Ézódos 26 - Bokyi Bible

Mpyep mú Óburúkpâbí odakyú

¹ Kúng byicê-okpówo mú onong onong, mú ba/chi ké bacat ḿbé shíshét ne bulûbulu ne kpúúl, ḿbé ba/chi ké eríp-etám-ebû, a-chi kafâ-mpyep-ociring mú me ndakyú. Zim biǐnyám ḿbyí mbyi ne abyibabang ké byicê-byídí ámbyi.

² Chi byicê-byídí ámbyi byi-kyú jangjang, bamyíta diǐkpú ne bafee ké butang, ne bamyíta bafee ké baryên.

³ Cibi byicê byitánge a-zim, a-cibi to ḿbyí áku byitánge a-zim.

⁴ Chi aziri ké kyídí ńkyí bulûbulu a-tú ké kyicê ńkyí kyi/bwa kyíjí, ké byicê-byídí ámbyi byifee.

⁵ Tú aziri bajam bafee esim diǐkpú ké mbwôp kashú-kaǎcê-kyídí ńké mbwôp kashú-kyicê, a-tú to azong-aziri ányi bajam bafee esim diǐkpú ké nryî esim-kaǎcê ńké nnyinyěng-kyicê.

⁶ Chi bajam-boǒmkpák bafee esim diǐkpú ké gûl ḿbú a/chi a-kúng byicê-byídí ámbyi byifee a-cibi kyikit kyibónge.

⁷ Kúng byicê-byídí diǐkpú ne din ḿbyí ba/chi ké eríp-ebúbǔu, ḿbyí adacít mpyep ámu.

⁸ Chi kámbyí kángkáng byi-kyú jangjang bamyíta kiǐkpú ne bachât ké butang, ne bamyíta bafee ké baryên.

⁹ Zim byicê byitánge kyikit kyibónge, a-zim ḿbyí áku to nyâchât kyikit kyibónge. Fút kyicê ńkyí byicê nyâchât kampén kafee kyi-cít ké bushú-mpyep.

¹⁰ Tú bajam-aziri bafee esim diǐkpú ké nkuli kyikû-kaǎcê-kyídí ńkyí mbwôp kashú-kyicê, a-tú to bajam-aziri bafee esim diǐkpú ké kyicê ńkyí kyibónge.

¹¹ Chi bajam-boǒmkpák bafee esim diǐkpú ké borôn, a-tú kámbú ké aziri ányi eringe nyí adayip byicê ámbyi byifee a-cibi kyikit kyibónge, byi-firi kyídí kyibónge ńkyí badacít mpyep.

¹² Kpong kyicê ńkyí kyidawaa kyísí kyi-jâ ké esim-mpyep.

¹³ Yip byicê ḿbyí áku byifee, ḿbyí byi/waa, ḿbyí kyicê kyibónge nkyi basentyímyíta bajam bafee esim diǐkpú ké butang, ḿbyí adacít kyíbóng-mpyep, byi-shû kyísí byi-cít ekpe.

¹⁴ Chîchi byěm ḿbyí adacít kámú byifee. Kyibónge, chi ké ekwop-enyam-otyítǎm nyí ba/fé bukye ḿbú shíshét, a-chi ńkyí kyibónge ké ekwop-enyam nyí enong enong, ḿbyí byi/chi byi-kyú byídí ḿbyí kyíjí, ḿbyí byidacít kámú.

¹⁵ Chi byichí ḿbyí byidacibi ne barî wǎ bawíndu ké byichí-akákya, ḿbyí byidaníbî mpyep.

¹⁶ Kyichí nang kyirá kyikyú bamyíta banyii ké butang, ne basentyímyíta bajam bachât esim nyâchât ké baryên,

¹⁷ a-cibi kámbyí ashí amúmú, eringe nyí ashí ebe adaman ecibi ne barî. Ját ashí-byichí ányi kángkáng.

¹⁸ Chi byicê-byichí bujam ḿbyí adafé ké kyicê ńkyí busyísen,

¹⁹ ne bajam-byikim-basyílyíba bafee ḿbé badafé ké byikû ebe, byikim byifee ké kyichí kyibónge, byi-cibi ashí emen nyí cáncán afee.

²⁰ Cibi byichí bujam ḿbyí byidajé ké kyicê-mpyep ńkyí bushûyû,

²¹ ne byikim-basyílyíba byifee ḿbyí byidabwom ké kyikû-kyichí nang kyirá.

²² Ké esim-mpyep nyí e/jé kyicê ńkyí esû edaríbî e-jâ, cibi byichí nyâchât,

²³ ne byichí byifee ké bakô.

²⁴ Byichí-bakô ḿbyín byicibi ne barî ké kyikû, badóng kámbyí byi-ribi kyíbóng. Chi byichí byifee ḿbyí byi/bwom ké bakô ámbe bafee éné.

²⁵ Byichí kâng byi/chi byi-kyú nyíryinyi ne byikim-basyílyíba ebe onyiryiká ne din, byikim byifee ké kyichí kyibónge.

²⁶ Chi efang onyiryiká ké byichí-akákya ḿbyí adacibi cángecangecánge, etánge nyí adacibi ké kyicê-mpyep kyibónge,

²⁷ etánge ké kyicê-mpyep ńkyí áku, ne etánge nyí adacibi ké kyicê-mpyep ńkyí esû edaríbî e-jâ, ne ké esim-mpyep.

²⁸ Ngô okyú kyichí kyibónge fím ké dyishí-mpyep dyibónge kyi-ribi ké ńdyí áku.

²⁹ Cít byichí ḿbyí a/cibi éné kángkáng ne gûl, a-fé ékpâl-gûl ké mbyí eringe byidaníbî byichí ḿbyí ba/cibi cángecangecánge kíngkíng, ḿbyí a/chi a-cít to kámbyí ne gûl.

³⁰ Bi mpyep ámu wǎ eringe nyí n/sét ǒ kyíbóng-kaku.

³¹ Chi ékpígí ké okpówo mú onong onong, mú a/chi ké eríp-etám-ebû nyí bulûbulu ne nyí kpúúl ne nyí shíshét. Zim biǐnyám ḿbyí mbyi ne abyibabang ké nyǐ.

³² Kpong kányí ké byikwap-akákya byinyii ḿbyí a/cít kámbyí ne gûl, a-fé boǒmkpák ké mbyí, a-fé kámbyí kyísí ké boǒkím-syílyíba bunyii.

³³ Yip ékpígí ányi a-tî ké kyikû-boǒmkpák ḿbú mbu ké bubóng-mpyep, a-yip mkpukpu-byěm ejí mú a/fé biǐbáá-aká byifee a-tî ké esim-ékpígí. Ékpígí ányi e/chi e-kyii nfût-ociring ne ochíchí-nfût-ociring.

³⁴ Yip kiinkíbí a-cít ké mkpukpu-byěm ejí.

³⁵ Ké kafâ-nfût-ociring, tî ókpákpúrúk o-jâ ké kyicê-mpyep ńkyí bushûyû, a-tî kyikwap ńkyí badatwôom etyuryíkáng kyi-jâ ké kyicê ńkyí busyísen.

³⁶ Ké ocím-dyifyi-mpyep, chi ékpígí nyí okpówo mú onong onong, mú a/chi ké eríp-etám-ebû nyí bulûbulu ne nyí kpúúl ne nyí shíshét a-zim basáng ḿbé banong banong ké nyǐ.

³⁷ Chi byikwap byitánge ké byichí-akákya a-kpong ékpígí ányi, a-fé boǒmkpák-gûl ké mbyí. Chi byikim-borôn byitánge ḿbyí adafé byikwap ámbyi kyísí.