Ézódos 25 - Bokyi Bible

Eyáré nyí Mpyep mú Óburúkpâbí odakyú

¹ Óburúkpâbí o/sét Músis o/fu,

² sét banet ḿbé Ézerel a/fu, bakye mě eyáré. Koo nang ebóng chwǒm ńkyí nang yeě o/fu, nyǐ o-kyâ.

³ Eyáré ányi e-man n ekyú gûl nang syílyíba nang borôn

⁴ nang okpówo mú onong onong nang kyídí ńkyí bulûbulu nang ńkyí kpúúl nang ńkyí shíshét, ńkyí ba/chi ké eríp-ebúbǔu

⁵ nang ńkyí ekwop-otyítǎm nyí ba/fé bukye ḿbú shíshét nang ekwop-enyam nyí enong enong nang byichí-akákya

⁶ nang bakút ḿbé badafé ké otyuryíkáng nang byěm ḿbyí dyidanyîn kyinung, ḿbyí badafé ké bakút ḿbé badayip ne ba-jware byěm ne ḿbyí badafé ké burwan ḿbú budanyîn kyinung

⁷ nang aká nyí anong anong wǎ kanílyan, nyí badalák ké kyídí-kakim ne kiimbam-kakim ńkyí otu-nchi kyifen ejí.

⁸ Banet ḿbé Ézerel ba-man ba-bi mpyep-ociring mú badabi ké byídí ba-tî mě eringe nyí me ndakyú ké burwám ebe.

⁹ Chi mpyep ámu ne byěm ḿbyí ba/chi ba-tî ké mǔ kerededet wǎ eringe nyí n/chi n-sét ǒ n/fu, bachi.

Mkpukpu-Byěm-Osówo

¹⁰ Chi mkpukpu ké byichí-akákya, okyú bajam-basentyímyíta batánge esim diǐkpú ké batang, bajam-basentyímyíta bachât esim nyâchât ké baryên, ne bajam-basentyímyíta to bachât esim nyâchât ké bunyâam.

¹¹ Cít kafâ emen ne esim emen ne gûl mú onong onong, a-chi to ocím emen ké gûl a-wáp a-kwárê.

¹² Chi ékpâl enyii ké gûl a-fé kányí ké byiká emen byinyii, efee ké kyicê kyibónge.

¹³ Chi echí enyii ké byichí-akákya nyí badaníbî kámú, a-cít kányí ne gûl,

¹⁴ a-fé kányí ké ékpâl nyí nyi ké bakô emen.

¹⁵ Echí ányi ewaa ké ékpâl emen ne baa*man ba-zú kányí*.

¹⁶ Ne a-kúng kâng biǐbáá-aká ḿbyí n/chi n-kye ǒ, ḿbyí n/sáng byije ké mbyí a-fé ké kafâ.

¹⁷ Chi kiinkíbí emen ké gûl mú onong onong, bajam-basentyímyíta batánge esim diǐkpú ké butang, ne bajam-basentyímyíta bachât esim nyâchât ké baryên.

¹⁸ Mee biǐnyám byifee ḿbyí mbyi ne abyibabang ké gûl mú ba/díp odíbíng

¹⁹ a-twôom kámbyí ké ashí-mkpukpu. Chi kámbyí eringe nyí byidakyú cibicibi ne kiinkíbí.

²⁰ Biǐnyám ámbyi ne abyibabang byibwom kyíbóng-kiinkíbí, byi-bírî barî kashú, abyibabang ebe a-cít kiinkíbí ánkyi.

²¹ Yip biǐbáá-aká ámbyi byifee a-fé ké mkpukpu ámu, a-yip kiinkíbí a-cít.

²² Me n/chi n-kâm ǒ ké mkpukpu ámu, ne n/chi m-bwom ké otyém mú biǐnyám ámbyi byifee n-kye ǒ kángkáng byije ḿbyí a/chi a-kye banet ḿbé Ézerel.

Ókpákpúrúk mú badatî Berêt, mú ba/chi Kyifen ba-kye Osówo

²³ Chi ókpákpúrúk ké byichí-akákya, bajam-basentyímyíta banyii esim nyíryinyi ké butang, basentyímyíta bajam bafee esim banyii ké baryên, ne bajam-basentyímyíta bachât esim nyâchât ké bunyâam.

²⁴ Cít kámú ne gûl mú onong onong, a-fé gûl ké bakô emen a-wáp a-kwárê.

²⁵ Chi ocím emen o-rêe ké bamyílyímyíta bajam bachât esim onyiryiká a-wáp kámú a-fé ké kafâ, a-fé bakô ba-wáp ocím kerékeré.

²⁶ Chi ékpâl enyii ké gûl nyí badayip kámú a-fé kányí ké bakô-ókpákpúrúk ámu banyii, ké kyikit ńkyí byiká emen mbyi.

²⁷ Fé ékpâl nyí e/chi e-níbî echí nyí ba/chi ba-kûtû ókpákpúrúk ámu fáráng ne ocím emen.

²⁸ Chi echí ányi ké byichí-akákya a-cít kányí ne gûl.

²⁹ Chi acáng ne bammîk ne etyu nyí ba/chi ba-kûchi byifen-bato. Chi kángkáng byěm ḿbyín ké gûl mú onong onong.

³⁰ Tî ókpákpúrúk ámu ké bushú-mkpukpu-byěm ejí, ne ké ókpákpúrúk ámu, berêt mú mbe ba-chi i kyifen ba-kyâ mě o-man o-kyú ké mǔ kángkáng nkéré.

Kyikwap ńkyí badatwôom Etyuryíkáng

³¹ Chi kyikwap ńkyí badatwôom etyuryíkáng ké gûl mú onong onong. Chi kyikû emen ne okyukyu emen ké gûl mú ba/díp odíbíng. Ekong-byichí nyí badamee ba-lák ké nkyí, nyí ee/bwá kyirim ne boǒshǎan ké kyikû, ekyú cibicibi ne kyikwap kyiyén.

³² Kyikyú ne bamgbang nyâchât, bachât bachât ké kyicê kyibónge.

³³ Mgbang nang orá okyú ne ekong-byichí echât nyí ba/mee kányí wǎ ekong-ámon nyí ee/bwá dyiku ne boǒshǎan ké kyikû.

³⁴ Okyukyu-kyikwap ánkyi okyú ne ekong-byichí nyí ba/chi kányí wǎ ekong-ámon nyí ee/bwá dyiku ne boǒshǎan ké kyikû.

³⁵ Balák ekong-byichí ebónge ebónge ké bamgbang emen ámbe nyâchât.

³⁶ Ekong-byichí ányi ne kyikwap kyiyén ne bamgbang emen byikyú cibicibi wǎ chwǒm kyibónge ńkyí ba/chi ké gûl mú ba/díp odíbíng.

³⁷ Chi etyuryíkáng káchâtkányi nyí badakûtwôom ké kyikwap ánkyi, a-tî kányí eringe nyí edakûmang e-tông ng okwâ ké kashú.

³⁸ Chi chwǒm ńkyí badarîp okwâ ne kyiféng emen ké gûl mú onong onong.

³⁹ Kúng bakyílogaram-gûl bujam esim onyiryiká a-chi kyikwap-etyuryíkáng ánkyi ne byipang emen.

⁴⁰ Kúng nkéré a-chi kámbyí wǎ eringe nyí n/tông ǒ kyíbóng-kaku.