim bankyû ne byídí-osín ne byídí-ashí a-kye bwǎn-Éron, ḿbyí byidachi kámbé ba-kyú ne ofê ne bunong ké byiko.

⁴¹ Fé Éron ne bwǎn emen byídí ḿbyín. A-pwó kámbé kâng bakút-ólif ké dyishí, a-jware kámbé wǎ banchi kyifen, eringe nyí mbé badachi bǎmkpóngé ba-kye mě wǎ banchi kyifen-Osówo.

⁴² Zim kámbé ebáta e-fím ké osín e-ribi ké amam, eringe nyí akwop ebe aa*kûrángê kyíjí*.

⁴³ Éron ne bwǎn emen ba-man ba-kûfé kányí kángkáng nkéré ké nkéré ba-kú ba-wâa ng ké mpyep mú ndakyú ne ké kyikit-kyifen echi ba/fu, mbé ba-da ng echi bǎmkpóngé wǎ banchi kyifen ejí ké nfût-ociring, eringe nyí baa*ju kámbé ba/fu, ba/tông akwop ebe kyíjí*. Kyije ńkyín kyi-waa ng kángkáng nkéré ne Éron ne bwǎn emen.